Ayubi 5
5
1Peboolimo, hinaoke mia anu sumangkiko?
Ndi sema i olodo mia mempori komepetulungi?
2Menteeano, mia benge-benge mateako mahaki aroa,
ka mia motea aroa ipepateo kohili.
3Ongkue isa'a hori mongkita mia benge-benge mehaka,
sine tetutu kutotonaao po'iangano.
4Luwuno anano wela nahi tetulungi,
ondae melinolanda a mpewowa langkai nahina mia anu motola ira.
5Hapa anu sinowino, pingko domengkaano mia anu mokoninggo,
tendeano rinontu inso a ntonga-tongano rui,
ka luwuno mia mokoranga memosisiriakono pompolino.
6Hangano marasaia nahi pe'umbaako inso a pampawu
ka masusaa nahi tuwu inso a wita.
7Sine, mia moweweuakono masusano koroino onaeno,
kana kinsano api mantande ipenae-nae.
8Sine ongkue, manasa aku umungke Ira Ue Ala,
ka ndi Ondae Ue Ala aku pohaweo teweweuku.
9Ondae weweuo luwuno wineweu langkai ka nahi pinokohawe laro,
saru luwuno anu kinohali-haliako anu nahi pinokopau hadiono.
10Ondae mompotii usa i wawontolino
ka modontai uwoi a wawo lere.
11Mia hinao tataano ninaa a mpo'iangado anu pinelangkai,
mia mpopemasusa pinoweeako pontulungi.
12Nahi Dopokogagio tinoono mia anu pande me'akala,
onaemo ka nahina hasilino wineweuno kaedo;
13 #
1Kor. 3:19
Ondae morako mia monto'ori anu pande me'akala,
patuduno mia me'akala nahi Dopokogagio.
14Tempono meene tutuwi ira wongi-wongi,
ka tempono ntonga oleo ondae mperare kana tempono wongi.
15Sine Ondae mongkadudui mia mongkokolaro inso a pompepaukiakodo,
ka inso a ngkaeno mia moroso.
16Kanandiomo hinao pomperorohiado mia kodei,
ka molengkua mbo'u mekomu.
17 #
Pow. 3:11-12; Ibr. 12:5-6 Menteeano, me'uraomo mia anu Dokuahakono Ue Ala,
onaemo pu'uno tarimaomo pompaguru-Do Anu Tedoa Pabawa.
18Hangano Ondae anu belaio, sine Ondae koa mbo'u anu waluo;
Ondae anu tumunduhio, sine kae-Do koa mbo'u anu mokotompao.
19Inso a onoo rupa ma'isoa omue Dopotolako;
ka i larono opitu rupa omue nahi konako urasa'o.
20I tempono mokoninggoa Dopotolako inso a matea,
ka i tempono peteaa inso a mpabawano ponai.
21Inso a ponsepino elo omue tekadudui,
ka omue siimo doito, tewala hawe tampulaa.
22Tampulaa ka mokoninggoa komengingisiio
ka kondehora mo'ila nahi kodoitoakono.
23Hangano i'olomu ka luwuno watu a mpada ta hina pedandia,
ka kondehora mo'ila ta mesintuwu saru omue.
24Omue kotumo'orio nine kemamu nahina anu sumosanggolio,
omue paresao pada pompakambiamu ka nahi ta hina tetadimu maupo hapa.
25Omue kotumo'orio nine inulemu gagi hadio
ka ana'uemu kana ewo a wita.
26I larono tende ntinuwu omue kometii a laro ngkaburu,
kana te'uno gandu winawa mewinso ia tempono.
27Menteeano, luwuno atuu kimemparesaomo, lano kanandiomo teweweuno;
rongeomo ka to'oriomo!”
Currently Selected:
Ayubi 5: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
