Ayubi 11
11
Patuduno i Sopari
11:1-20
1Ka i'amba mepauomo i Sopari, to Na'ama,
2”Nde nahi asalakono sinangkike pau anu hadio?
Nde asalakono ta pinokomenteeke mia anu hadio mpau?
3Nde asalakono ira mpo'iake mia a labampaumu?
Tewala omue mompasinggiri,
nde nahinake anu mokoko'iiko?
4Potaemu: Pompaguruku molino,
ka morina aku a pongkita-Miu.
5Sine, po'ineeomo Ondae Ue Ala isa'a mepau,
ka Dopepau ndi omue,
6ka Dopauakomu rahasiano ponto'ori,
hangano mongkona atuu orua pengkonaano a ponto'oria.
To'oriomo nine Ondae Ue Ala nahi Dopototoio asa ntia inso a nsalamu.
7Upokonto'ori Ira koake Ondae Ue Ala a menteeano ntu'u,
me'ihilaroo langkaino pabawa-Do?
8Mantandeno lumaloio langi; hapa anu komokoweweuo?
Ondalono lumaloio tolinodo mia mate; hapa anu pinokonto'orimu?
9Songkano ondauopo sekono tolino,
ka maluaopo sekono tahi malua.
10Tewala Ondae telalo, moweweu morako,
ka moweweu pobitaraa, isema moko'onto Ira?
11Menteeano, Doto'orio puu pompopo'oo,
ka kumitao wineweu mosa'o maupo nahi pinoposoo.
12Tewala mia benge-benge mokonto'orio,
ka maupo anano kalide mo'ila mokompine'anaako gagi mia.
13Tewala upatindao aroamu,
ka tumandeo kaemu ndi Ondae;
14tewala upoko'olaio wineweu mosa'o a ngkaemu,
ka nahi upo'ineeo wineweu molengku mo'ia a laro ngkemamu,
15ka omue manasa mokotandeo rupamu nahina tataano,
omue komentade moroso ka nahi kodoito.
16Menteeano kokumolupeo masusamu,
terorambe ndi onae butu kana a uwoi anu telaloomo.
17Tumuwumu ta gagi laluaopo mewanta sekonopo meene,
wongi-wongia ta gagi mewine kana mo'oru.
18Omue komoroodo, hangano hinao pomperorohia,
ka umari paresao luwuno po'ianga,
Omue komoturi roodo;
19omue komepombole nahina monsosanggoli,
ka hadio mia ira me'unde-undeko.
20Sine matado mia mosa'o gaudo ta mowewu,
nahi dompokompolai mbo'u;
pomperorohido butu koa mokotampulao penaa.”
Currently Selected:
Ayubi 11: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
