Ponsabangi 1
1
Tekaleno ka boni-bonino Yerusale
1:1-22
1Ha, tedoa tensia kota atuu,
anu i ndi'ipua maroa!
Kanamo asa tuwu beine onae,
anu i ndi'ipua maramba i olodo luwuno tongku.
Anu i ndi'ipua mokole beine i olodo luwuno kota,
kanandio-andio gagi pine'ata.
2Ia wongi onae sensedu mengese,
uwoi matano tewaa a kombisi;
inso a luwuno pinehohawano,
nahina maupo te'asa mia anu tumareroo.
Luwuno walino nahi dompetenunu,
ondae megagi iwalino.
3Yehuda domebintaomo palilino
hangano marasai ka hangano pompe'ata anu mobea;
onae mo'ia i tonga-tongano luwuno tongku,
sine nahi pohawe rodoa;
isemamo koa anu monsapoi mokompewinsokio
tempono itepakada.
4Luwuno sala lumako i Sioni bukeako pompemasusa,
hangano nahina anu me'aiwa a mporame-ramea;
boni-boniomo luwu pewowa langkaino,
mpompau iramo pinemasusado sando mpesombano;
tedoa iramo pompemasusa ana beineno;
ka onaeno tedoa masusa aroano.
5Luwuno anu me'ewaio pabawaio,
luwuno iwalino mempo'unde.
Mentee ntu'u, Ondae i Ue weweuo boni-boni,
hangano hadio salano;
nana'oteno mpelempa i arodo iwali
gagi mia mentinawa.
6Tampulaomo inso a ana beine Sioni
luwuno marambano;
Petewawano kana iramo rusa
anu nahi pohawe pada ewo;
ondae mpelempa nahina roso i arodo anu lumulu ira.
7Terorambeomo Yerusale,
a luwuno oleo tebobarasai ka marasaiano,
a luwuno arataa
anu pine'ueno i ndi'ipua;
tempono palilino ntedonta a ngkaedo iwali,
ka nahina tumulungio,
luwuno iwali mengkitao, ka mpengingisi
hangano tekaleno.
8Yerusale tedoa tehala,
onaemo ka imokoburu;
i ndi'ipua luwuno anu mpelangkaio, kanandio-andio mentetewehio,
hangano domengkitao kolambe-lambeno;
ka onae isa'a mompau pinemasusano,
ka iwolilio rupano.
9Mokoburuno metako a tompa sawuno;
nahi ipewowoloo poko'ariano,
tedoa ondalo itedonta,
nahina mia tumareroo.
”Oo, Ue, kitaomo tebobarasaiku,
hangano iwaliku mompelangka-langkai!”
10Ewaino weroo kaeno
a luwuno arataano;
tendeano ka ikitao kana'umpe luwuno tongku
dompewinso a laro mpo'ianga memporino,
kahinaano Omiu, oo Ue, i'onto iramo
ka dompewinso bawaa-Miu.
11Mpopau ira pinemasusado luwuno palilino,
tekonai ira mpo'ungke roti;
arataa dompeweengakono euno kaanga,
ka itesombu tuwudo.
”Ikitaomo, oo Ue, Ipensiroiomo,
ongkue andio tedoa mokoburu!
12Nahinake pomperiomiu luwuno anu ntelalo?
Imengkitaomo,
hinaoke pompemasusa kana pompemasusa
anu Doweeakune i Ue,
weweu aku marasai
tempono tekuda-Do tensila!
13Inso i wawono Do'oliwio api
mewinso a laro wukuku;
Dopontendeakono buani a ngkaruku,
weweu aku monsuka;
Ondae mokontededengke aku,
mompemahaki asa oleo.
14Luwuno salaku hinowu gagi pasanga,
wineweuno kae-Do i Ue,
ninaa a wawo banga we'uku,
ranta ka imolema koroiku;
ongkue Dopeweengakonomo i Ue a ngkaedo mia,
anu nahi kupoko'ewaio.
15Dotadio luwu i Ue puu mpeteaku
anu kongko a mpetengi-tengiku;
Ondae mompoboi tepumpuano mia umewai aku
rumopu ira mangalitauku;
Dololandaomo i Ue ana beineno Yehuda, ana beine atuu,
kana monsesa anggoro.
16Onaemo ka kupengese,
mataku mompowaa uwoi;
hangano olai pontarero inso ndi ongkue
anu mompokomadoo sumangaku;
ntededengke iramo anaku,
hangano iwaliku tedoa moroso.”
17Sioni tumineo kaeno,
sine nahina tumareroo;
mongkona i Yako, Ondae i Ue tumena
ira mia petengi-tengino gagi ewaino.
Yerusale gagi mokoburu
i olodo.
18”Ondaemo i Ue anu mentee,
sine ku'ewaiomo pau-Do;
rongeomo hei luwuno tongku,
ka kitaomo pompemasusaku;
luwuno ana beineku ka mangalitauku
melako gagi mia mentinawa.
19Kupoboi ira pinehohawaku,
sine domempopandei aku.
Luwuno sando mpesombaku ka mia pinemota'uku
memate iramo a ngkota,
tempono dompo'ungke kaangado
ka itesombu tuwudo.
20Oo, Ue, Ikitaomo, tedoa aku masusa,
aroaku nahi rodo;
aroaku tewowalite a laro radaku,
hangano lansaraomo pe'ewaku;
i bungkuno, ponai mepate ira inule,
a laro raha, matea.
21Ondae merongeo tedoa pompemasusaku,
sine nahina tumarero aku;
domerongeo iwaliku mongkona masolaaku,
ka ondae mpo'unde hangano ndi Omiu insoano!
Po'ineeomo ka ihawe oleo anu Ipakosiomo atuu,
ka po'ineeomo ka domegagi kana ongkue!
22Po'ineeomo wineweudo anu mosa'o hawe i aro-Miu,
ka weweuomo ndi ondae,
kana anu Iweweuomo ndi ongkue
hangano luwuno salaku;
hadio ntu'u pompemasusaku,
ka mahakino aroaku.”
Currently Selected:
Ponsabangi 1: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
