Ayubi 20
20
Pohaweno i Sopari mongkona urano mia mosa'o gauno
20:1-29
1I Sopari, to Na'ama, sumangki,
2”Onaemo pu'uno luwuno pinewowoloku mokomosia aku sumangki,
hangano aroaku nahi sabara mbo'u.
3Kurongeo pekuahako anu tumetewehi aku,
sine penaa anu mompowee ponto'ori moweeakune sangkino.
4Napi uto'orioke mongkona andio mompu'u i ndi'ipua,
mompu'u ininaa mia i tolino,
5nine maroano mpeboolido mia mosa'o gaudo butu sarai,
ka mawongkodo mia bunto butu asa mpiniro?
6Maupo pompelangka-langkaino mewuatako i langi
ka uluno modanggi seru,
7sine kana ta'ino ta mate ranta nahina tampulaano;
isema anu hori kumitao, mesikeno: Isua onae?
8Kana mo'ipi ipenee tetadi, nahina hangano,
moliu kana pongkita tempono wongi,
9Onae nahi tengkita mbo'u a matado anu mengkitao,
ka po'iangano nahi kitao mbo'u.
10Luwuno anano asalakono mpo'ungke pompehohawado mia mongkokolaro,
ka asalakono kaeno onaeno mokuleo pompolino.
11Luwuno wukuno moiko ibuke rosono mia mongura,
sine roso mbo'u atuu ta mepombole saru onae a laro pampawu.
12Maupo ipenamio wineweu mosa'o mo'ahi a laro ngangano,
maupo iwunio a ntoto elono,
13memo'ahio saru nahi potolao,
ka inaao a langirano,
14sine kaanga a laro kompono ta bali,
gagi ipono ule mo'ito i larono.
15Arataa iteleo, sine iluao mbo'u;
Ondae Ue Ala lumuarakono inso a laro kompono.
16Ipono ule mo'ito ta umosoo,
elono ule ta mepateo.
17Onae nahi moiko ikita ira pesalaano uwoi
ka luwuno korono anu mompowaa siu hoani ka susu baku.
18Onae asalakono mokuleo hapa anu hinaweno maupo nahi penamio;
onae nahi perapio pompolino hasili pebalu-baluno.
19Hangano ipokonsii iramo mia mongkokolaro, ka binta ira nahina po'iangado;
irontuo raha anu komba winanguno.
20Menteeano, onae nahi ponto'ori rodoa i laro aroano,
ka onae nahi ta tekaduduiako arataano.
21Nahina anu tola inso a ngkinaano,
onaemo pu'uno urano nahi ta mo'ia mpiha.
22A laro mare'eno anu tedoa hadio i'aluo marasai;
onae i'aluo masusaa anu mongkokongiri ntu'u.
23Ta umihiio kompono,
Ondae Ue Ala mompotola tekuda-Do ndi onae anu tensila,
ka weweuo atuu kana usa ndi onae gagi kaangano.
24Onae ta mokotola inso a mparewa mpetea labu,
sine pana mala lumompahio.
25Ana mpana atuu tebuta ka meluarako inso a bungkuno,
mata mpana anu mangkilo atuu meluarako inso a upeuno:
onae gagi mongkokongiri.
26Wongi-wongia butu tepatinda tiano,
onae ikaano api anu nahi pinuuri ka pingkoo hapa anu tebinta a laro kemano.
27Langi mosabao salano,
ka tolino mentade umewaio.
28Hasilino inanggano anu kongko a rahano winawa,
luwuno pingko a oleo tekuda-Do.
29Onaemo pohuku-Do Ue Ala a mia anu mosa'o gauno,
tia pusaka anu dinandi-Do Ue Ala ndi onae.”
Currently Selected:
Ayubi 20: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
