Yeremia 4
4
1”Tewala beheko mepokule, hei Isaraeli, kanandiomo pau-Do i Ue,
Pepokulemo ndi Ongkue.
Tewala beheko tumadi ira lahumoamu anu mokoburu inso i aro-Ku,
siimo te'embi-embi!
2Tewala a laro mpetenunu, moleoa, ka menteea upesumpa:
A nee-Do i Ue anu tuwu!,
asalakono luwuno tongku ira merinonso ndi Ondae
ka mpo'unde ndi Ondae.”
3 #
Hos. 10:12
Hangano, kanandiomo pau-Do i Ue a nto Yehuda ka a mpalilino Yerusale:
”Impo'anggamo wita anu wo'ohu,
ka si mporawo inii a olono ewo rui.
4Tindiomo aroamu ndi Ondae i Ue,
ka liahakonomo kulino anuno,
hei to Yehuda ka palilino Yerusale,
ka si tekuda-Ku montiu kana api, ka melanga nahi tepepate,
hangano luwuno wineweumu anu mosa'o!”
Yehuda mohawe pompokodoito inso i utara
4:5-31
5Paleleomo i Yehuda
ka popoto'oriomo i Yerusale:
Puuriomo tawuwua a wita,
peboolimo temeroku ntu'u,
”Pepumpumo ka aiwamo tomelako
a luwuno kota mebente!”
6Tandeomo luwuno bandera te'aro i Sioni!
Pontuturakomo mpelimba, si butu mpo'ia!
Hangano Aku mompotii masolaa inso i utara
ka terawoa anu langkai.
7Singa me'umbaakoomo inso a ntonga ewo,
anu ta rumopu ira tongku melungkaomo,
meluarako inso a mpo'iangano
ta weweuo witamu boni-boni;
luwuno kotamu gagi howuno anu terawo nahina palilino.
8Onaemo pu'uno pokonaomo sawu po'inombo,
pengesemo ka ponsabangimo;
hangano tekuda-Do i Ue anu tensila
nahi ta menaa-naa inso ndi ontae.
9”I tempo atuu, kanandiomo pau-Do i Ue,
mokole ka luwuno mia pinemota'u ta tetadi rosodo;
luwuno sando mpesomba ira ngkondoro-ndoro
ka luwuno nabi ira ntekokodoho,
10saru mpotae: Oo, Ue Ala,
mentee ntu'u, tedoa Komiumo mopo'oo
tongku andio ka palilino Yerusale,
motae: Rodoa ta kongko ndi omiu,
kahinaano ponai mokodoitoo penaamami!”
11I tempo atuu ta pinau
a tongku andio ka palilino Yerusale,
”Angi mokula inso a luwuno pongku londa i pada one
mepuuri te'aro a ana beine bawaa-Ku;
komba poduku ka komba pompokomorina,
12angi anu mokora atuu hawe inso i ra'ai a parenta-Ku.
Kanandio-andio Ongkue isa'a
mompotiiako ira pohuku.”
13Kitao, onae mewuatako kana seru,
luwuno karetano kana angi mokora,
ngarano magasiopo sekono rajawali.
Memasola kitamo, hangano mempinepate kita!
14Pokomorinaomo aroamu inso a wineweu mosa'o, hei Yerusale,
ka ukinadudui!
Opiapo mbo'u tehineno ipo'ia i laro aroamu
luwuno tinoomu anu mosa'o?
15Rongeo, Mia paleleo inso i Dani,
mopoto'orio masolaa inso i mentorukuno Eparai.
16Popoto'oriako iramo luwuno tongku: Mentee ntu'u onae aiwa!
Paleleomo i Yerusale,
”Luwuno anu mpongkadu me'aiwa inso i wita anu olai,
mpoporongeo suarado a luwuno kotano Yehuda.
17Kana mia anu modagai lere domelimbuo,
hangano Yehuda umewaomo ndi Ongkue, kanandiomo pau-Do i Ue.
18Pelelumu ka wineweumu
pepu'uano ka i'aluko luwuno andio.
Onaemo hukumu, mopa'i ntu'u,
ranta dumuhuo atemu.”
19Adoo, radaku, radaku! Ongkue memoluki mompemahaki!
Adoo, rereno huleku!
Huleku mondende,
nahi kupokomomperodo,
hangano kurongeo unino tawuwua,
pohio mpetea.
20Terawo-rawo pinalele,
luwuno wita bineta;
kemaku mansa bineta,
tendaku i larono asa mpiniro.
21Opiapo mbo'u tehineno kukita ira bandera,
ka rumongeo unino tawuwua atuu?
22”Mentee ntu'u, bawaa-Ku atuu mebenge-benge,
nahi domento'ori Aku!
Ondae onaemo nana'ote monge-monge,
nahina tino'orido!
Ondae pande mpoweweu mosa'o,
sine nahi domponto'ori mpoweweu moiko.”
23Kukitao tolino, mengkaa napi hina tadeno ka nahi te'atora,
ka mengkita i langi, nahina mewineno.
24Kukita ira torukuno, mengkaa tewembo;
ka maupo luwuno pongku ntelelu.
25Kukitao, mengkaa nahina mia,
ka luwuno manu-manu i laromeene mpenee iramo mpolai.
26Kukitao, mengkaa wita mewalo gagiomo pada one,
ka luwuno kotano tekale-kaleomo i aro-Do i Ue,
i arono tekuda-Do anu tensila.
27Hangano kanandiomo pau-Do i Ue,
”Luwuno wita andio ta gagi boni-boni,
sine nahi Aku weweuo ka ipingko luwu.
28Hangano mongkona andio tolino ta mompemasusa,
ka langi i wawono gagi wongi-wongi,
hangano Kupauomo, Kuposongkaakonomo,
nahi Aku me'o'oleakono ka nahi ta mepokule inso mongkona atuu.”
29Hangano peboolido sorodadu mpengara ka mpepana
luwuno palilino kota mpolai.
Mpewinso ira a laro ntonga ewo
ka mpewuatako a luwuno pongku watu.
Luwuno kota binintaomo
ka nahina maupo te'asa mia mo'ia i larono.
30Omue, anu pinokotampula,
hapake anu ta wineweumu,
tembio ka upompokona sangka motaha ntu'u,
rumamba-rambaakono peramba-ramba wulaa koroimu,
hahiakono matamu pohahi mata?
Nahina tuduno upokontekosio koroimu,
luwuno kinekewoimu nahi domebehe ndi omue,
tendeano dopontooakono penaamu.
31Mentee ntu'u, kurongeo suara kana pompemahakino beine me'ana,
pe'o'osuno kana suarano ine anu me'anaakono ana amba-ambano,
suarano ana beine i Sioni anu ngaasa,
anu padindio kaeno,
”Masola akumo, hangano telusa aku i arodo anu pompepate!”
Currently Selected:
Yeremia 4: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
