Ayubi 34
34
Ondae Ue Ala nahi Dopoweweu molengku
34:1-37
1Ka i'amba mepauomo i Elihu,
2”Rongeomo pinauku, omiu mia mponto'ori,
imenta'oomo birimiu ndi ongkue, omiu mia memolino pinewowolomiu.
3Hangano biri umarahakono luwuno pau,
kana langira mompenami kaanga.
4Po'ineeomo tomemputusio ontaeto hapa anu moleo,
metantuio mperonga-ronga hapa anu moiko.
5Hangano i Ayubi motae: Ongkue mentee,
sine Ondae Ue Ala umalao tiaku;
6Maupo hinao tiaku, ongkue pinotaeako megaupi,
maupo nahina sala wineweuku, mobelaku nahi pokotompa.
7Isemake kana i Ayubi,
anu mo'oso pompepaukiako kana uwoi,
8anu lumako tepo'asaako ira mia anu mpoweweu mosa'o
ka mewali-waliako ira mia mosa'o gaudo?
9Hangano motaeomo: Nahi mentudu a mia,
tewala onae Dopekonoo Ue Ala.
10Onaemo pu'uno, omiu mia anu molino pinewowolomiu, ronge akumo:
Ondae Ue Ala nahi Ira moweweu anu mosa'o,
ka Anu Tedoa Pabawa moweweu molengku.
11 #
Pud. 62:13
Tendeano, Ondae mohuku mia menunu wineweuno,
ka weweuo mia menunu peleluno.
12Mentee ntu'u, Ondae Ue Ala nahi Dopoweweu molengku,
Anu Tedoa Pabawa nahi Dopokomolengkuo moleoa.
13Isema me'ala-alaakono tolino ndi Ondae?
Isema mopotembioako Ira asa wawontolino?
14Tewala Ondae montoo i laro aroa-Do,
wali umalao Penaa mempori-Do ka penaa-Do,
15ka luwuno anu tuwu mate mperonga-ronga,
ka mia mekule a pampawu.
16Tewala molino pinewowolomu, rongeomo andio,
ta'oomo birimu a mpinauku.
17Polioke anu umo'aliaakono moleoa mo'ini pabawa,
ka inehemuke komokonsala Ira anu moleo ka mosia,
18Ondae anu mepau a mokole: Hei, mia moweweu mosa'o,
a luwuno inuleno mokole: Hei mia mosa'o gauno;
19Ondae nahi Dope'alaako a luwuno anu langkai potorono,
ka nahi Dopokonse'elu ira mia pinemota'u sekonopo mia kodei,
hangano luwudo onaemo wineweuno kae-Do?
20I larono asa mpiniro ondae memate, oo, ia ntonga wongi
mia pinodengke ka mate,
ondae anu memosia pinokotampula komba hangano kaeno mia.
21Hangano mata-Do dumagaio sala ntumuwuno mia,
ka Dokitao luwuno pelempano;
22nahina wongi-wongia ke maupo worikidi,
pokompewuniado mia anu moweweu mosa'o.
23Hangano nahi Dotantuiakono mia tempono
ka i'aiwa me'aro ndi Ondae Ue Ala ka ibinitara,
24mia mosia Dopokotampulao nahi pinaresa,
ka mia susua Dopotoroo umeu ira.
25Gagi, Doto'orio wineweudo,
ka lumundi ira i tempono wongi, ranta ka domeropu.
26Ondae tumampele ira hangano mosa'o gaudo,
ka domengkita ira mia hadio,
27hangano dompebungkui Ira,
ka nahi domperioo maupo te'asa inso a luwuno sala-Do,
28ranta hangano ondae, peraalikido mia mongkokolaro
mewuatako i aro-Do,
ka peraalikido mia marasai Dorongeo.
29Tewala Ondae merodo-rodo, isema ta mohuku?
Tewala Dowunio rupa-Do, isema ta kumita Ira?
Ondae umatorao aasa tongku maupo nte'o'asa mia
30kasi dompoweweu po'ehedo mia mosa'o gaudo
ka igagi ohodo mia hadio.
31Sine, tewala aasa mia mepau ndi Ondae Ue Ala:
Mompelangka-langkai akumo, sine nahi aku moweweu mosa'o mbo'u;
32hapa anu nahi kupokonto'orio, paguruakunemo;
tewala moweweu akumo molengku, nahi aku weweuo mbo'u.
33Montonda pohawemu nde asalakonoke Ondae Ue Ala moweweu pombaloa
hangano nahi utarimao?
Gagi, omuemo anu asalakono putusio, komba ongkue;
pauomo hapa anu tino'orimu!
34Mia anu molino pinewowolono mepau ndi ongkue,
kanatuu koa mbo'u mia monto'ori anu merorongeakune:
35I Ayubi mepau nahina ponto'orino,
ka pinauno nahina pengkonaano.
36Ha, po'ineeomo i Ayubi ka i'inarahako mpiha,
hangano onae sumangki kana mia mosa'o wineweuno!
37Hangano onae tumiangiakono sala a halano,
ipokungkuakami kae i olomami
ka hadio mpau ndi Ondae Ue Ala.”
Currently Selected:
Ayubi 34: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
