Yeremia 7
7
Pontutuluno i Yeremia mongkona Raha Mempori
7:1-15
1Pau anu hawe ndi Yeremia inso ndi Ondae i Ue, kanandio, 2”Pentademo a mpewowa langkaino Raha-Do i Ue, pebooliakonomo i ra'ai pau andio ka potae: Rongeomo pau-Do i Ue, hei luwumiu to Yehuda anu mpewinso telalo a luwuno pewowa langkai andio komiu mpenggolontu mpesombai Ira i Ue! 3Kanandiomo pau-Do Ueno luwuakoano, Ue Alado to Isaraeli: Pokomoikoomo pelelumu ka wineweumu, asalakono Aku mo'inee komiu mpo'ia a mpo'ianga andio. 4Si mpe'ala-alao luwuno pau mpegaupi andio: ndio raha-Do i Ue, raha-Do i Ue, raha-Do i Ue! 5Tewala mentee ntu'u impokomoikoo pelelumiu ka mentee ntu'u imeweweuo moleoa a mpe'asa miamiu, 6tewala nahi imempokonsii ira mia mehawe, nana'ote nahina amano ka tuwu beine, nahi mpo'uwu reano mia anu nahina salano a mpo'ianga andio, ka nahi mpetonda a mpinesombai susua, anu sumolangi komiu, 7asalakono Aku koa mo'inee komiu mpo'ia a mpo'ianga andio, ka wita anu Kuweeako iramo uempu'umiu, inso i ndi'ipua ranta nahina tampulaano. 8Sine, menteeano impe'ala-ala ira pau mpegaupi anu nahi mentudu. 9Nde kana'umpe umarimiu mponako, mpompepate, mpososabo ka mpesumpa mpegaupi, mpontunu pesomba a Baala ka mpotonda pinesombai susua anu nahi imento'orio, 10ka i'amba me'aiwa mpentade i aro-Ku a raha andio, anu nineeako montonda nee-Ku, saru mpotae: ’Ntekadudui kita, ka impokompoweweu mbo'u luwuno wineweu mokoburu andio!’ 11#Mat. 21:13; Mrk. 11:17; Luk. 19:46Nde raha andio, anu nineeako montonda nee-Ku, gagiomo po'iangado puu mporontu a matamiu? Menteeano Ongkue isa'a kumitaomo, kanandiomo pau-Do i Ue. 12#Yos. 18:1; Pud. 78:60; Yer. 26:6Onaemo pu'uno lakomo a mpo'ianga-Ku i Sioni, isua i ndi'ipua Kuweweuo po'iangano nee-Ku, ka kitaomo hapa anu Kuweweuomo ndi onae hangano poweweudo mosa'o bawaa-Ku Isaraeli! 13Kanandio-andio omiu meweweuomo mbo'u luwuno wineweu atuu, kanandiomo pau-Do i Ue. Omiu nahi behe merongeo, maupo Kupepau mpiha ndi omiu, ka nahi behe mesangki, maupo Kupebooli ndi omiu. 14Onaemo pu'uno, a raha andio, anu nineeako montonda nee-Ku ka anu pinerorohimiu, ka a mpo'ianga, anu Kuweeakomiumo ka a uempu'umiu, Aku weweuo kana anu Kuweweuomo ndi Silo. 15Aku metadiakomiu inso i aro-Ku, mengkena kana luwuno inuleno i Eparai, pepaekompomu atuu, Kupetadiakonomo.”
Pompopoto'oria a anu mpesombaio Mokole beine Suruga
7:16-20
16”Omue isa'a, siimo pekakaiako ira tongku andio, ka si mansa po'emamu saru pekakai tiado, ka si dadai Aku, hangano nahi Aku merorongeakomu. 17Nahi ukitaoke hapa anu wineweudo a luwuno kotano Yehuda ka luwuno sala i Yerusale? 18Nana'ote mpobini keu ponahu, luwuno ama mpopokomelanga api ka luwuno beine mposalo tarigu weweuado kukisi pesomba tiano mokole beine suruga, ka mia mpopesombaako pesomba tinawa a mpinesombai susua saru tinoodo mpokomahakia-Kune aroa-Ku. 19Nde Ongkueke pinokomahakido, kanandiomo pau-Do i Ue, kombake tendeano koroido ondaedo, ranta ka domegagi mokoko'ii? 20Onaemo pu'uno kanandiomo pau-Do Ue Ala: Menteeano, tekuda-Ku ka mokulano aroa-Ku Aku motiio a mpo'ianga andio, a mia, pinotuwu, mperupa-rupa keu a mpada, ka a hasilino wita. Tekuda atuu ta tensila ka nahi pinokompepate.”
Pompopoto'oria a tongku anu motea aroa
7:21-28
21Kanandiomo pau-Do Ueno luwuakoano, Ue Alado to Isaraeli, ”Tiangiomo koa pesomba tinunumu a mpesomba sinumbelemu ka kaanomo bauno! 22Mentee ntu'u, nahi Kupepau ke mompowee parenta a uempu'umiu mongkona pesomba tinunu ka pesomba sinumbele tempono Kuwawa ira mpeluarako inso i wita Masiri. 23Butu koa onae ndio anu Kuparentaako iramo: Perorongeakonomo pau-Ku, asalakono Aku gagi Ue Alamiu ka omiu gagi bawaa-Ku, ka tondaomo luwuno sala anu Kuparentaakomiu, ka imoiko tumuwumiu! 24Sine nahi domebehe mperorongeakono ke menta'oo birido, tendeano mentondao luwuno tinoo ka moteano aroado anu mosa'o, ka ondae mpopokitao bungkudo ka komba arodo. 25Mompu'u tempo dompeluarako uempu'umiu inso i wita Masiri hawe oleo andio, Kutena ira mpiha luwuno nabi ndi omiu, luwuno tetenaa-Ku, oleo me'eu oleo, motilalo mpiha. 26Sine, nahi domebehe mperorongea-Kune ke mpo'aroo birido. Tendeano motea palowe'udo, mpoweweu lalu mosa'o sekonopo uempu'udo. 27Maupo upohaweako ira luwuno pau andio, nahi ira mperorongeakomu, ka maupo upebooliako ira, nahi ira mesangkiko. 28Onaemo pu'uno, pauako iramo: Ndiomo tongku anu nahi behe merorongeakono pau-Do i Ue, Ue Alado, ka nahi dobehe mpontarima pohuku! Moleono aroado pingkoomo, tepahihiomo inso a ngangado.”
Pompesombaia lahumoa ta tinadi
7:29–8:3
29Keruomo wuu a ulumu ka tadiomo!
Ponsabangimo a luwuno pongku londa,
hangano nami Dotarimao i Ue ka tumadio
inule anu kona tekuda-Do!
30Mentee ntu'u, to Yehuda mpoweweu iramo hapa anu mosa'o a pongkita-Ku, kanandiomo pau-Do i Ue. Domenaaomo luwuno lahumoado anu mokoburu a raha anu nineeako montonda nee-Ku, ira mengkokoburutio. 31#Ima. 18:21; 2Mok. 23:10; Yer. 32:35Mpowangu iramo luwuno po'ianga pompesombaia meneeako Topeti i Lembono Beni-Hinomi pontunuado anado tama ka beine. Mongkona atuu nahi Kuhori meparentaako ka nahi hori hina a laro aroa-Ku. 32Hangano atuu, menteeano, tempono ta hawe, kanandiomo pau-Do i Ue, nine mia nahi ta pauo mbo'u ”Topeti” ka ”Lembono Beni-Hinomi”, tendeano ”Lembono Ponsumbelea.” Ira mpokaburu wata ngkoroi i Topeti hangano makura po'ianga, 33maupo wata ngkoroido tongku andio gagi kaangado manu-manu i laro meene saru luwuno kondehora a wita motu'i nahina anu monsosanggoli. 34#Yer. 16:9; 25:10; Meng. 18:23A luwuno kotano Yehuda ka luwuno sala i Yerusale Aku mokompena-naao suara mawongkoa ka po'undea, suarano umbungkori tama ka umbungkoroi beine, hangano wita atuu ta gagi anu terawoa.
Currently Selected:
Yeremia 7: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
