Ayubi 22
22
Po'emano i Elipasi ka itepidi i Ayubi
22:1-30
1Ka i'amba i Elipasi, to Temani, sumangki,
2 #
Ayb. 35:6-8
”Nde mentuduke mia ndi Ondae Ue Ala?
Naahi, mia anu molino pinewowolono butu mentudu a ngkoroino onaeno.
3Nde hinaoke tuduno ndi Ondae Anu Tedoa Pabawa, tewala omue mentee,
ke urano, tewala omue tuwu moleo?
4Nde hangano doitomuke ndi Ondae Ue Ala, onaemo ka Dohukuko,
ka wawako a mpebitaraa?
5Kombake langkai wineweumu anu mosa'o
ka sala mpelelumu nahina pokotompaano?
6Hangano, po'ehemumo koa montarima pogade inso a mpepaekompomu,
ka morontu sangkado mia mongkokolaro;
7mia anu mokoranga nahi upopo'inuakono uwoi,
ka mia anu mokoninggo nahi upakao.
8Tendeano mia anu moroso anu mpope'ue wita,
ka mia anu inondaha anu mpetorokio.
9Mia tuwu beine utena ira melako mooa ngkae,
ka tokiano elu-elu upiregoo.
10Onaemo pu'uno ka ilimbuko pompete'umala,
ka mongkokongiria mepobingko modengkeko.
11Wongi-wongia weweuko nahi upokompongkita
ka mowo sumampuko.
12Kombake Ondae Ue Ala i langi anu mantande?
Kita iramo anano wula anu lalu mantande, mantande ntu'u!
13Sine upewowoloo: Hapa tino'ori-Do Ue Ala?
Ira polioke mompau kara-kara inso i asambalino seru anu wongi-wongi?
14Seru mokapa tumutuwi Ira, ranta nahi Dopokompongkita;
Ondae melempa-lempa tumondao longkuno langi!
15Nde inehemuke kongko tumondao sala nse'elu,
anu tinondado mia mosa'u gaudo?
16Ondae atuu mia anu mempinongko'ala iramo napi tempono,
anu empehino ipolomoo korono.
17Ondae atuu mpepau ndi Ondae Ue Ala, ”Olaimo inso ndi omami!”
ka ”Anu Tedoa Pabawa mokompoweweu hapa ndi omami?”
18Kahinaano Ondaemo anu mokobukeakono rahado luwuno anu moiko,
sine tinoodo mia mosa'o gaudo olai inso ndi ongkue.
19Mia mentee kumitao mongkona atuu ka mo'unde;
mia anu nahina salano pasinggiri ira:
20Mentee ntu'u, anu umewai kami pinokotampulaomo,
ka binintado pingkoomo ikaano api.
21Pesintuwuako Iramo ka urodo;
ba kanatuu komohawe me'uraa.
22Tarimaomo hapa anu ipaguruakomu nganga-Do,
ka naaomo pau-Do i laro aroamu.
23Tewala tepidiko ndi Ondae Anu Tedoa Pabawa ka me'urumako;
tewala upoko'olaio molengkua inso a ngkemamu,
24tumadio labano wulaa a laro pampawu,
wulaa Opiri a olo watu ngkorono,
25ka i'amba Ondae Anu Tedoa Pabawa gagi wulaamu,
ka howuno salakamu,
26ka menteeano komesana-sanaa hangano Ondae Anu Tedoa Pabawa,
ka komentombu ndi Ondae Ue Ala.
27Tewala mekakaiko ndi Ondae, Ira Uminduo pekakaimu,
ka omue ko'umowahio pontangamu.
28Tewala upakosiomo hinao ta wineweumu, asalakono mehasili,
ka mewine wantahio luwuno pesalaamu.
29Hangano Ondae Ue Ala mokongkodeio mia anu mompelangka-langkai,
sine kumaduduio mia anu mauru!
30Mia anu nahina salano Dopotolao:
omue kotola hangano nahi mokoburu kaemu.”
Currently Selected:
Ayubi 22: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
