Ayubi 39
39
1Kopolioke morako kaangano singa waino,
ka domentende mpongkaa singa mongura,
2tewala mpompora ira a laro nsenodo,
mpontowoki a ntoto ewo mokapa?
3Isemake mompatindaakono kaangano manu-manu paa-paa,
tewala mpokao-kao ira anano ndi Ondae Ue Ala,
mpolio-lio hangano nahina kaanga?
4Nde uto'orioke tempo pe'anaado bembe a ntorukuno,
ke poposoo rusa tempono mahaki me'ana?
5Kopolioke dumoao opia tehineno hawe ka isompo wulano,
ka tumo'orio tempono me'ana?
6Saru lumongkuo olontuu ka dompe'anaakono anado,
ka meluarakono ihino pe'anakaado.
7Luwuno anado gagi memoroso ka langkai i tongampada,
ondae melako ka nahi dompekule mbo'u ndi onae.
8Isemake anu mo'ineeo kaitola kalide mo'ila,
ke isemake anu kumaleo koloro petanggoano kalide melakopi?
9Ndi onae Kuweeakonomo pada malua gagi po'iangano
ka pada mopa'i gagi po'iangano.
10Ipengingisiio maroano kota,
nahi perorongeakono peboolido anu monsaari.
11Isompoo luwuno torukuno gagi pada pongkuriano,
ka mo'ungke hapamo koa anu molowulu.
12Nde umehe koake onua metenunu ndi omue,
ke mewongi umpeda a dula mpinotuwumu?
13Kopolioke dumadaio onua tumondao salano padeko mompake koloro sama,
ke onae ta mongkambuke a wita lembo tumondako?
14Kome'ala-alaoke hangano rosono tedoa langkai?
Ke komeweengakonoke anggaamu anu mobea ndi onae?
15Nde kome'ala-alaakonoke wawao mekule hasilino witamu,
ka pumpuo a mponsesaamu?
16Saru mawongko panino manu-manu unta mongkapi-kapi,
sine hinao koake pompehohawa a panino ka wuluno?
17Hangano onae bintao su'uluino a wita,
ka mo'ineeo ka imokula a laro one;
18ikolupeo nine su'ului atuu ta pinokolanda,
ka domelolandao kondehora mo'ila.
19Igau ira anano nahina pompehohawa kana komba anano;
nahi perioo maupo pe'iseino tetadi mpena,
20hangano Ondae Ue Ala nahi Dopoweeakono ponto'ori,
ka nahi pinontiaako ponto'ori ndi onae.
21Tempono onae moroso mokapio panino ka ipolai,
ipengingisiio ngara ka anu mesawikio.
22Omueke moweeakono roso a ngara?
Omueke mompokonaakono wulu a ngkeu we'uno?
23Omueke anu weweuo ka ipelonso kana kosume?
Pekiilino anu meroku mongkokongiri.
24Saru mawongko onae mongkaru wita lembo,
saru roso onae lumako umaropio parewa mpetea.
25Ipengingisiio mongkokongiria ka nahi hori doito,
upalino monsuka mo'aropi ponai;
26I wawono kadu mpana kekele,
kansai ka pando ntesosangkilo;
27saru tekuda ka mosia isila'eo wita,
ka ipebunde tempono irongeo unino tawuwua;
28onae mekiili sompo ipinuuri tawuwua;
ka inso olai iwoomo peteaa,
pompokodoitodo tadulako ka pohio mpeteaa.
29Hangano ponto'orimuke ka ipenee manu-manu singko,
wileo panino te'aro i selata?
30Omueke parentao rajawali ka ipenee olai kontahane,
ka moweweu senono a mantandeano?
31Onae mo'ia ka meseno a pongku watu,
a punsuno pongku watu ka a ntorukuno anu motungko ihinawe.
32Inso i ra'ai ipompensiroi mo'ungke kaanga,
inso olai matano mompoposoo;
33anano mpo'oso rea,
ka isua hinao anu mate i tu'aimo onae.”
I Ayubi me'urumako i aro-Do Ue Ala
39:34-38
34Ka Do'amba i Ue mepau mbo'u ndi Ayubi,
35”Nde anu montata ta mengengeako Ira Anu Tedoa Pabawa?
Po'ineeomo anu tumata Ira Ue Ala sumangki!”
36Sumangki i Ayubi ndi Ondae i Ue,
37”Menteeano, ongkue andio tedoa mokoburu, sangki hapake anu aku mokoweea-Komiu?
Ngangaku kutompoakono kae.
38Pohona umari akumo mepau, sine nahi aku walio;
tamoako pendua, nahi aku motilaloakono.”
Currently Selected:
Ayubi 39: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
