Ayubi 14
14
Umari mate nahina mbo'u pompe'osaia
14:1-22
1”Mia anu hina inso a beine,
owowa tinuwuno ka bukeako sala-laroa.
2Kana bunga itewile, ka i'amba moleu,
kana eo-eo itetadi moliu ka nahi pokompo'ia tehine.
3Nde Ipo'arooke pengkita-Miu a mia kanatuu,
ka wawao i aro-Miu ka Ipauo kara-karano?
4Isemake polio mompokohina anu mempori inso anu mokoburu?
Nahina maupo te'asa mia!
5Tewala luwuno oleono manasaomo,
porokono wulano manasaomo ndi Omiu,
ka luwuno tidano umariomo Ipakosio, ranta nahi pokolimpaio,
6Moikoano Ilimbao pengkita-Miu inso ndi onae ka po'ineeomo i penaa-naa
ranta ka irasao oleono kana mia tinambo.
7Menteeano da hinao pompe'osaiano keu:
tewala tinuehi, onae wali mentumba,
ka tumbano nahi penaa-naa tuwu.
8Maupo hakano gagi motu'a a laro wita,
ka tu'ono mate a laro pampawu,
9mansano mowoo uwoi, onae mentumbaomo,
ka moluarako sampano kana wuku mpinopaho anu bosiomo.
10Sine tewala mia mate, onae nahi pokompelele,
tewala mia mate, isuaomoke onae?
11Kana uwoi moliu inso a laro rano,
ka korono tempae ka i'amba gagi motu'i,
12kanatuumo mia mepombole ka nahi pewangu mbo'u,
ranta ka itampula langi, nahi dontelike,
ka nahi pewangu inso a mpoturido.
13Ha, po'ineeomo ka Iwuni aku a mpo'iangado mia mate,
dumagai aku hawe ka imorini tekuda-Miu;
pakosiakune mbo'u tempo ka mewowolo aku!
14Tewala mia mate, ipolioke tuwu mbo'u?
Aku momperorohi a laro luwuno oleo pompemasusaku,
ranta ka ihawe tepotolaaku.
15Komiu mepoboi, ka ongkue mbo'u aku sumangki;
Komiu kumekewoio wineweuno kae-Miu.
16Maupo mentee Idoao pelempaku,
nahi Komiu mototoio halaku;
17pe'ewaku ta tetondoni a laro mpundi-pundi,
ka salaku Komiu tumutuwio ntu'u.
18Sine kana torukuno tehoa terawo-rawo,
ka torukuno watu mepahe inso a mpo'iangano,
19kana uwoi kumikisi ira watu,
ka usa marombo mompolomo awu wita,
kanatuumo Ipokotampulao pomperorohiado mia.
20Ipokompetuunduo ranta nahina tampulaano,
ranta ka ilako, Ibalio rupano ka Itenao lumako.
21Luwuno anano gagi maramba sine onae nahi to'orio;
ke ondae gagi tetewehia sine onae nahi pokonto'orio.
22Onae mompemahaki butu a ngkoroino onaeno,
ka mompemasusa hangano tinuwuno onaeno.”
Currently Selected:
Ayubi 14: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
