Ayubi 30
30
Pontetewehi ka marasai anu pinembasaino i Ayubi
30:1-31
1”Sine kanandio-andio dompengingisiakune,
anu tinuwuno monguraopo sekono ongkue,
anu amano nahi kutarimao
tendeano ka ininaa saru dahu podagai bawaano bembe bimbaku.
2Ka mbo'u, hapa tuduno rosono kaedo ndi ongkue?
Pingkoomo rosodo.
3Memarasai ira hangano memakuraa ka mokoninggoa,
kumarasio wita anu motu'i,
a laro wongi-wongia i pada one anu londa.
4Ondae mpo'opu mala-mala ntahi inso i olono laro ewo,
ka hakano keu arari gagi kaangado.
5Ondae mensinaari inso i tonga-tongado palili,
ka mia mpebooliako ira kana mompebooliako puu mponako.
6Ondae asalakono mpo'ia a lembo-lembono anu mongkokongiri,
a laro aano wita ka olo-olono torukuno watu.
7A ntonga ngkura domperaaliki,
ondae mpebawaa a ntoto ewo rui.
8Ondaemo atuu mia mpe'ulu watu anu nahi tino'ori,
anu mensinaari inso a wita.
9Sine, kanandio-andio ongkue gagi powadi pasinggiri
ka popodeu-deuado.
10Domemokoburuakune ka me'olaiakune,
nahi dompokompeteao koroido ka dome'onuio rupaku.
11Hangano kolorono panaku pinotolaomo ka Dopokongkodei aku,
ondae mbo'u mpoweweu po'ehedo i aroku.
12I koanaku mpe'umbaako gerombola,
domengkaio karuku,
ka dompese'elungio sala mateaku;
13domebetao salaku ka me'ungkeakono tedontaaku,
nahi dompongkere anu tumulungi ira.
14Kana molalo rere watu anu tebansi malua domposapoi,
hawe nahi domperonga i tonga-tongano tehoaa.
15Mongkokongiria ku'inaluako,
marambaku pinepaneeako kana pinuurino angi,
ka tekaduduiaku tetadi kana seru.
16Onaemo pu'uno sumangaku tampula a ngkoroiku;
tempo marasaia mokodoito aku.
17I tempono wongi luwuno wukuku kana kinarasi,
ka pompemahaki anu meduhu nahi hori menaa-naa.
18Saru roso anu mongkokongiri Dosintakio sangkaku
ka Do'ini aku moroso a we'uno lemba meloeku.
19Dopepasiakunemo a laro rege,
ka kana akumo pampawu ka awu.
20Mebooli aku mepetulungi ndi Omiu sine nahina sangki-Miu;
mentade aku mesikori sine nahi Iperio aku.
21Omiu gagi lambaha ndi ongkue,
Isapoiakune rosono kae-Miu.
22Itande aku a wawo angi, tumadi aku
ka mokotampula aku a laro angi mokora.
23Oo, kuto'orio: Iwawa aku a matea,
te'aro a mpo'ianga anu tinantui luwuno anu tuwu.
24Menteeano, menteeke mia nahi ta motiio kaeno a anu tebangku,
tewala onae mebooli mepetulungi a laro urasa'ono?
25Kombake pengeseku tiano mia anu membasaio oleo masukaraa?
Kombake aroaku mompemasusa hangano mia mongkokolaro?
26Sine, tempono kupomperorohi anu moiko, mosa'oa anu hawe;
tempono kuponsikori mewine, wongi-wongia anu hawe.
27Laro aroaku mondende ka nahi hori rodo,
luwuno oleo marasaia konaomo a ngkoroiku.
28A laro pompemasusa, nahina mokulano mata'oleo, ongkue melakopi;
mentade aku i tonga-tongano bawaa saru mebooli mepetulungi.
29Gagi akumo pepaekompodo serigala,
ka walido manu-manu unta.
30Kuliku gagi mo'ito ka tekulisi,
luwuno wukuku mokari hangano mokula.
31Unino katapiku gagi ponsabangi,
ka puurino siloliku kana suarano mia mengese.”
Currently Selected:
Ayubi 30: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
