Yeremia 50
50
Mongkona Babeli
50:1-46
1 #
Yes. 13:1; 47:1 Pau anu pinohawe-Do i Ue molalo Nabi Yeremia mongkona Babeli, witado to Kasidimi,
2”Pauomo i olodo luwuno tongku ka paleleomo,
wuatako iramo bandera ka paleleomo,
si wunio, pauomo:
Babeli pinongko'alaomo,
Pinesombai Bela pinokoko'ii,
i Merodaki tededengke!
Luwuno tinahano pinokoko'ii,
luwuno lahumoano ntededengke!
3Hangano, asa tongku lumako sumapoio inso i utara,
weweuo witano gagi boni-boni;
nahina mbo'u anu mo'ia i larono,
moiko mia maupo kondehora,
luwuno melako mpolai.
4I tempo atuu,
kanandiomo pau-Do i Ue,
to Isaraeli ira mehawe,
mperonga to Yehuda;
ira mpelempa saru mpengese
ka umungke Ira i Ue, Ue Alado.
5Ondae mpesikenoakono sala lumako i Sioni,
i ra'aimo te'aroano rupado.
Ondae me'aiwa ka tepo'asaako Ira i Ue,
a laro mpedandia nahina tampulaano anu nahi ta kinolupe!
6Bawaa-Ku kana ira bimba ntetadi;
luwuno puu mpopakambido weweu ira ntesaa,
weweu ira mpelakopi a luwuno torukuno.
Ondae mpelempa inso a ntorukuno melako a pongku
ka mengkolupeo po'ianga pepomboleado.
7Isemamo koa anu tepohaweako ira, ikaa ira,
ka luwuno iwalido mpotae: Nahi kimensala!
Hangano mentehala iramo ndi Ondae i Ue,
po'iangano menteea,
Ondae i Ue, pomperorohiado uempu'udo!
8 #
Meng. 18:4
Impolaimo inso i tonga-tongano Babeli,
inso i witado to Kasidimi!
Peluarakomo! Gagimo kana luwuno bembe lakino
anu gagi petewawa a bawaano!
9Hangano menteeano, Ongkue lumeluo
ka mokotesingkao te'aro i Babeli
asa tepumpuado tongku langkai inso i utara.
Ondae mpo'atora baresi ira me'ewaio,
insomo i ra'ai kota atuu ta pinongko'ala.
Luwuno panado kana sorodadu anu pande ntu'u,
anu nahi hori mekule saru kae mooa.
10Witado to Kasidimi ta gagi rontua,
luwuno anu rumontuo ta tende aroano,
kanandiomo pau-Do i Ue.
11Maupo impo'unde ka memawongko ntu'u,
hei mia anu mporontu pine'ue-Ku,
Maupo impelonso-lonso kana ana nsapi a ntonga mpada,
ka mpekiili kana ngara lakino,
12sine, inemiu tedoa memokoko'ii,
beine anu mpe'anaakomiu ntekoko'ii!
Kitao, onae ta gagi anu pokotompa inso a luwuno tongku,
gagi pada one, wita motu'i, pada malua!
13Hangano tekuda-Do i Ue wita atuu nahi ta pino'iangi mbo'u,
luwuno ta gagi boni-boni.
Sompo mia anu lumaloo Babeli ta tekokodoho
ka momisu hangano luwuno petunduhi anu pinemahakino.
14Atoraomo baresimu sumapoio Babeli inso a luwuno siuno,
hei luwuno puu pompana!
Potolaomo pana te'aro ndi onae, si pesosalao ana mpana,
hangano onae tehala ndi Ondae i Ue!
15Peboolimo sapoio inso a luwuno siuno!
Onae metenangiomo, luwuno benteno ntebangkuomo,
luwuno rere watudo tehoaomo!
Mentee ntu'u, onaemo pombalo-Do i Ue!
Weweuomo pombaloa ndi onae,
weweuomo ndi onae kana anu umari wineweuno!
16Pokotampulaomo anu morawo inso i Babeli
ka anu sumowi i tempono konsowia!
Ka iteliahako inso a mponai poropu andio,
sompo mia ta mekule a tongkuno,
sompo mia ta molai lumako i witano.
17I Isaraeli kana bimba anu tesiarawo,
domensaario singa.
Amba-ambano mokoledo to Asuri kumaano, ka poko'ariano kanandio-andio i Nebukanesa, mokole i Babeli, kumarasi ira wukuno. 18Onaemo pu'uno, kanandiomo pau-Do Ueno luwuakoano, Ue Alado to Isaraeli: Menteeano, Aku humukuo mokole i Babeli ka witano, kana Kuhukuomo mokoledo to Asuri. 19Sine, Aku mokuleo i Isaraeli i tonga mpada, ka ipongkaa ewo i Karameli ka i Basani, ka imowohi i wawo mentorukuno Eparai ka i Gileadi. 20I tempo atuu, kanandiomo pau-Do i Ue, mia ta mo'ungke salano i Isaraeli sine nahi pohawe, ka halano i Yehuda sine nahi pohawe, hangano Aku umoniniako ira halado mia anu Kupo'inee ira mentuwu.
21Imelakomo mensapoio wita Merataimi,
ka mensapoio palilino Pekodi!
Pepate ira ka ropu iramo, kanandiomo pau-Do i Ue,
weweuomo kana ntu'u anu Kupeparentaako!
22Rurunduno peteaa i wita atuu,
terawo-rawoa langkai gagiomo!
23Tedoa tepuro ka terawo
paluno asa wawontolino!
Babeli gagiomo tedoa
mongkokongiria i olodo luwuno tongku!
24Aku monta'oakomu pompete'umala,
ka omue kona oho, hei Babeli,
nahi upokonto'orio.
Omue hinawe ka kona rako mbo'u,
hangano u'ewai Iramo i Ue.
25Do'ungkahiomo i Ue ponaapa parewa mpetea-Do
ka lumuarako ira parewa mpetea bamburu-Do,
hangano hinao anu asalakono Ira umanggao Ue Alano luwuakoano
i witado to Kasidimi.
26Sapoiomo inso a luwuno lakoa,
ungkahi iramo si'eno,
howuomo ihino kana hinowu ka ropuomo,
si hina anu da tuwu!
27Pepate ira luwu sapino,
po'ineeomo dompetii a mposumbelea!
Memasola iramo, hangano tempono haweomo,
tempo domehinuku!
28Rongeo! Luwuno anu Mpolai ka mia anu mentola inso i wita Babeli
aiwa mempauo i Sioni
mongkona pombalo-Do i Ue, Ue Alato,
pombaloa hangano Raha Mempori-Do.
29 #
Meng. 18:6
Wawa iramo puu pompana umewaio Babeli,
luwuno anu mompadii pana!
Impekemamo mengkaduo,
ka si hina anu tola!
Pombalomo ndi onae menunu saru wineweuno,
weweuomo ndi onae kana anu wineweuno!
Hangano onae mompelangka-langkai ndi Ondae i Ue,
ndi Ondae Anu Tedoa Mempori, Ue Alado to Isaraeli.
30Onaemo pu'uno, luwuno mangalitauno ira memate a luwuno tanalapano,
ka luwuno sorodaduno ira memate i tempo atuu,
kanandiomo pau-Do i Ue.
31Menteeano, Aku gagi ewaimu, hei omue anu mompelangka-langkai,
kanandiomo pau-Do Ueno luwuakoano,
hangano haweomo tempomu,
tempono Aku humukuko.
32Mia anu mompelangka-langkai atuu ta tetidu tedonta
ka nahina anu tumandeo.
A luwuno kotano Aku molangao api
anu ta kumaano luwuno anu a mpetengi-tengino.
33Kanandiomo pau-Do Ueno luwuakoano: To Isaraeli tepokonsii meronga saru to Yehuda. Luwuno mia anu mentawa ira kongko tumaha ira, nahi dobehe mpotola ira. 34Sine Puu Pontolosido moroso, Ondae Ueno luwuakoano nee-Do. Manasa Ira tumeahakono kara-karado, ka Dopoweeakono rodoa i tolino, sine tewukaa a mpalilino Babeli.
35Ponai ta umalu ira to Kasidimi, kanandiomo pau-Do i Ue,
umalu ira palilino Babeli,
umalu ira mia pinemota'uno ka luwuno miano anu mponto'ori mentee!
36Ponai umalu ira mia mompau nahi manasa ta gagi,
ka mengkaaomo mebenge-benge ira!
Ponai umalu ira sorodaduno,
onaemo ka domedoito!
37Ponai umaluo ngara ka karetano,
umalu ira sorodadu mentinambo anu i tonga-tongano,
onaemo ka domegagi kana beine!
Ponai umaluo ponaapa arataano,
onaemo ka dompomuruo mia!
38Ponai umaluo luwuno uwoino,
onaemo ka imo'are!
Hangano wita atuu witano luwuno tinaha,
ondae mpelelu kana mia mekombe a luwuno lahumoa!
39 #
Meng. 18:2
Onaemo pu'uno luwuno kondehora pada one saru dahu a ntobu ira mpo'ia i ra'ai, kanatuu koa mbo'u manu-manu unta ira mpo'ia i larono. Wita atuu kanatuumo mpiha nahina mbo'u mo'iangario ka nahi ta pino'iangario mbo'u mapa'api-api inule. 40#Teg. 19:24-25Kana i ndi'ipua i tempono Ondae Ue Ala wowangunsuleo Sodomo ka Gumora saru luwuno kota pehori-horino, pau-Do i Ue, kanatuumo nahi ta hina mbo'u mia anu rodo i ra'ai ka maupo te'asa anano mia nahi ta mo'ia mbo'u i larono. 41Kitao, asa tongku ta aiwa inso i utara, asa tongku anu langkai. Hadio mokole ira mpelelu me'aiwa inso i tompano tolino. 42Ondae mpompake pana ka kansai; ondae melambaha ka nahi domponto'ori mpompehohawa. Suarado kana u'uruno tahi, ondae mpesawi a ngara, te'atora kana mia lumako metea, umewaiko, hei ana beine Babeli! 43Irongeomo mokole i Babeli mongkona ondae, kaeno gagiomo molema, ipabawaio ma'isoa, mompemahaki kana beine anu me'ana. 44Menteeano, kana singa meluarako inso a ntobu mongurano Koro Yarade sumapoio pada pompakambia, kanatuumo Aku weweu ira mpepobingko mpolai inso i wita atuu ka mpotoroo onae anu bininiki-Ku. Hangano isemake anu kana Ongkue? Isemake anu mosia tumuntu Aku? Isemake puu mpopakambi anu polio umaropi Aku? 45Onaemo pu'uno rongeomo pomputusi anu Do'alaomo i Ue tiano Babeli ka luwuno tinoo anu Doweweuomo tiano witado to Kasidimi: Menteeano, maupo anu lalu molema i olodo bawaano bimba ta rinende. Menteeano, pada pompakambiado ta mongkokongiriako ira. 46Tolino ta lelu hangano lele nine Babeli pinongko'alaomo; ponsabangido ta teronge i olodo luwuno tongku!”
Currently Selected:
Yeremia 50: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
