Ayubi 18
18
Pohaweno i Bilidadi mongkona mia mosa'o gauno
18:1-21
1Ka i'amba i Bilidadi, to Suahi, sumangki,
2”Te'ipiake umari upepau?
Telikemo, ka ki'amba mpepau.
3Tembio ka kimempinotaeako kondehora?
Tembio ka kimebenge-benge a pongkitamu?
4Omuemu anu beri-berio koroimu a laro ntekuda,
nde butu hangano omueke ka imansa pino'inee tolino,
ka torukuno watu mepahe inso a mpo'iangano?
5Maupo kana'umpe mewineno mia mosa'o gauno ta mate mewineno,
ka langano apino nahi mewanta mpiha.
6Mewine a laro ngkemano gagi wongi-wongi,
ka hulu i wawono mate.
7Pelempano anu mokora te'onsoi,
ka tinoono onaeno dumontaio.
8Hangano karuno onaeno tekaiakono a buani,
ka onae melempa a wawo ulono pompete'umala.
9Tundono ipokorakoo pompete'umala,
ka onae te'ontoako oho.
10Koloro nahi kitao a laro wita,
pompete'umala tina'oako a nsala anu telaoano.
11Mongkokongirino matea mokodoitoo isua-suamo koa,
ka lumuluo isuamo koa i pelempa.
12Masolaa mangidaakono,
matea mepatinda i horino.
13Kuli ngkoroino ikaano haki,
maupo asa ngkoroino ikaano haki mobea.
14Onae rinende inso a ngkemano, po'iangano ka irodo,
ka winawa a mokole matea.
15A laro ngkemano mo'ia hapa anu komba pine'ueno mbo'u,
i wawono po'iangano rinawoako walira.
16I totono mokariomo luwuno hakano,
ka i wawono moleuomo sampano.
17Rorambeano tampula inso i tolino,
neeno nahi pinau mbo'u a luwuno sala kodei.
18Onae sinaari inso a mewineano a laro wongi-wongia,
ka onae pinokotampula inso i wawontolino.
19Onae nahi ta hina ana ke ana'ue ka ana'ue ntukono i olono tongkuno,
ka nahina maupo te'asa mia anu kongko tuwu a mpo'iangano.
20A oleo mateado mia i Sumooano oleo ira mengkohali-hali,
ka mia i Sabaano oleo ta umalu ira doitoa.
21Mentee ntu'u, kanatuumo po'iangano mia anu molengku,
kanatuumo po'iangano mia anu nahi to'ori Ira Ue Ala.”
Currently Selected:
Ayubi 18: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
