Ayubi 28
28
Mia nahi domehaweo ponto'ori
28:1-28
1”Mentee ntu'u, hinao po'iangado mia mpo'ala salaka
ka po'iangado mia mompuehi wulaa;
2labu kineke inso a laro wita,
ka mala pinokolono inso a watu.
3Mia umariakono wongi-wongia,
ka watu iparesao hawe a ondaloano ntu'u,
a laro wongi mpusu.
4Mia mpokeke po'alaa hasilino wita olai inso a mpo'ianga,
ondae domengkolupe ira mia anu mpelempa i wawono,
ondae ntendoe-ndoe ka tesoe-soe olai inso a mia.
5Wita anu mehasiliako kaanga,
rinongka-rongka i totono kana kinaano api.
6Watuno onaemo pohawea lasuradi
anu i larono hinao wulaa urai.
7Sala lumako iraane nahina tumo'orio maupo te'asa manu-manu mpongkaa bau,
ka nahi kitao matano singko.
8Kondehora lambaha nahi pelandaakono karuno i ra'ai
ka nahi telaloio singa.
9Mia umanggaakono kae watu anu motea,
irongka-rongka ira torukuno hawe a luwuno hakano.
10A laro ntorukuno watu ikekeo bolo,
ka matano kumitao luwuno anu masuli olino.
11Uwoi a ngkorono anu meluarako ibuntoo,
ka hapa anu tewuni iwawao a mewineano.
12Sine isua pohawea ponto'ori,
isua po'iangano pinewowolo molino?
13Sala lumako iraane nahi domento'orio mia,
ka nahi hinawe a witado mia mentuwu.
14Ipotae tahi malua: Onae komba i laroku,
ka tahi motae: Onae nahi kongko ndi ongkue.
15Gagi euno nahi petoto butu wineeako wulaa mpena,
ka olino nahi pinokotimbaako salaka.
16Onae nahi pinokorekeako wulaa Opiri,
ke maupo saru paramata kerisopara anu masuli olino ke saru paramata lasuaradi;
17olino masuliopo sekono wulaa ka tami,
ke maupo tinobosiako peramba-ramba inso a wulaa motu'a.
18Moiko kerabu maupo kerisita, nahi tewinso mbo'u a mporekea;
mompekaria ponto'ori moikoopo sekonopo mutiara.
19Paramata kerisoli Etiopia nahi polio mengkenaakono,
onae nahi pinokorekeako wulaa ntu'u.
20Ponto'ori atuu, isuake insoano,
ka pinewowolo molino, isuake po'iangano?
21Onae tetutuwi inso a matado luwuno anu tuwu,
tamoako tewuni a manu-manu i laro meene.
22Tampulaa ka matea motae:
Butu lele nahi manasa anu hawe a birimami.
23Ondae Ue Ala tumo'orio sala lumako i ra'ai,
Ondae koa mbo'u tumo'orio po'iangano.
24Hangano Ondae mengkita hawe a luwuno tompano tolino,
ka kumitao luwuakoano anu hina i totono langi.
25Tempono Dopakosio mokorano angi,
ka umatorao hadiono uwoi,
26tempono Doweweuo pakosino mongkona usa,
ka pesalaano koliki ka rundu,
27i tempomo atuu Dokitao ponto'ori ka paleleo.
Ondae mbo'u pakosio, maupo paresao.
28 #
Pud. 111:10; Pow. 1:7; 9:10 Sine a mia mepau Ira:
Menteeano, doitoako Ira i Ue, onaemo ponto'ori,
ka olaiakono wineweu mosa'o onaemo pinewowolo molino.”
Currently Selected:
Ayubi 28: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
