Ayubi 2

1I asa oleo me'aiwa ira ana nsuruga mpe'aro ndi Ondae i Ue ka i olodo aiwa mbo'u i Mosa'o ta me'aro ndi Ondae i Ue. 2Ondae i Ue mesikeno ndi Mosa'o, ”Inso isuake omue?” Sumangki i Mosa'o ndi Ondae i Ue, ”Inso a mpelempaa metanggolili sumompoo tolino.” 3Pau-Do i Ue ndi Mosa'o, ”Nde upoposooke tetenaa-Ku i Ayubi? Menteeano, nahina maupo te'asa mia i tolino kana onae, anu moroso kanatuu pompe'ala-alano ka moleo aroano, anu dumoitoako Ira Ue Ala ka olaiakono wineweu mosa'o. Onae metenunu mpiha a laro pompe'ala-alano, maupo u'olua-Kune umewaio ka imasola nahina pu'uno.” 4Sumangki i Mosa'o ndi Ondae i Ue, ”Kuli me'eu kuli! Mia ta meweengakono luwu anu pine'ueno euno penaano. 5Sine, Ipotiiomo kae-Miu ka ipokomahakio wuku ka ihino, manasa itotonaa Komiu i aro-Miu.” 6Pau-Do i Ue ndi Mosa'o, ”Moikoomo, onae a laro mpabawamu, polo si oninio penaano.” 7Ka i'amba i Mosa'o lumako inso i aro-Do i Ue ka i'aluakono kamba anu moboo i Ayubi inso a mpelengkaruno hawe a ntoro uluno. 8Ka i'amba i Ayubi umalao asa nsiba pehano tami gagi pekaru-karuno a ngkoroino ka ipentoro a ntonga awu.

9Kombiano motaeakono, ”Da ta kongko mpihake morosono pompe'ala-alamu? Totonaa Iramo Ue Ala ka matemo!” 10Sine sumangki i Ayubi ndi onae, ”Omue mepau kana beine monge-monge! Nde inehetoke montarima butu anu moiko inso ndi Ondae Ue Ala, sine nahi tobehe montarima anu nahi moiko?” I larono luwuno atuu i Ayubi nahi tehalaako wiwino.

11Otolu ira sambe'eno i Ayubi merongeo mongkona luwuno urasa'o anu umaluo, ka do'amba me'aiwa singe mia inso a mpo'iangado. Ondae onaemo i Elipasi, to Temani, ka i Bilidadi, to Suahi, saru i Sopari, to Na'ama. Ondae ntepo'asa ira a masusano ka mentareroo. 12Mansado mengkitao inso olai, nami domento'orio mbo'u. Ka do'amba mpengese meroku, meberio lemba meloedo ka mporawo awu a wawo uludo kontahane i langi. 13Ka do'amba mpentoro saru onae a wita i larono opitu oleo ka opitu wongi. Nahina maupo te'asa mia anu mepau te'asa mpudu pau ndi onae, hangano domengkitao tedoa mobea pompemarasaino.

Currently Selected:

Ayubi 2: XMZ

Highlight

Copy

Compare