Ayubi 19
19
Pompe'ala-alano i Ayubi mongkona pe'alaako-Do Ue Ala ndi onae
19:1-29
1Ka i'amba sumangki i Ayubi,
2”Hawe te'ipia mbo'u impokomahakiakune aroaku,
ka bobarasaiakune pau?
3Kanandio-andio pempulumo imentata aku,
nahi mokoko'iimiu bobarasai aku.
4Tewala mentee ntu'u tesaa aku,
ongkueku anu tumembio tesaaku atuu.
5Tewala mentee ntu'u moiko komiupo sekono ongkue,
ka pakeo tataaku gagi tondonino a ngkoroiku,
6to'oriomo nine Ondae Ue Ala moweweu Iramo nahi moleo ndi ongkue,
ka metendeakono buani-Do ndi ongkue.
7Menteeano, mebooli aku: Lambaha! Sine nahina anu sumangki.
Mebooli aku mepetulungi, sine nahina moleoa.
8Pesalaaku Do'onsoiakono rere watu, ranta nahi kupokontelaloio,
ka luwuno pesalaaku atuu Doweweuo wongi-wongi.
9Marambaku Dolohuomo
ka rumontuo ramba-ramba a uluku.
10Dorongka aku tiku-tiku, ranta ka kulako,
ka pomperorohiku Dobutao kana keu.
11Tekuda-Do tensila ndi ongkue,
ka Doreke aku kana ewai-Do.
12Puu mpetea-Do mperonga domelako,
sala dome'onsoio umewai aku,
ka do'amba mengkaduo kemaku.
13Pepaekompoku Dopoko'olai ira inso ndi ongkue,
luwuno tepoto'oriku nami domento'ori aku.
14Pe'etuku mpeliahako,
ka luwuno wali-waliku mengkolupe aku.
15Ondae anu mpo'ia i rahaku ka ataku beine
mereke aku mia anu nahi domento'orio,
domengkita aku kana mia susua.
16Tewala kupoboio ataku, onae nahi sangki;
asalakono kupopandeio mepauakono.
17Penaaku imokoburuakono kombiaku,
ka ongkue mokokowueredo pepaekompoku.
18Maupo nana'ote mbo'u mentetewehi aku,
tewala mentade aku, domempasinggiri aku.
19Luwuno pewali-wali morosoku mokokowueredo ndi ongkue;
ka ondae anu pinehohawaku mpewolili umewai aku.
20Wukuku metako a ngkuli ka ihiku,
ka langirakumo koa anu tebinta ndi ongkue.
21Impehohawa akumo, impehohawa akumo, hei luwuno sambe'eku,
hangano i'alu akumo kae-Do Ue Ala.
22Tembio ka imelampui aku kana-kana Ondae Ue Ala,
ka nahi memowohiakono ihiku?
23Ha, po'ineeomo ka ibinuri pauku,
binuri a wunta,
24tepa'oako labu ponggori ka tima
a ntorukuno watu ranta nahina tampulaano!
25Sine kuto'orio Puu Pontolosiku Tuwu Ira,
ka poko'ariano Ira mewangu inso a wawo pampawu.
26Ka umarino masola kuliku,
maupo nahina ihiku aku kumita Ira Ue Ala.
27Ongkueku kumita Ira me'alaako ndi ongkue;
mataku isa'a sumakosii Ira ka komba mia susua.
Aroaku masusa hangano tekewoi.
28Tewala mpotae komiu: Kami metuntuo
ka mehaweo ndi onae hangano kara-karano,
29ka imedoitoakono ponai,
hangano tekuda mohaweako pohuku ponai,
ka imento'orio nine hinao puu mpobitara.”
Currently Selected:
Ayubi 19: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
