Ayubi 13
13
I Ayubi kumorahakono kara-karano i aro-Do Ue Ala
13:1-28
1”Menteeano, luwuno atuu ikitaomo mataku,
irongeo ka ipokonto'orio biriku.
2Hapa anu tino'orimiu, kuto'orio koa mbo'u,
nahi kutenagi saru omiu.
3Sine ongkue, aku mepau ndi Ondae Anu Tedoa Pabawa,
aku mingki kumorahakono kara-karaku i aro-Do Ue Ala.
4Menteeano omiumo mia anu mpotutuwi pegaupi,
omiumo luwu sando nahi mentee.
5Ande-andeno nahi mpepau,
mongkona atuu ta pinau ponto'oria inso ndi omiu.
6Rongeomo pongkorahakoku,
ka pekokoongakonomo pe'ewano wiwiku.
7Behe komiuke mpegaupiako Ira Ue Ala,
behe komiuke mpopauako Ira pegaupi?
8Nde mebehe komiuke tumonda Ira Ue Ala,
me'ewa kumorahako Ira?
9Nde moiko koake, ba Doparesa komiu?
Komiu mempolioke mopo'oo Ira kana mompopo'oo mia?
10Manasa Ira humuku komiu,
tewala mansa komiu mpetonda.
11Nde nahi komiu ntededengkeakonoke langkaino pabawa-Do
ka i'alukomiu doitoa ndi Ondae?
12Luwuno pinaumu onaemo potundaano pampawu,
ka kantamu kanta wita pulu.
13Penoro-noromo! Aku mepau,
maupo hapa anu ta gagi a ngkoroiku!
14Ihiku aku umalaakono ngisiku,
ka penaaku aku wawao a laro kungkuku.
15Kitaomo, Ira mepate aku, nahina pomperorohiaku,
sine aku kumorahakono peleluku i aro-Do.
16Onaemo atuu anu ta kumadudui aku;
sine mia mosa'o gauno nahi ta me'aro ndi Ondae.
17Rongeomo temoi-moiko pinauku,
pekokoongakonomo pinauku.
18To'oriomo, kupatindao kara-karaku,
kupe'ala-alao ongkue mentee.
19Isema behe mekara-kara saru ongkue?
I tempo koa mbo'u atuu aku momperodo ka mate.
20Poolo Omiu si weweuo ndi ongkue mongkona orua andio,
ka nahi aku mewuni inso ndi Omiu;
21Po'ineeomo ka Ipoko'olaio kae-Miu inso ndi ongkue
ka pondendea ndi Omiu siimo i'alu aku!
22Ipepoboimo, asalakono aku sumangki;
ke ongkue mepau, ka Omiu sumangki.
23Opiamo hadiono salaku ka halaku?
Ipauakunemo salaku ka halaku atuu.
24Tembio ka Iwunio rupa-Miu
ka motae ongkue gagi iwali-Miu?
25Nde Komiu mokompondendeoke lewe anu pinuurino angi,
ka molulu seami anu mokari?
26Hangano Omiu buri ira mongkona anu mopa'i ndi ongkue
ka mopo'umbuakune salaku tempono kumongura;
27karuku Iwinsoo a laro mpanga,
luwuno peleluku Idagaio,
ka po'onsoi Ipasao i arono pele ngkaruku?
28Mia motopu kana keu mowuru,
kana sangka anu kinaano ule-ule!”
Currently Selected:
Ayubi 13: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
