Yeremia 9
9
1Ande-andeno uluku insoano uwoi,
ka mataku sirikino uwoi mata,
meene wongi aku mengesei
ira mia anu mempinepate inso i olodo ana beineno tongkuku!
2Ande-andeno ongkue hinao po'iangaku i pada one
peratoado mia anu tekonai a laro pelempaa,
asalakono aku bintao tongkuku
ka meliahako inso ndi ondae!
Hangano luwudo mpososabo,
gerombolado mia mpopopo'oo.
3Ondae melongkuo elodo kana pana;
komba menteea sine pegaupi anu me'a'e i wita atuu.
”Mentee ntu'u, ondae mpelungka inso a wineweu mosa'o lumako a wineweu mosa'o,
sine nahi domento'ori Aku”, pau-Do i Ue.
4Laluopo sompo mia metangkoro a walino.
Maupo isema pepaekompomu si pe'ala-alao,
hangano sompo pepaekompo onaemo puu pompopo'oo,
ka sompo wali-wali melempa ngkoraane ngkoramai mpompau anu nahi mentee.
5Anu asa mia mopo'oo anu susua,
ka nahina maupo te'asa mia mepau mentee;
domempokoleleoomo elodo mepau megaupi;
ondae mpokomokendoo koroido mpoweweu anu saala.
6Pompokonsiia i wawono pompokonsiia, pompopo'oo i wawono pompopo'oo!
Nahi domebehe mento'ori Aku, kanandiomo pau-Do i Ue.
7Onaemo pu'uno, kanandiomo pau-Do Ueno luwuakoano,
”Menteeano, Aku mokolonoo ka umarahako ira,
hangano hapa mbo'u anu Aku mokoweweuo a ana beinedo bawaa-Ku?
8Elodo onaemo ana mpana anu mompepate,
pauno ngangado onaemo pe'akala;
ondae mpepau rodoa saru walido,
sine i laro aroado mpontoo mentowokio.
9Nde kana'umpe nahi Aku humuku ira hangano luwuno andio?,
kanandiomo pau-Do i Ue.
Nde kana'umpe nahi Aku moweweu pombaloa
a tongku kanandio?
10Pengesemo ka peraalikimo hangano luwuno torukuno,
ka ponsabangimo hangano ewo i pada one,
hangano luwuno londaomo ranta nahina mia telaloio,
ka nami teronge mbo'u suarano pinotuwu;
moiko manu-manu i laromeene maupo kondehora susuano,
luwuno mpolai iramo ka moliu.
11Aku weweuo Yerusale gagi howuno anu terawo,
pewuniado serigala;
Luwuno kotano Yehuda Aku weweuo boni-boni,
nahina mbo'u palilino.”
Pepokodoito tekalea ka pontadia
9:12-22
12Isemake mia anu tedoa pande mosongka, ranta ka ipokonto'orio mongkona andio ka anu tumarimaomo pau inso a nganga-Do i Ue, ranta ka ipokopauo? Hapa pu'uno ka itebobarasa wita andio, londa kana pada one ranta nahina mia anu telaloio? 13Mepau Iramo i Ue, ”Ondae mebintao Songka-Ku anu Kuweeako iramo i arodo, ka nahi pinerorongeako pau-Ku ke mentondao. 14Tendeano, domentondao moteano aroado ka mentonda ira Baala kana anu domempaguruako ira uempu'udo. 15Onaemo pu'uno kanandiomo pau-Do Ueno luwuakoano, Ue Alado to Isaraeli: Menteeano, Aku weweuo tongku andio mpongkaa rasu mopa'i ka mpo'inu uwoi merasu. 16Aku sumiarawo ira i olodo luwuno tongku anu nahi domento'orio ke maupo uempu'udo. Aku mo'oliwi ponai lumampui ira ranta ka Kupingko ira. 17Pekokoongakono! Poboi iramo beine mposabangi, ka dome'aiwa, ka pontenamo mia a luwuno beine anu pande mosongka, ka dome'aiwa!” Kanandiomo pau-Do Ueno luwuakoano.
18Asalakono ka dompotuturako
ka mposabangia kita,
ka inte'i'iti uwoi matato,
ka ileento a ngkuli matato!
19Hangano teronge ponsabangi inso i Sioni:
Mentee ntu'u, memate kitamo!
Omami tedoa mempinokoko'ii!
Asalakono kami mebintao wita andio,
hangano luwuno raha po'iangamami pinobangkuomo.
20Onaemo ka imerongeo pau-Do i Ue, hei luwuno beine,
po'ineeomo ka itarimao birimiu pau inso a nganga-Do;
paguruako iramo ponsabangi anamiu beine,
ka penani ponsabangi, singge mia a wali-walino:
21”Matea me'oloako a luwuno pentangoato,
mpewinso i larono luwuno benteto.
Ondae mokotampula ira nana'ote inso a nsala,
luwuno mangalitau inso i tanalapa;
22Pauomo, ’Kanandiomo pau-Do i Ue: wata ngkoroido mia matumbole
kana ta'i a lere,
kana tonggino gandu i bungkudo mia mensowi
nahina anu pumpu ira.’”
Mo'unde hangano tumo'ori Ira Ue Ala
9:23-26
23Kanandiomo pau-Do i Ue,
”Mia pande mosongka ka si po'undeakono pandeno mosongka,
mia moroso ka si po'undeakono rosono,
mia kaea ka si po'undeakono kaeano.
24 #
1Kor. 1:31; 2Kor. 10:17 Sine isema ineheno mo'unde, laluopo ipo'undeakono mongkona andio:
nine onae mokonto'orio ka tumo'ori Aku,
nine Ongkuemo Ue anu mopokitao pompehohawa,
moleoa ka menteea i tolino;
mentee ntu'u, luwuno atuu inehe-Ku, kanandiomo pau-Do i Ue.”
25”Kitao, tempono ta hawe, kanandiomo pau-Do i Ue, Aku humuku ira mia anu mentinindi iramo tinotopi kuli anuno: 26to Masiri, to Yehuda, to Edomi, inuleno i Amoni, to Moabi ka luwuno mia anu kumeruo wuuno a wiwi uluno, mia anu mpo'ia i pada one, hangano luwuno tongku atuu menteeano nahi dompetindi ka maupo luwuno suku Isaraeli nahi tinindi aroado.”
Currently Selected:
Yeremia 9: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
