Ayubi 38
38
LAMORO 38–42
SANGKI-DO i Ue NDI AYUBI
Pabawa-Do i Ue i asa wawontolino
38:1–39:33
1Ka i'amba inso a laro angi mokora Ondae i Ue sumangkio i Ayubi,
2”Isemake onae anu weweuo nahi mengkaa pontiso
molalo luwuno pau anu nahina ponto'orino?
3Omue pepatindamo kana tama!
Aku mesikeno ndi omue ka omue asalakono paua-Kune.
4Isuake omue tempono Kunaao empehino tolino?
Tutuluomo, tewala hinao ponto'orimu!
5Isemake anu pakosiomo songkano?
Komba omueke tumo'orio?
Ke isemake anu padindiomo koloro posongka ndi onae?
6A wawo hapake tinandapako lodi-lodino,
ka isemake anu pasao watu pondasino
7i tempono anano wula umpeda meene mpeboo-booli mperonga-ronga,
ka luwuno ana-Do Ue Ala mpebooli mawongko?
8 #
Yer. 5:22
Isema buntoo tahi mompake tondo
tempono ipewurusi meluarako inso a laro mpe'anakaa?
9Tempono Kuweweuo seru gagi sangkano
ka wongi-wongia gagi sawu pehawusino,
10tidano Kupakosio,
ka mompasa lansono ka tondo.
11Ka Ku'amba mepau: Hawe i ndi'ai moiko u'aiwa, si lalo,
i ndi'aimo luwuno bombamu anu mompelangka-langkai ta pinenanaako!
12Horioke a laro ntumuwumu tumenao umpeda meene ka i'aiwa
ke towea upontisoakono po'iangano
13ka i'inio luwuno tompano tolino,
ranta mia mosa'o gauno itapisio inso ndi onae?
14Tolino atuu bali kana wita pulu anu tinondoni,
luwuakoano mesora kana sawu.
15Mia mosa'o gauno rinontu mewineno,
ka tokia anu moroso pinudu.
16Omueke anu metii hawe a insoano tahi,
ke melempa-lempa i totono tahi malua?
17Nde te'ungkahike pewowa langkaino matea ndi omue,
ke horikoke kumitao pewowa langkai worikidi?
18Nde upokonto'orioke maluano tolino?
Pokomengkaaomo, tewala uto'orio luwuno atuu.
19Isuake sala lumako a mpo'ianga mewine,
ka isuake po'ianga wongi-wongia,
20ranta ka upokoteoo i witano,
ka tumo'orio luwu sala lumako a rahano?
21Manasa omue tumo'orio, hadio hangano tempo atuu hinakomo,
ka porokono oleo ntumuwumu hadioomo!
22Nde mewinsokomoke hawe a ponaapa seru baku
ke kumitao ponaapa usa uwoi baku,
23anu ninaa-Ku tiano tempo masukaraa,
tiano tempo peteaa ka pe'iwalia?
24Isuake sala lumako a mpo'ianga tesiarawoano mewine,
a mpo'iangano angi sabaano oleo tesiarawo i wawontolino?
25Isemake anu mongkeke waaano usa marombo
ka pesalano koliki rundu,
26ka ipoweeakono usa a wawo wita ba isua nahina mia,
a wawo mpada londa ba isua nahina mia
27ka ipokomowohio pada one ka maluaano ntu'u,
ka motuwu ira tumba ewo mongura?
28Nde hinaoke amano usa atuu?
Ke hangano isemake ka ipine'anaako te'itino tontoru?
29Inso a mpe'anakaano isemake peluarakono uwoi baku,
ka tontoru baku i langi, isemake anu me'anaakono?
30Uwoi baku kana watu,
ka wawo ntahi malua gagi motea.
31 #
Ayb. 9:9; Amo. 5:8 Upolioke botoo wutuno anano wula Karatika,
ka lumolohio ponguno anano wula Belanti?
32Upolioke mosabao asa howu anano wula gagi petondoni a tempono,
ka metewawa a anano wula Bidu saru luwuno anu tumondao?
33Nde uto'orioke luwuno songka i langi?
Ke pakosio poparentaano i wawontolino?
34Upolioke wuatakono suaramu hawe a laro nseru,
ka isampuko mbo'u mowo?
35Kopolioke mompotola koliki ranta ka dompesosawu,
saru motae ndi omue: omamimo andio?
36Isema monaa ponto'ori a laro nseru
ke isema moweeakono ponto'ori a mpebotono domu?
37Isema mokodoao seru mompake ponto'ori,
ka isema polio umuwuo luwuno kusi i langi,
38tempono pampawu baku gagi labu tinawa,
ka batuno wita ntepotako?
Currently Selected:
Ayubi 38: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
