Ayubi 15
15
Pohaweno i Elipasi nine mia mosa'o gauno ta mate
15:1-35
1Ka i'amba i Elipasi, to Temani, sumangki,
2”Hinaoke mia anu monto'ori sumangkio ponto'ori nahina pengkonaano,
ka pinewowolono umihiakono angi?
3Hinaoke mia mengengeako pau anu nahi mentudu,
ka saru pau anu nahina pengkonaano?
4Ka omue mbo'u tumadio doitoa
ka mokomakurao pompelangkai ndi Ondae Ue Ala.
5Salamumo anu paguruo ngangamu,
ka paudo mia melelengkupi ubinikio.
6Ngangamu isa'a anu mokonsalako, komba ongkue;
wiwimu isa'a mesakosii umewaiko.
7Nde omueke pine'anaako gagi mia amba-ambano,
ke pinokogagi se'eluno luwuno pongku wita?
8Nde metondakoke momperorongeako a nteriso-Do Ue Ala
ka mohawe ponto'ori butu tiano koroimu?
9Hapake anu tino'orimu, anu nahi kimento'orio?
Hapa anu pinokonto'orimu, anu nahi mengkaa ndi omami?
10I olomami mbo'u hinao mia me'uwa ka tende ntinuwu,
anu mota'uopo tinuwuno sekonopo amamu.
11Upemakuraoke pontarero-Do Ue Ala,
ka pau molusa-lusa ndi omue?
12Tembio ka ipolomoko pohaweno aroamu
ka tembio matamu itensila,
13ranta ka ulimbao tekudamu ndi Ondae Ue Ala,
ka ngangamu moluarako pau kanatuu?
14Isemake mia ranta ka imempori,
anu pine'anaako inso a beine ranta ka imentee?
15Menteeano, mia mempori-Do nahi Dope'ala-alao,
maupo asa wawo langi nahi mempori a pongkita-Do;
16tamoako mbo'u mia anu mokoburu ka mosa'o gauno,
anu montele molengkua kana uwoi.
17Ineheku mokomengkaao asa rupa ndi omue, ronge akumo,
ka ineheku tumutuluakomu hapa anu kukitaomo,
18anu tinutuluno mia anu mponto'ori,
ka nahi dompewuniakono uempu'udo,
19anu butu ndi ondae ipineweengako wita atuu,
ka nahina maupo te'asa mia hawe ntelalo i tonga-tongado.
20Mia mosa'o gauno mondidi-ndidi asa ntinuwuno,
kanatuu koa mbo'u mia lambaha a laro luwuno ta'u anu ipinatindaako.
21Uni anu mongkokongiri hawe a birino,
i tempono manangai mehawe ira puu mponsolangi ndi onae.
22Nahi pe'ala-alao nine onae ta mekule inso a wongi-wongia;
onae pinakosiomo ka imateako ponai.
23Onae melakopi ta mo'ungke kaanga, ba isuamo koa.
Ito'orio nine oleo wongi-wongia tetinda sumikorio.
24Onae ipokodoitoo masukaraa ka pompema'iso,
anu pabawaio kana mokole anu tetinda monsapoi.
25Hangano itandeomo kaeno umewai Ira Ue Ala
ka mosia umewai Ira Anu Tedoa Pabawa.
26A mpo'eheno aroano onae melulu umaropiako Ira
kanta me'apii mokapa.
27Rupano itutuwiakonomo taba,
ka apiino taba ipokonao a ntongano;
28onae rodo mo'ia a luwuno kota anu terawo-rawoomo,
a luwuno raha anu nahi dompokompo'iangario mia,
anu tinantui ka igagi mpiha howuno anu terawo.
29Onae nahi ta gagi mompoli ka arataano nahi ta mo'ia mpiha,
maupo pine'ueno nahi ta tetiangi i tolino.
30Onae nahi ta tola inso a wongi-wongia,
tumbano ta moleuako langano api,
ka onae ta pinokotampulaako penaano nganga-Do Ue Ala.
31Siimo ipe'ala-alao anu nahina tuduno ranta ka itepopo'oo,
hangano anu nahina tuduno ta gagi hukuno.
32Napi sompo tempono, mateano ta hawe
ka sampano mbo'u nahi molowulu.
33Onae kana keu anggoro anu ronta wuano
ka kana keu saitu anu tedonta sisino.
34Hangano bawaano mia mosa'o gaudo nahi ta hina inuleno,
ka pingko ikaano api luwuno kemano mia anu mongkaa pompowee nahi pototono.
35Ondae mentiaako masusaa ka mpe'anaako wineweu mosa'o,
ka aroado mpompewowolo pompopo'oo.”
Currently Selected:
Ayubi 15: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
