Ayubi 35
35
Ondae Ue Ala merioo marasaino mia
35:1-16
1Ka i'amba i Elihu sumangki,
2”Onaeke andio anu potaemu moleo ka anu nineemu:
menteeku i aro-Do Ue Ala,
3tewala omue mesikeno: Hapa tuduno ndi ongkue?
Hapa urano ba kupoweweu hala?
4Aku koa moweeakomu sangkino
ka a luwuno sambe'emu anu perongamu:
5Pentombumo i langi ka kitaomo,
pekokoongakonomo seru anu mantande irapo sekono omue!
6 #
Ayb. 22:2-3
Tewala omue moweweu hala, hapa anu koweweuo ndi Ondae?
Tewala hadio salamu, hapa anu koweweuo ndi Ondae?
7Tewala omue mentee, hapa anu upoweeako Ira?
Ke hapa anu tinarima-Do inso a ngkaemu?
8Butu mia kana omue anu pinokorugino gaumu anu mosa'o
ka butu anano mia anu pinokome'urano menteea.
9Mia mperaali hangano hadiono pompokonsii,
mpebooli mepetulungi hangano pobobarasaido mia anu mempabawa.
10Sine mia nahi dompesikeno: Isua Ira Ue Ala anu weweu aku,
ka anu mompowee penani po'unde-unde i tempono wongi;
11anu moweeakita pompewowolo molino lumaloio kondehora i tolino,
ka ponto'ori lumaloio manu-manu i laro meene?
12Tempo atuu mia mperaali, sine nahi Dosangki,
hangano pompelangka-langkaido mia melambaha.
13Mentee ntu'u, pebooli anu nahina pengkonaano nahi Dorongeo Ue Ala
ka nahi Doperioo Anu Tedoa Pabawa.
14Tamoako mbo'u tewala omue motae nine nahi ukita Ira,
nine teweweumu winawaomo i aro-Do, sine omue da sumisikori Ira!
15Sine kanandio-andio: hangano tekuda-Do nahi pohuku
ka nahi tedoa Doperioo sala mpoweweu,
16onaemo i Ayubi ka ipepau nahina tuduno,
hadio mpau nahina pengkonaano.”
Currently Selected:
Ayubi 35: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
