Ayubi 29
29
Marambaa anu i ndi'ipua ka marasaia anu kanandio-andio
29:1-25
1I Ayubi motilaloakono pau potundaano,
2”Ha, po'ineeomo ka kukana a wula anu lalo,
kana a oleo tempono Dodagai aku Ue Ala,
3tempono hulu-Do mewanta a wawo uluku,
ka i totono mewine-Do kupelempa a laro wongi-wongi.
4Kana tempono kupembasaio pompoliku,
tempono Ondae Ue Ala meronga saru ongkue a laro ngkemaku;
5Tempono da Dokongkomi aku Anu Tedoa Pabawa,
ka luwuno anaku mekongko i horiku;
6tempono luwuno pelempaku medoloako susu baku,
ka torukuno watu mowaao korono lana umpeda ndi ongkue.
7Tempono kupeluarako a mpewowa langkaino kota,
ka mo'ala mpentoroaku a ntanalapa,
8luwuno mia mongura kumita aku ka do'amba mposuka
ka luwuno mia anu tende ntinuwu iramo ronga mpentade;
9anu langkai potorodo mpenaa-naa mpepau,
metompoakono kae ngangado;
10suarado mia pinemota'u tetadi,
ka elodo metako a langirado.
11Tewala biri moronge mongkona ongkue, ipauo ongkue me'ura;
ka tewala mata mongkita, onae gagi sakosiiku.
12Hangano ongkue mongkadudui mia marasai anu mebooli mepetulungi,
ka nana'ote nahina amano anu nahina tumulungio.
13Ongkue mohawe pau poronso inso a mia anu ilawu mate,
ka aroano asa tuwu beine kupokowawongkoo.
14Ongkue mesangkaako menteea
ka moleoa kupokonao kana lemba meloe ka peboo ulu.
15Ongkue gagi matano mia morawu,
ka karuno mia pungku.
16Ongkue gagi amano mia mongkokolaro,
ka kara-karado mia anu nahi kuto'orio, kupepenteeo.
17Aseno mia molengku kupuroo,
ka rumontuo rinakono inso a ngisino.
18Kupewowoloo: Aku mate a nsenoku,
ka mokohadio oleo tumuwuku kana one.
19Hakaku mohawe uwoi,
ka tontoru mewongi i wawono luwuo sampaku.
20Marambaku wo'ohu mpiha ndi ongkue,
ka panaku wali moroso a ngkaeku.
21Mia mpesisikori ira mperorongeakune,
ondae mperodo-rodo mperorongeakono patuduku.
22Umariku mepau nahina mbo'u maupo te'asa mia mepau,
ka pauku te'iti ndi ondae.
23Mia mensikori aku kana monsikori usa,
ka mentineo ngangado kana montine usa a poko'ariano tempo.
24Kukomoo-mooako ira tempono nahina pompe'osaiado,
ka wantano rupaku nahi dompokowurao.
25Ongkue tumantuio salado ka mentoro gagi petewawa;
ongkue mentoro a ngkadera poparentaa kana mokole i tonga-tongano puu mpetea,
kana asa mia tumarero ira anu mpo'inombo.”
Currently Selected:
Ayubi 29: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
