Yeremia 46
46
PINAU MONGKONA ANU TA GAGI A LUWUNO TONGKU SUSUA
LAMORO 46–51
Pau-Do i Ue mongkona luwuno tongku
46:1
1Pau-Do i Ue anu hawe ndi nabi Yeremia mongkona luwuno tongku.
Mongkona Masiri
46:2-28
2 #
Yes. 19:1-25; Yeh. 29:1–32:32 Mongkona Masiri.
Mongkona sorodaduno i Pirao Neko, mokoledo to Masiri, anu mpekema i wiwi ngkoro Eparata umpeda Karakemisi ka anu ninangino i Nebukanesa, mokole i Babeli, a nta'u ko'opaa poparentaano i Yoyaki anano i Yosia, mokole i Yehuda,
3”Patindaomo kanta langkai ka kanta kodei
ka lakomo petea!
4Patindaomo ngara,
ka pesawimo, hei luwuno anu mpesawi!
Alao po'iangamu saru pompake songko,
pokomontasoo kansaimu,
pakeo lemba labumu!
5Tembio kukita
ira medoito,
mpewolili mposuka?
Luwuno sorodadudo mentenangi,
mpolai ntesiarawo,
nahina mewolili;
mongkokongiria inso a luwuno lakoa! Kanandiomo pau-Do i Ue.
6Mia anu malempi nahi pokompolai,
sorodadu nahi dompokotola;
i utara, i wiwi ngkoro Eparatamo
dontetidu ka ntebangku.
7Isemake andio anu lulua kana koro Nili,
kana luwuno korono uwoino mebunde?
8Onaemo atuu Masiri, lulua kana Koro Nili,
kana luwuno korono uwoino mebunde.
Ipotae: Ineheku lulua tumutuwio tolino,
mepateo kota ka palilino.
9Imelakomo, hei luwuno ngara!
Imelakomo, hei luwuno kareta!
Imelakomo mpetea, hei luwuno sorodadu,
hei omiu to Etiopia ka to Puti
anu mpo'ini kanta,
ka to Lidia anu mpo'ini ka mpodii pana!
10Oleo atuu oleo-Do Ue Alano luwuakoano,
oleo pombaloa,
ka Dompombalo a luwuno iwali-Do.
Ponai ta montele ranta mowohi,
ka ta te'osa uminuo reado. Hangano Ondae Ue Alano luwuakoano moweweu ponsumbelea pesomba
i wita utara, umpeda Koro Eparata.
11Lakomo i Gileadi po'ala balasee,
hei ana beine, ana beinedo to Masiri!
Omue nahina tuduno mompake hadio pakuli,
nahi kotompa!
12Luwuno tongku merongeomo mongkona mokoko'iiamu,
tolino bukeako peboolimu,
hangano sorodadu anu asa tetidu a nsorodadu anu susua,
orua ira tebangku meronga-ronga.”
13 #
Yer. 43:10-13
Pau anu pinohawe-Do i Ue ndi Nabi Yeremia mongkona haweno i Nebukanesa, mokole i Babeli, ta numangio wita Masiri:
14”Pauomo i Masiri,
ka paleleomo i Migidoli!
Paleleomo i Memipisi ka i Tahapanahesi!
Potaemo: Alaomo po'ianga ka pepatindamo,
hangano ponai pingko ikaano anu i horimu!
15Tembio ka ipolai Pinesombai Apisi,
nahi polioke sapimu anu lakino atuu mekorahako?
Mentee ntu'u, onae Dopokompetuunduomo i Ue!
16Hadio i olomiu anu tetidu ka tebangku,
dompotae asa mia a anu susua:
Aiwamo tompekule a tongkuto,
i wita hinaato,
molaiakono ponai poropu!
17Pauomo neeno i Pirao, mokole i Masiri:
Puu mporisui anu mo'ineeo tempo telalo!
18A nee-Ku anu tuwu, kanandiomo pau-Do Mokole
anu nee-Do Ueno luwuakoano,
ira hawe kana Torukuno Tabori i olono luwuno torukuno,
kana Torukuno Karameli umpeda a ntahi.
19Patindaomo parewamu kolumako a pontadia,
hei ana beinedo to Masiri anu mpo'ia iramo i ra'ai!
Hangano Memipisi ta gagi boni-boni,
gagi terawo-rawo nahina palili.
20Masiri onaemo sapi mongura anu tekosi,
sine asa lale uso inso i utara hawe sumapoio.
21Luwuno mbo'u sorodadu mentinambo anu kongko ndi onae
kana ira anano sapi mewalo;
ondae mbo'u mpewolili ka mpolai mperonga-ronga.
Nahi dompokompekorahako,
hangano oleo masolaa umalu ira,
tempono domehinuku.
22Suarano kana pesiilino ule anu molai,
tempono Babeli lumako saru sorodadu;
ondae me'aiwa ndi onae mpowawa uase
kana luwuno puu mpontuehi keu.
23Ondae mentuehio tobuno, kanandiomo pau-Do i Ue,
maupo nahi pinokompewinsoki.
Hangano, mehadio irapo sekono kosume,
nahi pinokopau hadiono.
24Ana beinedo to Masiri pinokoko'ii,
pineweengako a ngkaedo tongku inso i utara.”
25Ondae Ueno luwuakoano, Ue Alado to Isaraeli, mepau, ”Menteeano, Kupompotiiakono pohuku a mpinesombaido to Amoni inso i Tebe, ndi Pirao ka Masiri saru luwuno pinesombaido ka luwuno mokoledo, oo, Pirao saru luwuno mia anu mpe'ala-alao. 26Aku meweengako ira a ngkaedo mia anu momporaakono penaado, a ngkaeno i Nebukanesa, mokole i Babeli, ka luwuno pegawaino. Sine, umarino wita atuu ta pino'iangario kana i ndi'ipua, kanandiomo pau-Do i Ue.
27 #
Yer. 30:10-11
Ka omue, siimo doito, hei tetenaa-Ku Yako,
siimo doito, hei Isaraeli!
Hangano menteeano, Ongkue kumaduduiko inso a mpo'ianga olai
ka inulemu inso a mpo'iangado mentinadi.
I Yako ta mekule ka tuwu sanaa
ka roodo, nahina mompokodoito.
28Omue siimo doito, hei tetenaa-Ku Yako,
kanandiomo pau-Do i Ue,
hangano Ongkue kumongkomiko:
Aku pingko ira luwuno tongku
anu i tonga-tongano omue Kusiarawoko,
sine omue nahi Aku mokopingkoko.
Aku tumunduhiko montonda songka,
Nahi Aku mo'ineeko tola kanatuumo koa.”
Currently Selected:
Yeremia 46: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
