Ayubi 32
32
LAMORO 32–37
LUWUNO PAUNO I ELIHU
I Elihu mompau pohaweno
32:1-22
1Otolu ira mia atuu mpenaa-naaakono pe'ewado ndi Ayubi, hangano potaeno onae mentee. 2Ka i'amba tekudaomo i Elihu, anano i Barake'eli, to Busi, inso a nsuku Rami. Onae tekuda ndi Ayubi anu motae onae menteeopo sekono Ondae Ue Ala. 3Onae tekudaako ira koa mbo'u sambe'eno otolu ira atuu hangano dompokosalao i Ayubi, maupo nahi domempolio mpoweeakono pe'ewa. 4I Elihu nahi potilaloakono pepauno saru i Ayubi hangano ondae memota'u irapo sekono onae. 5Sine mansano kumitao nine wiwido mia otolu ira atuu nami dompopau mbo'u pe'ewado, onaemo ka itekuda. 6Ka i'amba i Bilihu, anano i Barake'eli, to Busi atuu, motae,
”Ongkue da mongura ka omiu mota'u komiumo;
onaemo pu'uno mokoko'iiku ka doito mompau pohaweku ndi omiu.
7Pinewowoloku: Po'ineeomo anu tende ntinuwu mepau,
ka anu tehineomo ituwu mompopau ponto'ori.
8Sine penaa anu i larono mia,
ka penaa-Do Anu Tedoa Pabawa, onaemo anu moweeakono ponto'ori.
9Komba butu mia anu tende tinuwuno anu hinao ponto'ori,
komba butu mia anu mota'uomo anu monto'ori moleoa.
10Onaemo pu'uno ka kupotae: Ronge akumo,
ongkue mbo'u aku mompau pohaweku.
11To'oriomo, kusikoriomo paumiu,
kupenootio pompewowolomu,
ranta ka impohawe pau anu kona ntu'u.
12Ndi omiumo kupomperorohi,
sine menteeano, nahina maupo te'asa mia anu mohawe tondonino nine i Ayubi sala,
nahina maupo te'asa mia i olomiu anu umewaio pinauno.
13Si mpotae: Mpohawe kamimo ponto'ori;
butu Ondae Ue Ala anu mokonangio, komba mia.
14Pauno komba te'aro ndi ongkue,
ka nahi aku sumangkiakono pinaumiu.
15Mebulalingo ira, nahi dompoko'ewaio mbo'u pinauno,
nahi dompokompepau mbo'u.
16Nde asalakono aku mesikori hangano nahi dompepau,
hangano ondae mpentade i ra'ai ka nahi dome'ewaio mbo'u pinauno?
17Ongkue mbo'u aku mompau pe'ewaku a tempo kuwineeako,
ongkue mbo'u aku pauo pohaweku.
18Hangano ongkue bukeako pau,
roso anu kongko a ngkoroiku dumadai aku.
19Menteeano, laro aroaku kana anggoro anu inonso,
kana kadu kuli wo'ohu anu lumpa.
20Asalakono aku mepau ka isanaa aroaku,
asalakono aku mepau ka umewaio pinauno.
21Nahi aku me'alaako maupo ndi sema
ka nahi aku umunde-undeo maupo isema,
22hangano nahi kuponto'ori mo'unde-unde;
tewala kanatuu, asalakono penaaku Ira ronga butao Anu Weweu aku.”
Currently Selected:
Ayubi 32: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
