Ayubi 12
12
I Ayubi umakuio pabawa-Do ka ponto'ori-Do Ue Ala
12:1-25
1Sumangki i Ayubi,
2”Lano, omiumo mia atuudo,
ka meronga omiu ponto'ori ta mate.
3Ongkue mbo'u hinao ponto'ori, mengkena kana omiu,
nahi kutenangi saru omiu;
isema nahi to'orio mongkona anu kanatuu?
4Ongkue gagi pengingisiado pe'asa miaku,
ongkue, anu mebooli ndi Ondae Ue Ala ka mohawe sangkino,
ongkue anu mentee ka moleo gagi pengingisia.
5Asa pontetewehi a mia masola,
kanatuumo pohaweno mia anu rodo tuwuno,
asa ponsepi a mia anu telendo karuno.
6Rodoomo kemado puu mponsolangi,
ka merodo iramo anu mpokotesingkao tekuda-Do Ue Ala,
ondae anu inehedo wawa Ira Ue Ala a ngkaedo.
7Sine pesikenomo a ngkondehora, onae ta moweeakomu pompaguru,
a manu-manu i laro meene, onae ta moweeakomu pompokomengkaa.
8Ke pepaumo a ntolino, onae ta moweeakomu pompaguru,
maupo bou a ntahi ira mpepau-pauakomu.
9Isema i olono luwuno atuu anu nahi to'orio
nine kae-Do Ue Ala anu weweuo atuu;
10nine a ngkae-Do ipo'ia penaano luwuno anu tuwu
ka penaano sompo mia?
11Kombake biri umarahakono luwuno pau,
kana langira mompenami kaanga?
12Paudo mia mponto'ori kongko a mia anu mota'u,
ka ponto'ori a mia anu tende ntinuwu.
13Kahinaano ndi Ondaemo Ue Ala ponto'ori ka roso,
Ondaemo anu hinao pontimbanga ka ponto'ori.
14Tewala Ondae rumongkao, nahina anu wali mokowanguo;
tewala Ondae rumakoo asa mia, nahina anu mokompotolao.
15Tewala Ondae mobunto uwoi, luwuno mokari;
tewala Ondae motolao, maupo wita i'aluo.
16Ndi Ondaemo pabawa ka ponangia,
Ondaemo anu pabawaio moiko mia anu pansia maupo mia anu mompokopansia.
17Luwuno puu mpompatudu Dowawa ira kokaru-karu,
ka luwuno puu mpobitara Doweweu ira tetadi pinewowolodo.
18Dokaleo pongu anu pinokonado luwuno mokole
ka tongado inonggoako koloro.
19Luwuno sando mpesomba Dowawa Ira kokaru-karu,
ka anu moroso Dolundio.
20Mia anu mempine'ala-ala Do'onto ira mpepau,
mokogagi ira mia memota'u bulalingo.
21Dopoweweuako ira pontetewehi a luwuno mia pinemota'u,
ka motolao sulepeno mia moroso.
22Dopokomengkaao rahasiano wongi-wongi,
ka mowawa worikidi a mewine.
23Ondae weweu ira tongku ntetiangi, umarino atuu mepate ira,
ka mokohadio ira tongku, umarino atuu sumaari ira.
24Ondae pu'uno luwuno petewawa i wawontolino mebulalingo,
ka weweu ira ntesaa a mpada malua anu nahina sala.
25Ondae mperare a laro wongi-wongi anu nahina mewine;
ka Doweweu ira kobangku-bangku kana mia molangu.”
Currently Selected:
Ayubi 12: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
