Yeremia 35
35
Petenunudo to Rekabi gagi pandiri
35:1-19
1 #
2Mok. 23:36–24:6; 2Taw. 36:5-7 Pau inso ndi Ondae i Ue anu hawe ndi Yeremia i tempono i Yoyakimi, ana ntamano i Yosia, mokoledo to Yehuda, kanandio, 2”Lakomo a nsukudo to Rekabi, pepaumo saru ondae ka wawa iramo a Raha-Do i Ue, a asa bolongko, ka i'amba poweeako iramo mpo'inu anggoro!” 3Lumako akumo tumotowoo i Ya'asania anano i Yeremia anano i Habasinia saru luwuno pepaekompono ka luwuno anano, luwuno sukudo to Rekabi. 4Kuwawa ira a Raha-Do i Ue, a laro bolongkodo anano i Hanani anano i Yigadalia, tetenaa-Do Ue Ala. Onaemo atuu bolongko anu i asambalino bolongkodo mia pinemota'u, i wawono bolongkono i Maaseia anano i Salumi, puu mpodagai pewowa. 5I arodo miano suku Rekabi atuu kunaa ira piala buke anggoro ka hadio sangkiri, ka ku'amba motae ndi ondae, ”Tabeamiu impo'inumo anggoro!” 6Sine, mesangki ira, ”nahi kimpo'inu anggoro, hangano i Yonadabi anano i Rekabi, uempu'umami, moweeakamimo parenta, kanandio, ’Omiu ke luwuno anamiu si hori mpo'inu anggoro; 7si mpowangu raha, si mporawo inii; si mpoweweu ke hinao lere anggoromiu, tendeano omiu asalakono mpo'ia a luwuno kema asa ntinuwumiu, ka itehine imetuwu mpo'ia i wawo wita, po'iangamiu gagi mia mehawe!’ 8Kimentondao pauno i Yonadabi anano i Rekabi, uempu'umami a laro luwuno anu ipeparentaako ndi omami: ka si kimpo'inu anggoro asa ntinuwumami, onaemo omami, kombiamami, luwuno anamami tama ka beine; 9ka si kimpowangu raha po'iangamami, nahina lere anggoro ke bonde saru inii, 10tendeano omami mpo'ia a luwuno kema ka mpetenunu meweweuo kona ntu'u kana anu ipeparentaako i Yonadabi ndi omami, uempu'umami. 11Sine tempono i Nebukanesa, mokole i Babeli, aiwa sumapoio wita andio, mpotae kami: Aiwa tompolai melako i Yerusale, hangano sorodadudo to Kasidimi ka sorodadudo to Arami atuu! Kanatuumo kimpo'ia i Yerusale.”
12I tempo atuu haweomo pau-Do i Ue ndi Yeremia, kanandio, 13”Kanandiomo pau-Do Ueno luwuakoano, Ue Alado to Isaraeli: Lakomo ka pauako iramo to Yehuda ka a mpalilino Yerusale: Nahi imentarimaoke pontunduhi saru merorongeakono luwuno pau-Ku? Kanandiomo pau-Do i Ue. 14Lano parentano i Yonadabi anano i Rekabi atuu da tinonda. Iparenta iramo inuleno, ka si dompo'inu anggoro, ka ranta kanandio-andio nahi dompo'inu, hangano ondae mperorongeakono parentado uempu'udo. Ongkue isa'a mepau ndi omiu, nahi otu-otu, sine nahi meronge Aku. 15Nahi otu-otu Kutena ira tetenaa-Ku ndi omiu, luwuno nabi, mempauo: Impepokulemo singge mia inso a mpelelumiu anu mosa'o atuu, impokomoikoomo wineweumiu, si mpetonda a mpinesombai susua saru mpesomba ndi ondae, ka komiu koa mpo'ia mpiha i wita anu Kuweeakomiumo ka uempu'umiu. Sine nahi mebehe mpo'aroo birimiu ka nahi mebehe meronge Aku. 16Mentee ntu'u, inuleno i Yonadabi anano i Rekabi mentondao parenta anu iweeako ira uempu'udo, sine tongku andio nahi behe meronge Aku! 17Onaemo pu'uno kanandiomo pau-Do i Ue, Ue Alano luwuakoano, Ue Alado to Isaraeli, Menteeano, Aku mompotiiakono Yehuda ka luwuno palilino Yerusale luwuno masolaa anu Kupokodoitoako ira; hangano mepau Akumo ndi ondae, sine nahi domerongeo, ka mebooli Akumo ndi ondae, sine nahi domesangki.”
18Mepauomo i Yeremia a nsukudo to Rekabi, ”Kanandiomo pau-Do Ueno luwuakoano, Ue Alado to Isaraeli: Hangano imerongeomo parentano i Yonadabi, uempu'umiu, mpe'ini a luwuno parentano ka imeweweuomo kona ntu'u kana anu iparentaa komiu, 19ka kanandiomo pau-Do Ueno luwuakoano, Ue Alado to Isaraeli: Inuleno i Yonadabi anano i Rekabi nahi ta te'otu mompekakaako ndi Ongkue asa ntinuwu.”
Currently Selected:
Yeremia 35: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
