Ayubi 42

I Ayubi mokuleo pauno ka me'o'ole

42:1-6

1Ka i'amba sumangki i Ayubi ndi Ondae i Ue,

2”Kuto'orio nine Omiu polio weweuo luwuakoano,

ka nahina tinoo-Miu anu nahi gagi.

3 # Ayb. 38:2-3 Omiu mesikeno, ’Isemake onae

anu tumutuwio pomputusi nahina ponto'ori?’

Onaemo pu'uno, nahina ponto'ori kutumutuluomo

mongkona luwuakoano anu tedoa kukohali-haliakono ka anu nahi kuto'orio.

4Pau-Miu, ”Rongeomo, Ongkuemo anu mepau;

Aku sumikenoko, ka upaua-Kune.”

5Butu koa pau inso a mia kurongeo mongkona Omiu,

sine kanandio-andio mataku isa'a kumita Komiu.

6Onaemo pu'uno kumokoko'iiakono pauku ongkueku

ka saru me'o'ole ongkue mentoro a laro pampawu ka awu.”

Teweweuno i Ayubi pinokomoiko

42:7-17

7Mansano Dopohaweo i Ue mongkona atuu ndi Ayubi, Ondae i Ue mepau ndi Elipasi, to Temani, ”Tekuda-Ku tensila ndi omue ka a orua ira sambe'emu, hangano nahi mentee impepau mongkona Ongkue kana tetenaa-Ku i Ayubi. 8Onaemo pu'uno, alaomo opitu sapi lakino ka opitu bimba lakino. Lakomo a ntetenaa-Ku i Ayubi ka pesombaakonomo luwuno atuu gagi pesomba tinunu tiano koroimiu. Tetenaa-Ku i Ayubi ta mekakaiakomiu hangano po'emano anu Aku tumarimao. Bakanatuu nahi Aku weweu komiu menunu saru benge-bengemiu, hangano nahi mpepau mentee mongkona Ongkue kana tetenaa-Ku i Ayubi.” 9Ka i'amba i Elipasi, to Temani, i Bilidadi, to Suahi, ka i Sopari, to Na'ama melako meweweuo kana hapa anu pinau-Do i Ue ndi ondae. Ondae mbo'u i Ue tumarimao po'emano i Ayubi.

10 # Ayb. 1:1-3 Ondae i Ue mokomoikoo teweweuno i Ayubi mansano mekakaiako ira sambe'eno. Ondae i Ue weeakono i Ayubi luwuno pine'ueno i ndi'ipua hawe meluka mpendua. 11Ka i'amba luwuno pepaekompono tama ka beine saru luwuno tepoto'orino i ndi'ipua me'aiwa ndi onae ka mpongkaa meronga saru onae i rahano. Mpetonda ira mpompemasusa ka mentareroo hangano luwuno urasa'o anu Dopokonaakono i Ue ndi onae. Ondae singge mpoweeakono doi asa kesita ka asa sinsi wulaa. 12Ondae i Ue rumonsoo i Ayubi a laro ntumuwuno lembuino laluaopo sekono tuwuno anu i ndi'ipua. Onae mohawe hopulu ka opaa nsowu bembe bimba, nomo nsowu unta, asa nsowu pasa sapi, ka asa nsowu kalide waino. 13Onae mohawe mbo'u opitu ana ntama ka otolu anano beine. 14Anano beine amba-ambano ineeakono i Yemina, anu ko'orua i Kesia, ka anu ko'otolu i Kerenehapu. 15I asa wawo wita nahina hinawe beine kana tekosido anano i Ayubi. Ondae ipoweeako ira amado tia pusaka meronga saru luwuno pepaekompodo tama. 16Umarino atuu i Ayubi da tuwu asa etu ka pato pulu nta'u tehineno. Ikita ira anano ka ana'ueno hawe a inule ko'opaa. 17I Ayubi mate tempono mota'uomo ka tende ntinuwu.

Currently Selected:

Ayubi 42: XMZ

Highlight

Copy

Compare