Ayubi 41
41
1Maupo mia anu me'upuako nahi ta mosia mokotesingkao tekudano.
Isemake anu polio me'aro ndi Ongkue
2 #
Rom. 11:35-36
Isemake anu umaropi Aku Kupo'ineeo kongko tuwu?
Hapa anu kongko i totono langi luwuno Ongkue me'ueo.
3Nahi Aku komino mongkona parewa ngkoroino,
mongkona moroso ka mosiano ka tinadeno anu tekosi.
4Isema mokolohuo sangkano i bungkuno?
Lemba labuno anu orua api, isema mokolompahio?
5Isema moko'ungkahio pewowa ngusuno?
Limbu ngisino hinao mongkokongiria.
6Wawo bungkuno onaemo petuda-tudado kanta,
tepotako moroso kana pontondoni.
7Asa ka anu susua tedoa pore,
ranta nahi pokompewinsokio angi,
8anu asa metako a anu susua,
menggoe nahi teponsia mbo'u.
9Morinano mopansari wanta,
matano kana tebosino towea.
10Inso a ngangano meluarako pompokomewanta,
ka bunga api ntesiarawo.
11Inso a laro engeno membombo laho
kana inso a ngkuro anu rede ka ihino monggenggelento.
12Penaano mompokomelanga waro,
ka langano api meluarako inso a ngangano.
13A ngkeu we'uno hinao roso;
doitoa mpelonso-lonso i arono.
14Pelupino bauno modato
metako moroso ndi onae, nahi telelu.
15Aroano motea kana watu,
motea kana watu pogili i totono.
16Tewala onae mentade, luwuno anu pabawa gagi mpondende,
gagi bulalingo hangano doito.
17Sinapoiako ponai,
nahi mobela, kanatuu koa mbo'u kansai, pana ka pando.
18Labu potaeno kana seami,
mala kana keu mowuru.
19Onae nahi pokosaario ana mpana,
watu pokembi kana mebali ndi onae gagi dodono pae.
20Tarasulu potaeno dodono pae
ka tiino pando ipengingisiio.
21I totono hinao siba tami montaso;
onae mepanee a wawo rege kana pehahiano ponsesa.
22Ondaloano iweweuo lulua kana kuro,
tahi ipokogagio ponahuano rampa-rampa.
23Onae mobinta wure anu mewanta,
ranta tahi malua hinala wuu mopute.
24Nahina pengkenano i wawontolino,
onaemo anu hinao penaano nahi ponto'ori doito.
25Luwuno anu ondau doito ndi onae;
onaemo mokole a luwuno kondehora lambaha.”
Currently Selected:
Ayubi 41: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
