Ayubi 27
27
Nahina pomperorohino mia mosa'o gauno
27:1-23
1I Ayubi motilaloakono mbo'u luwuno pau potundaano,
2”A nee-Do Ue Ala anu tuwu, anu nahi pompowee moleoa
ka nee-Do Anu Tedoa Pabawa anu mokomasusao aroaku,
3ba da kongko penaaku ndi ongkue,
ba da kongko penaa-Do Ue Ala a laro engeku,
4wiwiku nahi ta mompau pegaupi,
ka eloku nahi ta moluarako pegaupi.
5Naahi ntu'u aku mokomentee komiu!
Maupo ranta mate aku kongko komorahakono nine nahina salaku.
6Menteeku ku'inio moroso ka nahi kupotolao;
aroaku nahi tetewehi aku maupo te'asa oleo inso a ntinuwuku.
7Po'ineeomo iwaliku gagi kana mia mosa'o gauno,
ka mia anu umewai aku kana mia anu molengku.
8Hangano, hapake pomperorohiano mia umewa,
tewala Dopokotampulao Ue Ala, tewala Do'alao penaano?
9Nde Ondae Ue Ala Ira rumongeoke peboolino
tewala ma'isoa umaluo?
10Polioke onae mesana-sanaa hangano Anu Tedoa Pabawa
ka mebooli ndi Ondae Ue Ala sompo tempo?
11Aku paguruakomiu mongkona kae-Do Ue Ala,
tinoo-Do Anu Tedoa Pabawa nahi aku wunio.
12Menteeano, luwumiu imengkitaomo liomiu;
tembio ka impepau anu nahina pengkonaano?
13Ndiomo tiano mia mosa'o gaudo anu Dopakosio Ue Ala
ka tia pusakano mia lambaha anu tinarimado inso ndi Ondae Anu Tedoa Pabawa:
14tewala anano tetiangi hadio ira megagi kaangano ponai,
ka inuleno nahi ta sompo kaangado;
15isema anu tola inso ndi onae, ta kinaburu hangano haki lele,
ka nahi dompengesei ira tuwu beinedo.
16Tewala onae mopumpu doi kana pampawu hadiono,
ka mohowu sangka kana wita pulu,
17maupo onae anu humowuo, sine mia mentee anu ta pakeo,
ka doi atuu ira mpetia-tiao mia anu nahina salano.
18Raha anu winanguno kana inenano kaangga,
kana laika anu wineweuno puu mpodagai.
19Kana mia mompoli ipomboleo koroino, sine nahi ta wali weweuo:
mansano wileo matano, luwuno nami hina mbo'u.
20Mongkokongiria lumuluo kana lolowi,
tempono wongi ipeneeakono angi mokora.
21Angi i sabaano oleo tumandeo ka onae moliuomo,
onae pinetadiako inso a mpo'iangano.
22Onae pinepasiako nahina pompehohawa,
onae asalakono mompari-pari mepotola inso a ngkae-Do.
23Mia montopa hangano onae,
ka mpomansu-mansu hangano onae inso a mpo'iangano.”
Currently Selected:
Ayubi 27: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
