Ayubi 1

Pesombano ntu'u i Ayubi inarahako

1:1–2:13

1Hinao asa tama i wita Usi meneeako i Ayubi. Mia atuu moroso pompe'ala-alano ka moleo aroano, doitoako Ira Ue Ala ka olaiakono wineweu mosa'o. 2Onae hinao anano opitu tama ka otolu ira beine. 3Onae hinao bawaa bembe bimbano pitu nsowu, unta tolu nsowu, sapi lima nsowu pasa, kalide waino lima etu ka tedoa hadio atano. Onae mia anu lalua mompoli i olodo luwuno mia i sabaano oleo.

4Luwuno anano anu tama wela ira mpe'eu-eu mpoweweu gawe i rahado asa mia ka asa mia ka otolu ira pepaekompodo beine me'inolu mpongkaa ka mpo'inu meronga ondae. 5Sompo umarino oleo pogawea, i Ayubi moboi ira ka mokomempori ira. Tisomono mo'oru, i Ayubi mewangu ka mompesombaako pesomba tinunu menunu saru hadiodo, hangano ipewowoloo, ”Bara'ura anaku mpoweweu iramo hala ka domentotonaa Iramo Ue Ala i laro aroado.” Kanandiomo iwela weweuo i Ayubi.

6I asa oleo me'aiwa iramo ana nsuruga mpe'aro ndi Ondae i Ue ka i olodo aiwa mbo'u i Mosa'o. 7Mesikeno Ira i Ue ndi Mosa'o, ”Inso isuake omue?” Sumangki i Mosa'o ndi Ondae i Ue, ”Inso a mpelempaa sumompoo tolino.” 8Ka Do'amba mesikeno i Ue ndi Mosa'o, ”Nde upoposooke tetenaa-Ku i Ayubi? Menteeano, nahina maupo te'asa mia i tolino kana onae, anu moroso kanatuu pompe'ala-alano ka moleo aroano, anu dumoitoako Ira Ue Ala ka olaiakono wineweu mosa'o.” 9#Meng. 12:10Sumangki i Mosa'o ndi Ondae i Ue, ”Nde maupo nahi pohawe hapa-hapa i Ayubi doitoako Ira Ue Ala? 10Kombake Omiu anu moweweu wala lumimbuo ka somborino saru luwuno anu pine'ueno? Hapa anu inanggano Ironsoomo ka hapa anu pine'ueno koteti-tetiangino i wita atuu. 11Sine, Ipotiiomo kae-Miu ka rumopuo luwuno anu pine'ueno. Manasa itotonaa Komiu i aro-Miu.” 12Pau-Do i Ue ndi Mosa'o, ”Kanandio-andio, anu pine'ueno kongko a ngkaemu; butu si potiio kaemu ndi onae.” Ka i'amba lumakoomo i Mosa'o inso i aro-Do i Ue.

13I asa oleo, tempono luwuno anano tama ka beine mpongkaa ka mpo'inu anggoro a rahano pepaekompodo anu aka, 14haweomo asa mia tinena ndi Ayubi ka ipotae, ”Tempono sapi kontongaano mompadeko ka kalide waino mpongkaa ewo i asambalino, 15mehawe iramo to Sieba mposapoi ka merontuo saru numangiako ira ponai puu mpodagaino. Butu asa-asaku anu tola, onaemo ka kupokopauo mongkona atuu ndi omiu ue.” 16Kontongaano mepau mia atuu, hawe mia susua ka ipotae, ”Mesilawiomo api inso i langi ka pingko itunuo bawaano bembe bimba ka luwuno puu mpodagaino. Butu asa-asaku anu tola, onaemo ka kupokopauo mongkona atuu ndi omiu ue.” 17Kontongaano mepau mia atuu, hawe mia susua ka ipotae, ”To Kasidimi mpoweweu otolu bawaa sorodadu, ka do'amba mensapoi ira unta ka merontuo saru numangiako ira ponai puu mpodagaino. Butu asa-asaku anu tola, onaemo ka kupokopauo mongkona atuu ndi omiu ue.” 18Kontongaano mepau mia atuu, hawe mia susua ka ipotae, ”Luwuno anamiu ue anu tama ka beine kontongaado mpongkaa ka mpo'inu anggoro a rahano pepaekompodo anu aka. 19Borono mepuuri opue inso i asambalino pada one ka i aluo raha atuu a opaa siuno. Raha atuu tebangku dumunsi ira mia mongura atuudo, ranta ka domemate. Butu asa-asaku anu tola, onaemo ka kupokopauo mongkona atuu ndi omiu ue.”

20Mentadeomo i Ayubi, berio lemba meloeno, ka kumeruo uluno, ka i'amba menggolontu ka mesomba. 21Ipotae, ”Kupeluarako kolambe-lambe inso a mpe'anakaano ineku, kolambe-lambe mbo'u kupekule i larono. Ondae i Ue anu mompowee, Ondae i Ue anu umalao, inunde-undeomo nee-Do i Ue!” 22I larono luwuno atuu i Ayubi nahi poweweu hala ka nahi tuluri Ira Ue Ala moweweu anu nahi tekona.

Currently Selected:

Ayubi 1: XMZ

Highlight

Copy

Compare