Ayubi 21
21
Pohaweno i Ayubi mongkona urano mia mosa'o gauno
21:1-34
1Sine sumangki i Ayubi,
2”Perorongeakono temoiko pauku
ka po'ineeomo atuu gagi tareromu.
3Imensabaramo saru ongkue, aku mepau;
umariku mepau moikoomo impopasinggiri.
4Nde a miake te'aroano pompemasusaku?
Tembio ka nahi moiko kutekuda?
5Impepokulemo ndi ongkue, asalakono komiu mengkohali-hali,
ka ngangamiu imetompoakonomo kae!
6Tewala kupewowoloo, gagi aku doito,
ka mondidi-ndidiomo koroiku.
7Tembio mia mosa'o gauno ka ikongko tuwu,
gagi mota'u, tendeano tepahe moroso?
8Inuledo kongko saru ondae,
ka ana'ue dompekakaako ira.
9Luwuno rahado nahina mososanggoli, ka nahina doitoa,
pontunduhi-Do Ue Ala nahi alu ira.
10Sapido anu lakino mpomalii moiko,
sapido anu waino mpe'ana ka nahi tewunsuli.
11Anado mempino'inee mpeluarako kana bawaano bembe bimba,
anado mpelonso-lonso.
12Ondae mpenani-nani tinondaako rebana ka katapi,
ka memawongko montonda unino siloli.
13Domepingkoo tempodo a laro manangaia,
ka rodo aroado mpetii a mpo'iangado mia mate.
14Sine dompotae ndi Ondae Ue Ala: Olaimo inso ndi omami!
Nahi kimebehe mento'ori ira pesalaa-Miu.
15Isemake Anu Tedoa Pabawa atuu ranta omami asalakono mpesomba ndi Ondae,
ka hapa tuduno ndi omami, tewala kami mpo'ema ndi Ondae?
16Mentee ntu'u, manangaido komba a ngkaedo ondaedo!
Tinoodo mia mosa'o gaudo olai inso ndi ongkue.
17Mararu ntu'u ipinepate huludo mia mosa'o gaudo,
urasa'o umalu ira,
ka pompemahaki Dotiaako ira Ue Ala a laro ntekuda-Do!
18Ondae megagi kana seami i arono angi,
kana ota anu ipaneeo angi mokora.
19Dompotae mia, ’Salano Donaao Ue Ala tiado anano.’
Sine po'ineeomo onaeno mia atuu anu Dohukuo Ue Ala,
ka itelike.
20Po'ineeomo matano onaeno kumitao mateano,
ka onaeno uminuo tekuda-Do Anu Tedoa Pabawa!
21Hangano pombiono merioo somborino umarino mate,
tewala pingkoomo tempono?
22Polioke mia paguruako Ira Ue Ala ponto'ori,
ndi Ondae anu bitara ira a po'ianga-Do mantande?
23Anu asa mia mate da bukeako roso,
saru rodo ka nahina masusaa;
24tongano bukeako taba,
ka unto wukuno napi moboo.
25Anu susua mateako mahaki aroa,
nahi hori mompembasai anu moiko.
26Sine ondae meronga-ronga tepombole a laro pampawu,
ka wingo mpehowu i wawodo.
27Menteeano, kuto'orio pinewowolomiu,
ka akala anu tinoomiu ndi ongkue.
28Impotae: Isua rahano anu pabawa?
Isua kema po'iangado mia mosa'o gaudo?
29Napi horike mpesikeno a mia anu mentelalo a nsala?
Komiu mpokohapuoke luwuno pontisodo,
30nine mia lambaha tepekaria a oleo matea,
ka kinadudui a oleo tekuda-Do Ue Ala?
31Isema anu ta tetutu tumuntuo peleluno,
ka humukuo wineweuno?
32Onae winawa a ngkaburu,
ka kaburuno domedagaio mia.
33Batu-batuno wita i lembono mokorodoo;
sompo mia tumondao,
ka anu mese'elungio nahi pinokopau hadiono.
34Nahina ntu'u pengkonaano pontareromu ndi ongkue!
Luwuno sangkimu pe'akala mpena!”
Currently Selected:
Ayubi 21: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
