Ayubi 3
3
Pinemasusano i Ayubi
3:1-26
1 #
Yer. 20:14-18
Umarino atuu i Ayubi mepau ka itotonaao oleo hinaano. 2Motae i Ayubi,
3”Po'ineeomo ka nami teto'ori oleo hinaaku
ka wongi anu pauo: Asa ana ntama hinaomo a laro mpe'anakaa.
4Po'ineeomo oleo atuu gagi wongi-wongia,
siimo Doperioo Ue Ala anu i wawono,
ka siimo ipansario wantano mewine.
5Po'ineeomo wongi-wongia ka wongi mpusu tumuntuo oleo atuu,
seru mpe'api-api borungio,
ka wongi ntonga'oleo mokontededengkeo.
6Wongi atuu, po'ineeomo ipabawaio wongi-wongia;
siimo imawongko a luwuno oleo i larono asa nta'u;
siimo itewinso a doano luwuno wula.
7Oo, po'ineeomo ia wongi atuu nahina anu me'ana,
ka nahina teronge mawongkoa.
8Po'ineeomo dometutundalio puu pontotonaa oleo,
ondae anu mempande mpokotesingkao tekudano i Lewiata.
9Po'ineeomo luwuno anano wula umpeda meene gagi wongi-wongi;
po'ineeomo iponsikori mewine anu nahi hori hawe,
siimo ipongkita tebosino towea,
10hangano nahi tondoo pewowano pe'anakaano ineku,
ka nahi winuni masusaa inso a mataku.
11Tembio nahi kumate tempono kupine'anaako,
ke mate tempono kupeluarako inso a mpe'anakaa?
12Tembio ka itarima aku pe'awia,
tembio ka ihina uo, ranta ka kupokompo'uo?
13Tewala naahi, ongkue kanandio-andio mepombole ka rodo;
ongkue tekoturi ka menaa-naa
14saru luwuno mokole ka puu mpompatudu i tolino,
anu wali montadeo howuno anu terawo tiano koroino;
15ke saru anu langkai potorodo anu hinao wulaano,
anu rahano ibuketiakono salaka.
16Ke tembio ongkue nahi kana anadalo te'onini, anu winuni,
kana nana'ote kodei anu nahi pongkita mewine?
17I ra'aimo mia mosa'o gauno ipenaa-naa moweweu marisua,
i ra'aimo dompenaa-naa mia anu pingko rosodo.
18Luwuno anu mentinawa mperonga-ronga gagi rodo,
nahi domporonge mbo'u pau pompokonsii.
19Mia kodei ka mia langkai kongko i ra'ai,
ka ata tolaomo inso a ueno.
20Tembio mewine ka domewineeako anu mpe'isei,
ka tuwu a anu mahaki aroa,
21 #
Meng. 9:6
anu monsikori matea anu nahi hori hawe,
anu lumuluo laluaopo sekono arataa anu tetano;
22anu mpo'unde a laro mpo'unde-undea,
mawongko tewala mpohawe ira kaburu.
23Tembio tuwu ka iwineeako tama anu salano tewuni,
anu Dokaduo Ue Ala?
24Hangano euno rotiku onaemo pinemasusa,
ka masusaku te'uwu kana uwoi.
25Menteeano, anu kudoitoakono umalu aku,
ka anu kusalalaroakono humawe aku.
26Nahi kupohawe rodoa;
nahi kupokompo'ia-ia, sine salalaro anu saaba.”
Currently Selected:
Ayubi 3: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
