Yeremia 6
6
Masolaa anu ta umaluo Yerusale ka Yehuda
6:1-26
1Pontuturakomo pelimba, hei luwuno to Benami,
inso i tonga-tongano Yerusale!
Puuriomo tawuwua i Tekoa,
ka wuatakonomo ahu gagi petondoni i wawono Beti-Keremi!
Hangano masolaa momporaomo inso i utara,
asa masolaa langkai.
2Nde ana beine i Sioni mengkenake kana pada anu lalu pinekokono,
3Luwuno puu mpopakambi mehawe
ndi onae saru bawaano pinotuwudo.
Domempasao luwuno kemado melimbuo,
singge mia kumaano tiano.
4”Patindaomo peteaa umewaio;
aiwamo tomelako mposapoi tempono ntonga oleo!”
”Memasola kitamo, hangano moriniomo oleo,
eo-eo ngkiniwia olaiomo!”
5”Aiwamo tomelako mposapoi tempono wongi
ka tomerawo-rawoo benteno!”
6Hangano kanandiomo pau-Do Ueno luwuakoano,
”Tuehi iramo keuno ka howuomo wita
gagi rereno Yerusale!
Onaemo kota anu asalakono hinuku!
Butu pompokonsiia mpena i larono!
7Kana mata uwoi mowaao uwoi molinono,
kanatuumo kota atuu saru wineweu mosa'o.
Pompokonsiia ka pobobarasaia teronge i larono,
marasai ka mobela wela tengkita i aro-Ku.
8Tarimaomo pohuku, hei Yerusale,
ka si Kubintako,
ka si Kuweweuko boni-boni,
gagi wita anu nahina palilino!”
9Kanandiomo pau-Do Ueno luwuakoano,
”Po'ineeomo anu da tebinta inso a nto Isaraeli ka ipingko inopu
kana teweweuno keu anggoro.
Walimo tandeo kaemu
kana anu mo'opu anggoro a luwuno rangkano.”
10Ndi semake asalakono aku mepau ka mompowee pepopoto'ori,
ka dobehe mporonge?
Mentee ntu'u, birino tetutuwi,
nahi domporonge!
Mentee ntu'u, pau-Do Ue gagi po'unde-unde,
nahi dompe'eheo!
11Ongkue mbo'u bukeako pontekudaako-Do i Ue,
mokendo akumo meteao.
”Uwuomo atuu a wawo nana'ote kodei a nsala,
ka a wawo pepumpuado mangalitau mperonga-ronga.
Mentee ntu'u, moiko tama maupo beine ta rinako,
mia mota'u mbo'u ka anu tende ntinuwu.
12 #
Yer. 8:10-12
Luwuno rahado ta pineweengako a mia susua,
leredo mbo'u ka kombiado.
Mentee ntu'u, Aku tumandeo kae-Ku
a mpalilino wita andio,” kanandiomo pau-Do i Ue.
13”Hangano, inso anu lalu kodei hawe anu lalu langkai i olodo,
luwuno mpo'ungke me'uraa,
moiko nabi maupo sando mpesomba
luwuno mpompopo'oo.
14 #
Yeh. 13:10
Ondae mpopakuli mobelado bawaa-Ku
kana-kana mobela kodei, dompotae: Rodoa! Rodoa!,
kahinaano nahina rodoa.
15Bakanaano ondae memokoko'ii,
hangano ondae mpoweweu hapa anu mokoburu.
Sine maupo tedei nahina mokoko'iido ka nahi domponto'ori mokoko'ii.
Onaemo pu'uno ira ntebangku i olodo mia anu ntebangku;
ira ntebangkuako tetidu i tempono Kuhuku ira, pau-Do i Ue.”
16 #
Mat. 11:29
Kanandiomo pau-Do i Ue,
”Pentademo a luwuno sala ka kitaomo,
pesikenoakonomo luwuno sala inso a tempo se'eluno,
isua hinao sala anu moiko, tondaomo atuu,
ka komiu mpohawe rodoano sumangamiu.
Sine dompotae: Nahi kimebehe mentondao!
17Kupotoro iramo anu dumagai komiu,
pau-Ku: Pekokoongakonomo unino tawuwua!
Sine dompotae: Nahi kimebehe mpekokoongakono!
18Onaemo pu'uno rongeomo, hei luwuno tongku,
ka to'oriomo, hei bawaa, hapa anu ta gagi ndi ondae!
19Rongeomo, hei tolino!
Mentee ntu'u Aku mompotii masolaa
a tongku andio,
gagi poko'ariano inso a luwuno tinoodo,
hangano nahi dompekokoongakono pau-Ku
ka domentarimao pompaguru-Ku.
20Hapake tuduno ndi Ongkue impowawa dupa inso i Sieba
ka towu anu moiko inso i wita anu olai?
Nahi Kupekono ira pesomba tinunumiu
ka luwuno pesomba sinumbelemiu nahi pokonsanaa Aku.
21Onaemo pu'uno kanandiomo pau-Do i Ue:
Mentee ntu'u, Aku monaa watu tetidua i arodo tongku andio,
ka dontebangku tetiduako onaeno;
moiko luwuno ama maupo luwuno nana'ote,
saru mbo'u pehori raha ka walino, luwudo ira memate.”
22Kanandiomo pau-Do i Ue,
”Mentee ntu'u, asa tongku ta aiwa inso i wita utara,
asa tongku anu langkai ira mpelelu me'aiwa inso i tompano tolino.
23Ondae mpopake pana ka kansai;
ondae melambaha ka nahi dompompehohawa.
Suarado kana u'uruno tahi,
ondae mpesawi a ngara,
te'atora kana mia lumako metea,
umewaiko, hei ana beine Sioni!”
24Kimerongeomo leleno,
kaemami molemaomo.
Masukaraa kumungku kami,
mpompemahaki kana beine anu me'ana.
25”Si peluarako a mpada,
ke melempa a nsala,
hangano hinao iwali meponai,
ka pompokodoito isuamo koa!”
26Hei ana beineno tongkuku,
pokonaomo sawu po'inombo,
ka pelundi-lundimo a pampawu!
Pompemasusamo kana mompemasusaako ana asa-asano,
saru ponsabangi anu mo'o'au!
Hangano nahi kinookoo ta hawe
pompepate sumapoi kita.
I Yeremia gagi puu pomparesa bawaa
6:27-30
27Kupotorokomo i olodo bawaa-Ku gagi puu pomparesa,
gagi puu podagai omue asalakono poposoo,
ka paresao leludo.
28Luwudo lano wela me'ewa,
mpelempa ngkoraane-ngkoramai mpotetewehi mia susua;
ondae kana mala ka labu.
Luwudo mpelelu mosa'o!
29Balo pompuuri pinuriomo,
sine anu meluarako inso a api butu tima mo'ito.
Nahina tuduno pompokolono iwineweu mpiha,
mia memosa'o gaudo nahi teponsia.
30Ondae pinau salaka nahi tinarima,
hangano nami Dotarima ira i Ue!
Currently Selected:
Yeremia 6: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
