Ayubi 33
33
Pepaudo Ue Ala a mia mperupa-rupa
33:1-33
1”Sine kanandio-andio, hei Ayubi, rongeomo luwuno pauku,
ka ta'oomo birimu a luwuno pinauku.
2To'oriomo, ngangaku ku'ungkahiomo,
eloku i totono langiraku mepau.
3Pinauku meluarako inso a aroaku anu moleo,
ka wiwiku mokomengkaao nahina tewuni hapa anu tino'ori.
4Ongkue Dopokogagi akumo Penaa-Do Ue Ala
ka penaa-Do Anu Tedoa Pabawa weweu aku tuwu.
5Tewala upolio, sangki akumo,
pepatindamo aropi aku,
korahakonomo koroimu.
6Menteeano, ndi Ondae Ue Ala ongkue mengkena saru omue
ongkue mbo'u wineweu inso a wita pulu.
7Gagi omue siimo i'aluko pondendea ndi ongkue,
tembia anu aku weeakomu nahi ta mobea.
8Sine mepaukomo umpeda a biriku,
ka luwuno pinaumu kurongeomo:
9Ongkue morina, nahina sala wineweuku,
ongkue mempori, nahina salaku.
10Sine mohawe Ira pepu'uano umewai aku,
Dotuluri aku gagi iwali-Do.
11Karuku Dowinsoo a laro mpanga,
luwuno pesalaaku Dodagaio.
12Menteeano, a laro mongkona atuu omue nahi mentee, kanatuumo ku'ewaio paumu,
hangano Ondae Ue Ala atuu lumaloio mia.
13Tembio ka utuntu Ira,
nine nahi Dosangkio luwuno pauno mia?
14Hangano Ondae Ue Ala asa orua rupa pepau-Do,
sine nahi dompekokoongakono mia.
15A laro mo'ipi, a laro pongkita tempono wongi,
tempono mia moturi rodo,
mepombole a mpoturia.
16I tempomo atuu Do'ungkahio birino mia
ka mokomponde-ndeako ira luwuno pongkuahako,
17ka dompepokule mia inso a wineweudo,
ka mokotampulao pompelangka-lakaino mia,
18ka ikorahakono penaano inso a ngkaburu kineke,
ka tuwuno inso a mateako pando.
19Onae kinuahakoako marasaia a mpoturiano,
ka tepangkuno wukuno nahi penaa-naa;
20kompono te'osaako kaanga,
po'eheno mongkaa kaanga anu mo'ahi tetadi;
21ihino tenono ranta nahi tengkita mbo'u,
wukuno anu se'eluno nahi tengkita, lansiomo,
22penaano mbo'u rumangkuhio kaburu kineke,
ka tuwuno umpedaako ira anu mpowawa matea.
23Tewala i horino hinao mala'eka,
asa i olono asa nsowu, gagi pompohawe
anu mokomengkaao a mia sala anu mentee,
24ka Ira mehohawao saru mepau:
Potolao, kasi petii a ngkaburu kineke;
doi pontolosi Kuhaweomo.
25Koroino madoopo sekono mia mongura,
mepokule kana tempono imongura.
26Onae mekakai ndi Ondae Ue Ala, ka Ondae Ue Ala memoikoo tumarimao;
ikitao rupa-Do saru mebooli mawongko,
ka menteea Dopokuleo Ue Ala a mia.
27Onae ta menani i arodo mia:
Moweweu akumo hala ka mokomolengkuo anu moleo,
sine mongkona atuu nahi Dosuloakune.
28Dopotolaomo penaaku inso a nsala lumako a ngkaburu kineke,
ka tuwuku ta mongkita mewine.
29Menteeano, luwuno andio Doweweuo Ue Ala
pendua, tendeano pentolu a mia:
30mokuleo penaano inso a ngkekeno kaburu,
ranta ka ipokomewineo wanta tuwu.
31Pekokoongakono, hei Ayubi, ronge akumo,
penoro-noromo, ongkuemo anu mepau,
32Tewala hinao anu mingki pinaumu, sangki akumo;
pepaumo, hangano ineheku mokomenteeko.
33Tewala naahi, laluopo perorongeakune;
penoro-noromo, aku paguruakomu ponto'ori.”
Currently Selected:
Ayubi 33: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
