Yeremia 5
5
Pohuku-Do i Ue nahi pinokonsilihako
5:1-31
1Tanggoliliomo luwu sala i Yerusale,
kitaomo temoiko ka pekokoongakono!
Paresaomo a luwuno tanalapano,
hinaoke hinawemiu te'asa mia,
hinaoke anu moweweu moleo,
ka anu mo'ungke menteea,
asalakono Aku umampunio kota atuu.
2Maupo dompotae, ”A nee-Do i Ue anu tuwu,”
mengkaano ondae mpesumpa nahi mentee.
3Oo Ue, nahi te'aro a menteeake mata-Miu?
Itunduhi ira,
sine nahi dompompemahaki;
Ihuku ira,
sine nahi domebehe mpontarima pongkuahako.
Dompokomoteao uludo laluaopo sekono watu,
ka nahi domebehe ntepidi.
4Ka ku'amba mompewowolo, ”Ondae butu koa mia kodei;
ondae mia mebenge-benge,
hangano nahi domento'orio sala-Do i Ue,
songka-Do Ue Alado.
5Moikoomo aku lumako a luwuno mia langkai potorodo,
ka mepau ndi ondae,
hangano ondae anu mento'orio sala-Do i Ue,
songka-Do Ue Alado.”
Sine maupo ondae luwudo mempuduomo mbo'u pasanga,
me'otuhio luwuno koloro pontanggo.
6Onaemo pu'uno singa inso a ntobu ta merangkami ira,
ka serigala i pada one ta rumako ira.
Nggapu langkai meboti-boti ta mompora umpeda a luwuno kotado,
sompo mia anu meluarako ta meberi-berio.
Hangano hadioomo halado,
ka tesaado tetiangi.
7Tewala kanatuu, kana'umpe Aku umampuniko?
Luwuno anamu domebinta Akumo,
ka mpesumpa a neeno anu komba Ondae Ue Ala.
Umarino Kupokomowohi ira, ondae mponsosabo
ka mperonga-ronga melako a raha mpebelesua.
8Ondae onaemo ngara lakino anu mewalo ka tedoa inehedo mpemalii,
singge mpekiili ineheno walino pe'asa ngarano.
9Nde kana'umpe nahi Aku humuku ira hangano luwuno andio?
kanandiomo pau-Do i Ue.
Nde kana'umpe nahi Aku moweweu pombaloa
a tongku kanandio?
10Pewuatakomo a lere anggorono anu mpo'ensa-ensa,
solangiomo, sine si pokopingkoo luwu.
Tadi iramo sampano keu anggorono,
hangano luwuno atuu komba keu anggoro-Do i Ue!
11Hangano suku Isaraeli ka suku Yehuda
mente ntu'u nahi dompetenunu ndi Ongkue,
kanadiomo pau-Do i Ue.
12Domehapu Ira i Ue ka mpotae,
”Nahi Dopoweweu hapa-hapa!
Nahi ta umalu kita masolaa,
peteaa ka mokoninggoa nahi kita mpembasaio.
13Luwuno nabi ira megagi angi,
pau-Do i Ue nahina ndi ondae.”
Kanandiomo anu ta gagi ndi ondae!
14Onaemo pu'uno kanandiomo pau-Do i Ue,
Ue Alano luwuakoano,
”Hangano mpotae ira kanatuu,
menteeano Aku weweuo luwuno pau-Ku,
gagi api a laro ngangamu,
ka tongku andio gagi keu,
ka pingko ikaano api atuu.
15Menteeano, Aku tumenao
asa tongku inso a olaiano umewai komiu,
hei suku Isaraeli, kanandiomo pau-Do i Ue,
asa tongku anu moroso,
asa tongku anu inso i ndi'ipua,
asa tongku anu nahi uto'orio paudo,
ka hapa anu pinaudo nahi uto'orio.
16Ponaapano panano kana kaburu menganga,
luwudo puu mpetea.
17Ira mengkaano ka ipingko hasilino sinowimu ka kaangamu,
mengkaano ka ipingko anamu tama ka beine,
mengkaano ka ipingko bawaano bembe bimbamu ka sapimu,
mengkaano ka ipingko keu anggoro ka keu aramu,
ka merawo-rawoakono ponai luwuno kotamu anu mebente,
anu pinerorohimu.”
18”Sine, i tempo mbo'u atuu, kanandiomo pau-Do i Ue, nahi Aku weweuo ka imepingko luwu. 19Tewala lembuino mpesikeno komiu: Tembio Ondae i Ue, Ue Alato, weweuo luwuno andio ndi ontae?, ka omue kosumangki ira: Kana imebinta Akumo ka mpe'ataakono koroimiu a mpinesombaido mia mehawe i witamiu, kanatuumo komiu mpe'ataakono koroimiu a mia mehawe i asa wita anu komba witamiu.”
20Paleleomo andio i olono suku inuleno i Yako,
popoto'oriomo atuu i Yehuda saru motae:
21 #
Yes. 6:9-10; Yeh. 12:2; Mrk. 8:18 ”Rongeomo andio,
hei tongku anu monge-monge ka nahina akalano,
anu hinao matano, sine nahi pongkita,
anu hinao birino, sine nahi poronge!
22 #
Ayb. 38:8-11
Nahi medoitoke ndi Ongkue, kanandiomo pau-Do i Ue,
nahi mpondidi-ndidike ndi Ongkue?
Kombake Ongkue anu monaa one gagi tidano tahi,
gagi tidano mpiha anu nahi pokolaloo?
Maupo tahi mebomba meroku, nahi polio,
maupo umu'uru luwuno bombano, nahi dompokolaloo tida atuu!
23Sine tongku andio mpe'aroa
anu wela umewa ka mo'ewai songka;
mepansia iramo ka mpolai.
24Nahi dompotae a laro aroado:
Moikoomo tomedoitoako Ira i Ue, Ue Alato,
anu moweeakita usa ia tempono,
moiko usa pompu'uano tempono maupo usa poko'ariano tempono,
ka anu mokogagio ndi ontae luwuno minggu ponsowia.
25Salamu tumereio luwuno andio,
ka halamu umonsoio anu moiko inso ndi omue.
26Menteeano, i olodo bawaa-Ku hinao hinawe mia mosa'o gaudo.
Ondae pompora kana anu morako manu-manu;
domenta'oo pompete'umalado
ka mporako mia.
27Kana po'ukoa bukeako manu-manu,
kanatuumo rahado buke pompopo'oo.
Onaemo pu'uno ondae megagi mia langkai ka kaea,
28gagi mewalo ka tekosi.
Susuaano atuu dompo'ineeo poweweu anu mosa'o,
nahi domperioo songka,
nahi dompokonangio kara-karano nana'ote nahina amano,
ka tiano mia mongkokolaro nahi dokorahakono.
29Nde kana'umpe nahi Aku humuku ira hangano luwuno andio?
kanandiomo pau-Do i Ue.
Nde kana'umpe nahi Aku moweweu pombaloa
a tongku kanandio?”
30Mongkokodoitoa ka mongkokongiria
gagi i wita andio:
31Luwuno nabi mpompau anu ta gagi nahi mentee
ka luwuno sando mpesomba mpetewawa po'ehedo,
ka bawaa-Ku inehedo mongkona anu kanatuu!
Sine, hapa anu komiu mpoweweu,
tewala hawe oleo tampulaano?
Currently Selected:
Yeremia 5: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
