Ayubi 36
36
Tinoono marasai onaemo tepidia
36:1-33
1Ka i'amba motae i Elihu,
2”Sabaramo sarai, aku koa paguruko,
hangano da hinao anu aku pauo anee-Do Ue Ala.
3Aku koa humaweo ponto'oriku inso olai
ka mokomentee Ira Anu Weweu aku.
4Hangano, menteeano komba pegaupi pinauku,
asa mia anu sompo ponto'orino umaropiko.
5To'oriomo, Ondae Ue Ala atuu mosia sine nahi Dopokongkodeio maupo isema,
moroso Ira ka mosia a laro pompewowolo anu molino.
6Mia mosa'o gauno nahi Dopo'ineeo tuwu,
sine moweeakono moleoa a mia marasai,
7Nahi Dolimbao pengkitano mata-Do inso a mia mentee,
sine numaa ira ranta nahina tampulaano i horido luwuno mokole a wawo ngkadera poparentaa,
onaemo ka domempinelangkai.
8Tewala ondae mempinonguako rante,
kona rako a laro ngkoloro marasaia,
9onaemo ka Dopopoto'oriako ira wineweudo,
ka mongkona salado,
hangano ondae mpompelangka-langkai,
10ka Do'ungkahiako ira birido a pompaguru,
saru tumena ira mpepokule inso a wineweu mosa'o.
11Tewala mpomperorongeako ira ka mpesomba,
ira mentuwu a laro me'uraa hawe a mpoko'ariano luwuno oleo ntumuwudo
ka a laro manangaia hawe tampulaano luwuno ta'u tumuwudo.
12Sine, tewala nahi domperorongeakono,
ira memateako pando,
ka memate a laro pe'ulu watudo.
13Mia anu aroano mosa'o monaa tekudaa;
nahi dompebooli mpepetulungi, tempono Dopongu ira.
14Ondae memate tempono mongura,
ka poko'ariano tuwudo a laro mokoko'ii.
15Ondae kumadudui ira mia memarasai a laro marasaiado,
ka birido inungkahiako pompokonsii.
16Omue mbo'u Dopopandeiko meluarako inso a laro masukaraa,
a mpo'ianga anu malua nahina pinemobea,
a meda pongkaangamu anu nahina mososanggoli ka buke taba.
17Sine, omue bukeomo upohawe pohuku kana hukudo mia mosa'o gaudo,
omue pabawaiko pohuku ka moleoa.
18Siimo po'ineeo mokula aroa weweuko mompasinggiri,
siimo po'ineeo langkaino pontolosi onae mokotesaako.
19Polioke peboolimu motolako inso a masukaraa,
ke luwuno rosono pe'iseimu?
20Siimo kekewoio wongi,
tempono tongku melako inso a mpo'iangado.
21Dagaiomo koroimu, si pansia a wineweu mosa'o,
hangano onaemo pu'uno ka i'arahakomu marasai.
22Menteeano, Ondae Ue Ala atuu maramba a laro mpabawa-Do;
isemake guru kana Ondae?
23Isema ta tumantuio sala-Do,
ka isema mosia mepau: Moweweu Komiumo molengku?
24Pewowoloomo nine omue asalakono melangkaio wineweu-Do,
anu dowela mpenaniako mia.
25Luwuno mia mengkitao,
inso olai domengkitao mia.
26Menteeano, Ondae Ue Ala atuu langkai pabawa-Do, nahi tompokohawe laroo,
porokono ta'u-Do nahina mokoparesao.
27Dowuatakono te'i'itino uwoi i wawono,
ka mokomokapao gawu gagi usa,
28anu inuwuno domu,
ka siniwuiako a hadio mia.
29Isema mokonto'orio porawoa seru,
ka unino rurundu a mpo'ianga-Do?
30Menteeano, mewine-Do Dorawoo lumimbu Ira,
ka borungio totono tahi.
31Hangano saru luwuno atuu Dobitara ira tongku,
ka moweeako ira kaanga anu hadio ntu'u.
32Orua kae-Do Doborungiakono kolikino berese
ka tumenao montiu pontiiano.
33Hio peteaa-Do mopoto'orio hawe-Do,
molengkua Do'ewaiakono tekuda-Do anu tensila.”
Currently Selected:
Ayubi 36: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
