Ayubi 37
37
Maramba-Do Ue Ala i asa wawontolino
37:1-24
1”Mentee ntu'u, onaemo pu'uno aroaku mondende
ka melonso inso a mpo'iangano.
2Rongeo, rongeomo pohohono suara-Do,
unino rundu anu meluarako inso a nganga-Do.
3Dopotolao a luwuno totono langi,
ka berese-Do a sompo tompano tolino.
4Ka i'amba suara-Do u'uru,
Ondae merunduako suara-Do anu langkai;
Ondae nahi Do'ontoo maupo hapa, tempono suara-Do teronge.
5Ondae Ue Ala merunduako suara-Do anu tinengiriako;
Ondae moweweu luwuno wineweu langkai anu nahi tompokonto'orio;
6hangano a nseru baku Ondae mepau: Tedontamo i tolino,
kanatuu koa mbo'u a usa marombo ka usa anu mongkokongiri.
7Ondae monaakono tondonino a ngkaeno sompo mia
ka domento'orio luwuno mia wineweu-Do.
8Kondehora mo'ila mewinso a mpewuniano
ka mo'ia a laro nsenono.
9Angi mokora meluarako inso a bolongkono,
ka angi morini inso i utara.
10Inso a mpenaa-Do Ue Ala gagiomo uwoi baku,
ka wawo uwoi malua gagi baku.
11Seru mokapa mbo'u Dopo'ulaakono uwoi,
ka seru sumiarawoo koliki-Do,
12ka i'amba koliki-Do tesosangkilo a luwuno siuno montonda petewawa-Do
ka domeweweuo luwuno anu Dopeparentaako i wawontolino.
13Doweweuo ka ihaweo tinoono,
moiko ka igagi pontunduhi a ihino tolino-Do
maupo ka ipinokomengkaa petenunu mompehohawa.
14Ta'oomo biri a luwuno atuu, hei Ayubi,
pomperodomo, ka pekokoongakonomo luwuno wineweu-Do Ue Ala anu kinohali-haliako.
15Nde uto'orio koake, kana'umpe Ondae Ue Ala moweeakono anggaa,
ka mompansari wanta inso a nseru-Do?
16Nde uto'orio koake mongkona penae-naeno luwuno seru,
mongkona luwuno wineweu anu kinohali-haliako inso ndi Ondae Anu Tedoa Tumo'orio,
17hei omue, anu sangkano gagi mokula,
tempono tolino momperodo hangano mokulano angi selata?
18Nde upolioke kana Ondae motudao seru gagi laro langi,
motea kana tami tinawa?
19Pauakamimo hapa anu asalakono kami mempauo ndi Ondae;
nahina anu kami mpokopopauo hangano wongi-wongia.
20Nde Ira pinauakoke nine aku mepau?
Hori irake mia mpotae nine onae ineheno pinepate?
21Kanandio-andio mewine nahi tengkita,
hangano ipokowongi-wongio domu;
ka i'amba mepuuri angi, ka kolingaaomo laro meene.
22Inso i utara me'umbaako wanta kana wulaa;
Ondae Ue Ala itutuwi Ira maramba-Do anu mongkokongiri.
23Anu Tedoa Pabawa, anu nahi topokonto'ori Ira,
langkai pabawa ka moleo-Do;
maupo mompoliako menteea nahi Dopompokonsii.
24Onaemo pu'uno mia medoito ndi Ondae;
sompo mia anu motae onae hinao ponto'orino, nahi Doperioo.”
Currently Selected:
Ayubi 37: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
