Ayubi 31
31
I Ayubi mekorahako nine nahina salano
31:1-40
1”Moweweu akumo dandi a mataku,
kana'umpe ka aku mompekokoongako ana beine?
2Ka i'amba hapa tia anu tinantui-Do Ue Ala inso i wawono,
hapa tia pusaka anu pinakosi-Do Anu Tedoa Pabawa inso a mpo'ianga anu mantande?
3Kombake matea tiano mia anu molengku
ka urasa'o tiano mia anu moweweu mosa'o?
4Kombake Ondae Ue Ala anu kumitao pesalaaku
ka dumoao luwuno pelempaku?
5Tewala ongkue mewowaliako anu nahi mentee,
ke karuku dumaduo pompopo'oo,
6po'ineeomo kutinimba a mpotimbaa anu mentee,
ka Ira tumo'orio Ue Ala nine nahina salaku.
7Tewala pelempaku pansia inso a mpesalaaku,
ka aroaku tumondao pongkitano mataku,
saru mokoburu anu metako a ngkaeku,
8ka po'ineeomo hapa anu rinawoku, ikaano mia susua,
ka hapa anu tuwu tiaku po'ineeomo itebuta.
9Tewala aroaku ineheno a beine,
ka ongkue montowoki a mpewowano pe'asa miaku,
10ka po'ineeomo kombiaku mogiliakono mia susua,
ka po'ineeomo mia susua mewowaliakono.
11Hangano anu kanatuu onaemo poweweu mokoburu,
tendeano wineweu mosa'o anu tekona domehukuo puu mpobitara.
12Menteeano, onaemo atuu api anu montunu ka ipingko,
ka mokomo'aio luwuno hasiliku.
13Tewala nahi kuweeako ira tiado ataku tama ke beine,
tempono dompekara-kara saru ongkue,
14hapa anu ta wineweuku, tewala mentade Ira Ue Ala;
tewala moweweu Ira pomparesaa, hapake sangkiku ndi Ondae?
15Komba Ondaeke, anu weweu aku a laro mpe'anakaa, weweuo mbo'u mia atuu?
Komba asa koa mbo'uke anu weweu kami a laro mpe'anakaa?
16Tewala horio nahi kutondao po'ehedo mia mongkokolaro,
ka weweuo matano asa tuwu beine gagi mo'au-au,
17ke kaangaku kukaano asa-asaku,
sekono nana'ote nahina amano nahi petonda kumaano,
18kahinaano mompu'u imongura kupokolangkaio kana aasa ama,
ka mompu'u a mpe'anakaano ineno kutaateo,
19tewala kukitao mia mate hangano nahina sangkano,
ke mia mongkokolaro anu nahina hawu petutuwino,
20ka anu aroa nahi po'emaakune ronso,
hangano koroino nahi pesangkaako wulu bimbaku;
21tewala kutaangakono kaeku umewaio nana'ote nahina amano,
hangano a mpewowa langkai kukitao hinao anu mokowali aku,
22ka po'ineeomo wuku bose-boseku tepotola inso a oweaku,
ka kaeku pinudu inso a lindu-linduno.
23Hangano Ondae Ue Ala wela mokodoito aku,
ka nahina rosoku a maramba-Do.
24Tewala kunaao pompe'ala-alaku a wulaa,
ka mepau a wulaa: Omuemo pine'ala-alaku;
25tewala kupo'undeakono langkaino pompoliku
ka hangano kaeku mohawe arataa anu hadio ntu'u;
26tewala hori aku kumitao mata'oleo tempono ipewanta,
ka tekosino pelempano wula,
27ranta mo'ia-ia tepopandei aroaku,
ka mompohawe pewoo-woo ngkae ndi onae,
28ka mongkona atuu gagi mbo'u wineweu mosa'o
anu tekona domehukuo puu mpobitara,
hangano uhapu Iramo Ue Ala anu i wawono,
29Nde mo'unde akuke hangano urasa'ono anu umo'aliaakune,
ka meboo mo'unde tewala i aluo masolaa?
30Oo, nahi aku mo'ineeo wiwiku moweweu hala,
ka penaano tinuntuako mompau sumpa!
31Tewala mia a ngkemaku nahi dohori mpotae:
Isema anu nahi mowohiako pe'inahuno?
32Maupo mia mehawe nahi dohori mpewongi i bungkuno,
pewowaku ku'ungkahiako ira mia mpelakopi.
33Tewala kututuwio salaku kana mia susua
onaemo wunio salaku i laro aroaku,
34hangano doitoku a mia hadio
ka pontetewehido pe'etu mokontededengke aku,
onaemo ka kupenoro-noro ka nahi kupeluarako inso a mpewowa!
35Ha, bakanaano ka ihina anu merorongeakune!
Ndiomo tondoni ngkaeku! Po'ineeomo Anu Tedoa Pabawa sumangki aku!
Bakanaano ka ihina wunta pontuluri anu binurino ewaiku!
36Mentee ntu'u, wunta atuu aku tumembio,
ka aku pakeo kana ramba-ramba ulu.
37Sompo pelempaku aku pauako Ira,
gagi mia pinemota'u aku me'aro ndi Ondae.
38Tewala lereku mebooli hangano ongkue
ka pesalaano padekoku mpengese mperonga-ronga,
39tewala hasilino pingko kukaano ka nahi ku'owahio,
ka mokomasusa ira ueno,
40ka po'ineeomo komba gandu anu tuwu, sine ewo rui,
ka komba jelai, sine ewo lee.”
Tompa i ndi'ai luwuno pauno i Ayubi.
Currently Selected:
Ayubi 31: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
