Yeremia 52

I Sedekia, mokole i Yehuda: tekaleno Poparentaa Yehuda

52:1-30

(2Mok. 24:18–25:21; 2Taw. 36:11-21; Yer. 39:1-10)

1I Sedekia metinuwu rua pulu ka asa nta'u tempono igagi mokole ka hopulu ka asa nta'u tehineno ipoparenta i Yerusale. Neeno ineno i Hamutali ana beineno i Yeremia, inso i Libina. 2Onae moweweu hapa anu mosa'o a pongkita-Do i Ue mengkena kana anu wineweuno i Yoyakimi. 3Mentee ntu'u, hanganomo tekuda-Do i Ue mongkona atuu gagi i Yerusale ka Yehuda, onaemo ka Dotadi ira inso i aro-Do.

Ka i'amba i Sedekia umewaio mokole i Babeli. 4#Yeh. 24:2A nta'u ko'osio poparentaano, a wula kohopulu, tanggala hopulu wula atuu, haweomo i Nebukanesa, mokole i Babeli, saru luwuno sorodaduno sumapoio Yerusale. Ondae mpekema mengkaduo ka mpowangu rere watu pongkadua lumimbuo. 5Kanatuumo kota atuu tekadu hawe ta'u kohopulu ka asa poparentaano Mokole Sedekia. 6A ntanggala osio wula ko'opaa, mokoninggoa tekense mongkokongiri i kota atuu ka nahina mbo'u kaanga a mpalilino wita atuu. 7#Yeh. 33:21Rere watuno kota atuu binolo ka luwuno sorodadu mpolai, mpeluarako inso a ngkota i tempono wongi melaloo pewowa langkai i olono orua rere watu anu kongko umpeda bonde bungano mokole, kontongaado to Kasidimi mengkaduo kota atuu. Ondae melako nte'aro i Araba-Yarade. 8Sine, sorodadudo to Kasidimi melampuio mokole ka mehaweo i Sedekia i lembono Yeriko. Luwuno sorodaduno ntesiarawo mebintao. 9Domerakoo mokole ka mewawao i Ribela i wita Hamati, ndi mokole i Babeli, anu modontaiakono hukuno. 10Mokole i Babeli sumumbele ira anano i Sedekia i arono matano; saru mbo'u luwuno mia pinemota'udo to Yehuda isumbele ira i Ribela. 11#Yeh. 12:13Ipokomorawuo matano i Sedekia ka ponguakono rante mala. Ka i'amba onae winawa i Babeli iwawao mokole i Babeli ka numaao a raha pohukua hawe oleo mateano.

12A ntanggala hopulu wula ko'olima, ta'u kohopulu ka osio poparentaano i Nebukanesa, mokole i Babeli, haweomo i Yerusale i Nebusaradani, petewawa sorodadu podagai mokole, anu mekakaakono mokole i Babeli. 13#1Mok. 8:9Onae sumongkoo Raha-Do i Ue, rahano mokole ka luwuno raha i Yerusale; luwuno rahado anu langkai potorono isongkoo. 14Luwuno rere watu lumimbuo kota Yerusale dompobangkuo luwuno sorodadudo to Kasidimi anu mentondao petewawa sorodadu podagai mokole atuu. 15Asa ntia inso a mpalili mongkokolaro ka luwuno palili anu da mentuwu da mpo'ia i kota atuu, saru luwuno mia anu mpe'asambaliako ndi mokole i Babeli ka luwuno puu mpo'angga anu tebinta iwawa ira i Nebusaradani, petewawa sorodadu podagai mokole atuu a pontadia. 16Butu ba'opia mia mongkokolaro tuwudo inso i wita atuu ibintao i Nebusaradani, petewawa sorodadu podagai mokole atuu, ka domegagi mpo'angga lere anggoro ka mpelere.

17 # 1Mok. 7:15-47 Luwuno mbo'u karu malano Raha-Do i Ue ka kareta pontumbo ka ”Tahi” mala anu kongko a Raha-Do i Ue domempehao to Kasidimi ka luwuno malano winawa i Babeli. 18Dome'ala ira kawali, sikopa, piso, loea kodei ponsiwui, sangkiri, ka luwuno parewa mala anu pinake a mpoweweua pesomba. 19Luwuno mbo'u kusi, polu pontunua halo, loea kodei ponsiwui, kawali, hulu mekaru, sangkiri ka piala, luwuno anu inso a wulaa ke maupo inso a nsalaka, i'ala ira petewawa sorodadu podagai mokole atuu. 20Orua karuno atuu, ”Tahi” anu asa atuu, ka hopulu ka orua sapi mala anu kongko i totono kareta pontumbo, anu wineweuno mokole Salomo tiano Raha-Do i Ue, luwuno parewa andio nahi pinokotimba malano. 21Luwuno mbo'u karuno atuu, asa karuno hopulu ka oalu hiku mantandeno ka ipokowewesio koloro anu ondauno hopulu ka orua hiku. Karuno atuu mokapano opaa wunga ngkae ka mooa i larono. 22I wawono hinao uluno karuno inso a mala. Mantandeno uluno karuno anu asa atuu olima hiku, ka ramba-ramba buani saru wua-wua delima hinao i wawono lumimbuo uluno karuno atuu, luwuno inso a mala. Kanatuu koa mbo'u karuno anu ko'orua ka wua delimano. 23Hinao sio pulu ka onoo wua delima me'aro a opaa pe'aroano mata angi gambara memungku. Luwuno wua delima hadiono asa etu lumimbuo ramba-ramba buani atuu megambara memungku.

24Ka i'amba petewawa sorodadu podagai mokole atuu rumakoo i Seraia, petewawado sando mpesomba, ka i Sepania, sando mpesomba i totono, saru otolu podagai pewowa. 25Onae mbo'u rumako ira inso a ngkota atuu asa mia pegawai langkanae petewawado sorodadu, opitu puu pompekakakodo mokole anu hinawe i kota atuu, ka puu mpoburino tadulako sorodadu anu winso ira palilino wita atuu gagi sorodadu, saru nomo pulu mia palilino wita atuu anu hinawe i tongano kota atuu. 26I Nebusaradani, petewawa sorodadu podagai mokole, morako ka wawa ira ndi mokole i Babeli, i Ribela. 27Ka i'amba mokole i Babeli metena mepate ira i Ribela, i wita Hamati. Kanandiomo to Yehuda mewinawa inso i witado lumako a pontadia.

28Ndiomo hadiono palili anu winawano i Nebusaradani a pontadia: A nta'u ko'opitu, tolu nsowu rua pulu ka otolu to Yehuda; 29a nta'u kohopulu ka oalu tempono i Nebukanesa, halu etu tolu pulu ka orua mia inso i Yerusale; 30a nta'u korua pulu ka otolu tempono i Nebukanesa, winawano i Nebusaradani, petewawa sorodadu podagai mokole a pontadia, pitu etu pato pulu ka olima to Yehuda. Porokono luwuno pato nsowu ka nomo etu mia.

I Yoyakini pinehohawa

52:31-34

(2Mok. 25:27-30)

31A nta'u kotolu pulu ka opitu umarino tinadi i Yoyakini, mokole i Yehuda, a ntanggala rua pulu ka olima wula kohopulu ka orua, i Ewili-Merodaki, mokole i Babeli, a nta'u ipewuatako a ngkadera poparentaa, mopokitao pompehohawano ndi Yoyakini, mokole i Yehuda, saru motolao inso a torungku. 32I Ewili-Merodaki mepau momoiko saru onae ka moweeakono pentoroa anu lalu mantande sekonopo pentoroado mokole anu perongano i Babeli. 33Onae moiko i'euo sangkano a torungku ka moikoomo mpiha ipongkaa i arodo mokole asa ntinuwuno. 34Mongkona pontiangi tambo, mokole i Babeli wela moweeakono, luwuno anu kinereno sompo oleo, asa ntinuwuno, hawe oleo mateano.

Currently Selected:

Yeremia 52: XMZ

Highlight

Copy

Compare