Yeremia 10
10
Ondae Ue Ala anu tuwu ka lahumoa nahina pengkonaano
10:1-16
1Rongeomo pau anu pinohawe-Do i Ue ndi omue, hei suku Isaraeli! 2Kanandiomo pau-Do i Ue,
”Siimo imempandirio peleludo luwuno tongku,
siimo imedoitoakono luwuno petondoni i langi,
maupo luwuno tongku medoitoakono.
3Hangano, gaudo tongku atuu nahina pengkonaano.
Kombake lahumoa atuu keu anu tinuehi inso a ntobu,
anu inanggano asa mia puu mpo'angga keu mompake pa'o?
4mia mompokotekosiako wulaa saru salaka,
ka mokorosoakono palu-palu saru paso,
ka si telelu.
5Luwuno lahumoa mengkena kana mia-mia a lere suai,
nahi dompokompepau
ka asalakono tinande
hangano nahi pokompelempa.
Si doitoakono,
hangano nahi dompokompoweweu anu mosa'o,
ka nahi dompokompoweweu mbo'u anu moiko.”
6Nahina kana Omiu, oo Ue!
Omiu tedoa langkai ka langkai nee-Miu hangano tedoa moroso.
7 #
Meng. 15:4
Isemake anu nahi doito ndi Omiu,
oo Mokoledo luwuno tongku?
Mentee ntu'u, kanandiomo pelelu anu tekona ndi Omiu;
hangano i olodo mia pande mposongka inso a luwuno tongku
ka i olono luwuno mokoledo
nahina anu kana Omiu!
8Lahumoa atuu luwuno benge-benge ka monge-monge;
pontisodo nahina tuduno; onae butu koa keu.
9Salaka pinalu winawa inso i Tarasisi,
ka wulaa inso i Upasi;
lahumoa atuu wineweuno puu mpo'angga ka wineweuno kaeno mia pande mo'angga wulaa.
Sangkano inso a nsawu wungo motu'a ka sawu wungo mongura,
luwuno wineweuno kaeno mia anu pande mo'angga.
10Sine Ondae i Ue ondaemo Ue Ala anu mentee,
Ondaemo Ue Ala anu tuwu ka Mokole anu nahina tampulaano.
Tolino lelu hangano tekuda-Do,
ka luwuno tongku nahi domempolio a bamburu-Do.
11Kanandiomo asalakono imempauakono, ”Luwuno pinesombai andio, anu nahi pompokogagi langi ka tolino ta moliu inso i tolino ka inso i totono langi.”
12Ondaemo i Ue saru roso-Do mokogagio tolino,
saru ponto'ori-Do wanguakono wawontolino,
ka saru pande-Do langi Dowileo.
13Tewala Dopoporongeo suara-Do, u'uruomo uwoi i langi.
Dowuatakono gawu nseru inso i tompano tolino,
mepansariako koliki tumondao usa,
ka wawao angi meluarako inso a mponaapa-Do.
14Sompo mia mengkaa benge-benge, nahina tino'orino,
ka sompo mia anu pande mo'angga wulaa gagi mokoko'ii hangano tinaha wineweuno.
Hangano tinaha tinawano butu pompopo'oo,
nahina penaa i larono,
15Luwuno atuu nahina tuduno,
inangga anu gagi pompasinggiri,
ka ta moliu i tempono ihinuku.
16Komba kanatuu Ondae anu gagi Tiano i Yako,
hangano Ondaemo anu weweuo luwuakoano,
ka Isaraeli onaemo suku pine'ue-Do;
Ueno luwuakoano, onaemo nee-Do!
Yehuda gagi boni-boni
10:17-25
17Pumpu iramo sangkamu ka ulako inso i wita andio,
hei luwuno mia anu kongko a laro pongkadua!
18Hangano, kanandiomo pau-Do i Ue,
”Menteeano, pohona andio
Aku metadiako ira palilino wita andio,
ka Aku mokomarasai ira,
ka dompembasaio.”
19Masola akumo, hangano mobelaku langkai;
mobelaku nahi hori toompa!
Kupewowoloo, ”mentee ntu'u, onaemo andio pobobarasaia
ka asalakono aku tumembio!”
20Kemaku tebangkuomo,
ka luwuno tanggono tebiteomo.
Luwuno anaku melako iramo inso ndi ongkue ka nami hina mbo'u;
nahina mbo'u anu montadeo kemaku
ka wireio tendaku.
21Mentee ntu'u, luwuno puu mpopakambi gagi mebenge-benge;
nahi dompo'ema pontiso-Do i Ue.
Onaemo pu'uno nahi dompehasili;
luwuno pinotuwu pinakambido ntesiarawo.
22Terongeomo lele:
Kitao, tewukaa langkai ta hawe inso i wita utara,
anu ta weweuo luwuno kotano Yehuda boni-boni,
gagi pewuniado serigala.
23Kuto'orio, oo Ue, nine mia nahina pabawano
tumantuio sala ntumuwuno,
ka mia anu melempa nahina pabawano
ka ipatotoo pelempano.
24Itunduhi akumo, oo Ue, sine anu koa pototono,
ka si saru tekuda-Miu,
ka si Ipokotampula aku!
25Ipotiiomo tekuda-Miu
a luwuno tongku anu nahi to'ori Komiu,
a luwuno pe'etu anu nahi dompebooliako nee-Miu,
hangano domengkaanomo i Yako, mengkaano ka mepingkoo;
po'iangano domeweweuo gagi terawo-rawo.
Currently Selected:
Yeremia 10: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
