Yeremia 51
51
Luwuno tongku inoluako umewaio Babeli
51:1-33
1Mepau Iramo i Ue,
”Menteeano, Aku lumeluo
ndi Babeli, a mpalilino witado to Kasidimi,
asa roso poropu.
2Aku tumena ira puu mpoduku melako i Babeli anu ta dumukuo
ka anu ta rumoahi morinao witano,
hangano domengkaduo inso a luwuno siuno
a oleo masolaa.
3Asalakono puu mpepana motosio panano
a mia anu mompotosi
ka a mia anu melemba labu!
Si mpehohawa ira mangalitauno,
ropu iramo luwuno sorodaduno!
4Mia anu mempinepate ta matumbole i witado to Kasidimi
ka anu mapari mobelano a luwuno pesalaano,
5sekono Isaraeli ka Yehuda nahi Dobintao
Ue Alano, Ue Alano luwuakoano gagi tuwu beine,
hangano witado to Kasidimi atuu bukeako sala
ndi Ondae Anu Tedoa Mempori, Ue Alado to Isaraeli.
6Polaimo inso i tonga-tongano Babeli,
asalakono sompo mia kumaduduio penaano,
ka si merinopu hangano salado!
Hangano onaemo andio tempo pombaloa-Do i Ue;
Ira mompowee pohuku ndi onae.
7 #
Meng. 17:2-4; 18:3 Babeli horio gagi piala wulaa a ngkae-Do i Ue
anu mokomolanguo asa wawontolino.
Luwuno tongku mpo'inu anggorono,
onaemo pu'uno luwuno tongku gagi mpekombe.
8Mepobingko Babeli tedonta ka terawo-rawo.
Sabangiomo onae!
Alaomo balasee pakulino mobelano,
bara'ura ta koa tompa!
9 #
Meng. 18:5
Kami mpokotompao Babeli,
sine nahi ta tompa.
Bintaomo onae,
aiwamo tompekule singge mia lumako i witano!
Mentee ntu'u, pohukua haweomo i langi,
tehaweomo a nseru!
10Doweweuomo i Ue mengkaa luwuno menteeto;
aiwamo tomentutuluo i Sioni
wineweu-Do Ue, Ue Alato!
11Pokomontasoomo ana mpana,
patinda iramo kanta!
Doleluomo i Ue rosodo luwuno mokoledo to Midia,
hangano tinoo-Do a nto Babeli onaemo ira rumopuo:
onaemo pombalo-Do i Ue, pombalo hangano raha mempori-Do!
12Tandeako iramo bandera luwuno rere watuno Babeli,
pokorosoomo podagaia!
Naa iramo puu mpodagai,
patindaomo pontowokia!
Hangano, Dosongkaomo i Ue ka weweuo mbo'u
hapa anu pinau-Do te'aro a mpalilino Babeli.
13 #
Meng. 17:1
Hei omue anu mo'ia umpeda uwoi anu hadio ntu'u,
anu hadio ntu'u a laro ngkaea,
tompaano tumuwumu haweomo,
tidano tumuwumu haweomo!
14Ondae Ueno luwuakoano mesumpa Iramo a nee-Do Ondae-Do:
Maupo Kuweweuko bukeako mia kana kosume,
sine mia ta mebooliako pohio ponangiamu.
15Ondaemo i Ue anu mokogagiakono roso-Do tolino,
saru ponto'ori-Do tumeahakono wawontolino,
ka saru molinono pompewowolo-Do wileo langi.
16Tewala Dopoporongeo suara-Do, u'uruomo uwoi i langi.
Ondae wuatakono gawu inso i tompano tolino,
mepansariako koliki tumondao usa,
ka wawao angi meluarako inso a mponaapa-Do.
17Sompo mia mengkaa benge-benge, nahina ponto'orino,
ka sompo anu pande mo'angga wulaa gagi mokoko'ii hangano tinaha wineweuno.
Hangano tinaha tinawa butu pompopo'oo,
nahina penaa i larono.
18Luwuno atuu nahina pengkonaano,
inangga anu gagi pompasinggiri,
ka ta tampula i tempo pohukuano.
19Komba kanatuu Ondae anu gagi Tiano i Yako,
hangano Ondaemo anu weweuo luwuakoano,
ka Isaraeli onaemo sukuno mia-Do;
Ondae Ueno luwuakoano onaemo nee-Do!
20Omuemo palu langkai-Ku, parewa mpetea:
Saru omue Aku merawo-rawo ira tongku,
saru omue Aku rumopu ira poparentaa,
21saru omue Aku merawo-rawoo ngara ka anu mesawikio,
saru omue Aku merawo-rawoo kareta ka anu me'ulaio,
22saru omue Aku merawo-rawoo tama ka beine,
saru omue Aku merawo-rawoo mia mota'u ka mia mongura,
saru omue Aku merawo-rawoo mangalitau ka ana beine,
23saru omue Aku merawo-rawoo puu mpopakambi ka bawaano bimbano,
saru omue Aku merawo-rawoo puu mpelere ka sapi pompadekono,
saru omue Aku merawo-rawo ira petewawano wita pinabawaino ka anu mempabawa!
24Aku mombalo ndi Babeli ka a luwuno palilino witado to kasidimi hangano luwuno mosa'oa anu domeweweuomo ndi Sioni, i arono matamu, kanandiomo pau-Do i Ue.
25Menteeano, Aku gagi ewaimu, hei torukuno poropu,
kanandiomo pau-Do i Ue,
anu rumopuo asa wawontolino!
Aku tumandeo kae-Ku ndi omue,
lumundiko inso a pongku watu,
ka weweuko gagi torukuno api anu mateomo.
26Mia nahi ta umalao watu siuno ke watu pondasi inso ndi omue,
sine omue kogagi po'ianga anu boni-boni nahina tampulaano,
kanandiomo pau-Do i Ue.
27Tande iramo bandera i tolino,
puuriomo tawuwua i olodo luwuno tongku,
patinda iramo tongku umewaio Babeli,
tena iramo poparentaa umewaio:
Arara, Mini ka Asikenasi!
Potoroomo asa mia tadulako umewaio,
wawa iramo ngara kana bawaano kosume!
28Patinda iramo tongku umewaio,
luwuno mokoledo to Midia saru luwuno petewawano wita pinabawaino ka luwuno anu mempabawa,
saru mbo'u wita anu i totono pabawano!
29Tolino lelu ka mondidi-ndidi,
hangano tinoo-Do i Ue te'aro i Babeli kontongaano inangga,
ta wineweu wita Babeli
gagi londa nahina palili.
30Luwuno sorodaduno Babeli mpenaa-naa iramo mpetea,
ondae mpo'ia mpiha a luwuno bente pekorahakoa.
Mosiado tampulaomo,
ondae megagi kana beine.
Luwuno po'iangado sinongkoomo,
luwuno lansono pewowado tepuduomo!
31Tinena anu asa molai tepohaweakono anu susua,
puu mpowawa lele anu asa tepohaweakono anu susua,
ka ipaleleo ndi mokole i Babeli,
nine kotano pinongko'alaomo inso a luwuno siuno,
32luwuno pesakiakoa pinentorokiomo,
luwuno epe pekorahakoa sinongkoomo,
ka luwuno sorodadu medoito.
33Hangano kanandiomo pau-Do Ueno luwuakoano, Ue Alado to Isaraeli:
Ana beineno Babeli kana ponsesaa
tempono ilinolanda!
Nahi tehine mbo'u ta hawe
tempono sumowi.
Babeli hinuku hangano imokoburuakono Isaraeli
51:34-44
34Ongkue kinaa, irawoo i Nebukanesa, mokole i Babeli,
iweweuo kana mangko mooa.
Onae tumele aku kana ule naga,
onae umihiiakono kompono kaangaku anu mo'ahi,
ka i'amba lumua aku.
35Po'ineeomo pontunduhi ndi ongkue ka pe'etuku umaluo Babeli,
potaedo palilino Sioni,
po'ineeomo reaku ka i'alu ira palilino witado to Kasidimi,
potaeno Yerusale.
36Onaemo pu'uno, kanandiomo pau-Do i Ue:
Menteeano, Aku kumorahakono kara-karamu,
ka moweweuakomu pombaloa:
Aku mokomo'areo tahino
ka weweuo mata uwoino mo'are;
37Babeli ta gagi howuno anu terawo,
pewuniado serigala,
asa anu mongkokongiri ka ipomisuakono,
hangano nahina palili.
38Ondae mperonga-ronga mpengaoli kana singa mongura,
bamburu kana anano singa.
39Tempono inehedo haweakoomo ntu'u, Aku mompatindaako ira inua,
weweu ira memolangu, onaemo ka dotedoa memawongko
ka do'amba ntekoturi mpiha,
nahi dompewangu mbo'u, kanandiomo pau-Do i Ue.
40Aku mobangku ira ka domensinumbele kana anano bembe,
kana luwuno bimba lakino ka bembe lakino.
41Sesaki tedoa pinau,
ka wita inunde-unde i asa wawontolino pinentoroki!
Babeli tedoaomo gagi
mongkokongiria i olodo luwuno tongku!
42Tahi mewuatakoomo sumampuo Babeli,
luwuno bombano anu u'uru isampuomo.
43Luwuno kotano gagiomo po'ianga londa,
gagi wita anu motu'i ka pada malua,
wita anu nahi po'iangario maupo isema
ka maupo te'asa mia nahi telaloio.
44Aku humukuo Pinesombai Bela i Babeli,
ka lumuarakono inso a ngangano hapa anu tineleno.
Luwuno tongku nahi ira mewaa mbo'u ndi onae;
rere watuno mbo'u Babeli tehoaomo.
Dandi tepotolaano Isaraeli inso i Babeli
51:45-58
45Peluarakomo inso i tonga-tongano, hei bawaa-Ku!
Asalakono sompo mia kumaduduio penaano
inso a ntekuda-Do i Ue anu tensila atuu!
46Si mondende aroamu ka doito hangano lele anu teronge i wita andio: tewala ta'u andio hawe lele andio, ka ta'u tudano lele atuu, tewala gagi pontunduhia i wita andio ka anu mempabawa umewaio anu mempabawa. 47Onaemo pu'uno menteeano, tempono ta hawe, Aku humuku ira tinahano Babeli. Luwuno witano ta gagi mokoko'ii ka luwuno miano anu pinepate ta matumbole i tonga-tongano. 48#Meng. 18:20Langi ka tolino saru luwuno anu kongko i larono ira mpebooli memawongko mongkona Babeli, tempono anu mponsolangi mehawe ndi onae inso i utara, kanandiomo pau-Do i Ue. 49#Meng. 18:24Babeli ta tedonta hangano to Isaraeli mempinepate mengkena kana tedontado mia anu mempinepate i asa wawontolino hangano Babeli. 50Omiu anu mentola inso a mponai, imelakomo, si butu mpentade! Pewowolo Iramo i Ue inso olai ka po'ineeomo Yerusale ka ipe'umbaako mbo'u a laro mpinewowolomiu. 51Omami memokoko'ii, hangano mporonge kamimo pontetewehi, mokoko'iia mokoburutio rupamami, hangano dompewinsokiomo mia mehawe luwuno po'ianga mempori a Raha-Do i Ue. 52Onaemo pu'uno menteeano, tempono ta hawe, kanandiomo pau-Do i Ue, nine Aku humuku ira tinaha lahumoano, ka luwuno witado mia anu mentinobo ta meraali. 53Maupo mewuatako i langi Babeli ka weweuo mantandeno benteno nahi pinokorangkuhi, a parenta-Ku ira mehawe ndi onae anu mponsolangi, kanandiomo pau-Do i Ue. 54Rongeo! Peraali inso i Babeli ka terawoa langkai inso i witado to Kasidimi! 55Hangano, Ondae i Ue sumolangio Babeli ka mokompenaa-naao suarano anu langkai. Maupo luwuno bombano umu'uru kana uwoi anu langkai ka moluarako unino u'uru, 56sine i Babeli ta hawe anu monsolangi. Luwuno sorodaduno ira merinako ka luwuno panado ta pinudu, hangano Ondae i Ue onaemo Ue Ala anu mombalo, manasaomo Ira moweweu pombaloa! 57Aku weweu ira memolangu mia pinemota'uno, luwuno miano anu pande mosongka, luwuno bupatino, anu mempabawa, ka luwuno sorodaduno, ranta ka dontekoturi nahina tampulaano, ka nahi ira mpewangu mbo'u, kanandiomo pau-Do Mokole, Ueno luwuakoano nee-Do.
58Kanandiomo pau-Do Ueno luwuakoano:
Luwuno rere watuno Babeli anu mokapa
ta pinokomerete,
ka luwuno pewowa langkaino anu mantande
ta sinongko.
Luwuno tongku mpe'iseiako anu nahina tuduno
ka luwuno suku tongku tiano api,
ka ondae nahina rosodo.”
Pontadia wunta pinau anu ta gagi mongkona terawono Babeli
51:59-64
59Pe'oliwi anu iweeakono Nabi Yeremia ndi Seraia anano i Neria anano i Mahasea, tempono i Seraia lumako meronga i Sedekia, mokole i Yehuda, i Babeli a nta'u ko'opaa poparentaano. I Seraia onaemo petewawa sombori langkanae. 60Iburiomo i Yeremia a laro asa wunta luwuno masolaa anu ta umaluo Babeli, luwuno pau anu binuri mongkona Babeli. 61Motae i Yeremia ndi Seraia, ”Tempono uhawe i Babeli, pete'umalao ka upokobasao luwuno pau andio. 62Ka i'amba pepaumo: Ondae i Ue, mepau Komiumo mongkona po'ianga andio nine Komiu mokotampulao, ranta nahina mbo'u anu mo'ia i larono, moiko mia maupo pinotuwu, ka po'ianga andio ta gagi boni-boni nahina tampulaano! 63#Meng. 18:21Tewala umarikomo basao wunta andio, tanggoomo asa watu ndi onae, ka u'amba metadiakono i tonga-tongano Koro Eparata 64ka potaemo: Kanandiomo Babeli ta pinotondu ka nahi ta me'umbaako mbo'u, hangano masolaa anu Kupotiio ndi onae; nahina rosodo.”
Hawe i ndi'ai luwuno pauno i Yeremia.
Currently Selected:
Yeremia 51: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
