Yeremia 8
8
1A tempo atuu, kanandiomo pau-Do i Ue, wukudo luwuno mokole i Yehuda, luwuno pinemota'u, sando mpesomba ka nabi, saru wukudo luwuno palilino Yerusale ta linuarako inso a laro ngkaburudo. 2Luwuno wuku atuu siniarawo i totono mata oleo, wula, ka luwuno anano wula anu hori ira mengkekewoio, mpekakaakono, mentondao, mpesikeno ka mpesomba. Luwuno atuu nahi ta pinumpu ka kinaburu, tendeano ta gagi pompokomewalo a wawo wita. 3Sine luwuno mia anu da mentuwu inso a nsuku anu lambaha andio ta inehedopo mate sekono tuwu a luwuno po'ianga isua Kusiarawo ira, kanandiomo pau-Do Ueno luwuakoano.
Hukuno tongku anu nahi behe tepidi
8:4-17
4Omue asalakono pauako ira, ”Kanandiomo pau-Do i Ue:
Tewala mia tedonta, nde nahi ta wali mewangu?
Tewala mia mewolili, nde nahi ta mekule?
5Tembio ka dompewolili tongku andio,
luwuno ihino Yerusale mpewolili mpiha?
Ondae mpe'ini a pompopo'oo,
nahi dobehe mpekule.
6Kupekokoongako iramo ka rumongeo:
nahi dompepau moleo!
Nahina maupo te'asa mia me'o'oleakono wineweuno mosa'o
saru motae: Hapa anu kuweweuomo?
Ondae mpewolili mpolai a nsalado ondaedo
kana ngara anu merumpa mewinso a laro mpeteaa.
7Maupo manu-manu timba'u i laro meene
mento'orio tempono,
manu-manu wurokou, wowitu, ka koro
mentondao tempo pekuleado,
sine bawaa-Ku nahi domento'orio
songka-Do i Ue.
8Kana'umpe ka impotae: Omami pande mpompewowolo,
ka omami hinao Taura-Do i Ue?
Menteeano, penano anu tumo'orio ntu'u ihino wunta anu bukeako pegaupi
weweuo gagi pegaupi.
9Mia pande mosongka gagi mokoko'ii;
ondae ntededengke ka tepopo'oo.
Menteeano, nahi domentarimao pau-Ku,
ponto'ori hapa anu kongko ndi ondae?
10 #
Yer. 6:12-15
Onaemo pu'uno, Aku meweengako ira beinedo a mia susua,
luwuno leredo a mia mpope'ata.
Hangano, inso anu lalu kodei hawe anu lalu langkai,
luwuno mpo'ungke me'uraa,
moiko nabi maupo sando mpesomba,
luwuno mpoweweu pompopo'oo.
11 #
Yeh. 13:10
Ondae mempakulio mobelano ana beinedo bawaa-Ku
kana-kana mobela kodei, ipotae: Manangai! Manangai!,
kahinaano nahina manangaia.
12Bakanaano ondae memongkoko'ii,
hangano ondae mpoweweu hapa anu mokoburu;
Sine ondae nahi domemokoko'ii ntu'u.
Onaemo pu'uno ira ntebangku i olodo mia anu ntebangku,
ira ntetidu tebangku i tempono domehinuku,
pau-Do i Ue.
13Aku umalao hasilido,
kanandiomo pau-Do i Ue,
sine nahina wua anggoro a ngkeu anggoro,
nahina wua ara a ngkeu ara,
ka luwuno leweno moleuomo;
onaemo pu'uno, hapa anu Kuweeako ira,
ta tampula inso ndi ondae.”
14Tembio ka tobutu mpentoro-toro?
Mpempumpumo ka aiwamo tomelako a luwuno kota mebente
ka memate i ra'ai!
Hangano Ondae i Ue, Ue Alato, mo'inee kita memate,
moweeakita mpo'inu rasu,
hangano mentehala kitamo ndi Ondae i Ue.
15Ontae mpomperorohi sintuwu, sine nahina hawe te'asa anu moiko;
ontae mpoperorohi tempo tompaa, sine anu hina butu mongkokongiria!
16”Pewunsulino ngarado iwali inso i Dani;
hangano pekiilino ngara lakinodo
mondidi-ndidiomo asa wawontolino.
Ondae me'aiwa ka mengkaano pingko wita ka luwuno ihino,
kota saru palilino.
17Kitaomo, Aku motola ira i tonga-tongamiu ule mo'ito;
ondae nahi poli pinokomoneaako basa-basa,
ka ta tumungku komiu, kanandiomo pau-Do i Ue.”
Sabangino Yehuda ka Yerusale
8:18–9:11
18Nahi poli pinokotompa masusaa anu umaluo koroiku,
tedoa mahaki aroaku.
19Irongeomo peboolido mpepetulungi ana beinedo tongkuku
inso a luwuno po'ianga anu olai i wita andio,
”Nahi Dokongkoke i Ue i Sioni? Nahina mokolenoke i ra'ai?”
Tembio tekuda-Ku ka dompokotesingkaakono luwuno tinaha-Do,
saru luwuno lahumoado
mia mehawe anu nahina pengkonaano?
20Laloomo tempo sumowi, tompaanomo tempo motu'i-tu'i,
sine naapo koa mbo'u tomengkinadudui!
21Hangano mobelado ana beineno tongkuku, aroaku mbo'u mobela;
ongkue mompemasusa, isapoi akumo mongkokongiria.
22Nahinake balasee i Gileadi?
Nahinake dotoro i ra'ai?
Tembioke napi hawe koa mbo'u
pomuleado ana beineno tongkuku?
Currently Selected:
Yeremia 8: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
