Yeremia 36
36
Paluluno wunta itunuo Mokole Yoyakimi
36:1-32
1 #
2Mok. 24:1; 2Taw. 36:5-7; Dan. 1:1-2 A nta'u ko'opaa poparentaano i Yoyakimi ana ntamano i Yosia, mokoledo to Yehuda, haweomo pau andio ndi Yeremia inso ndi Ondae i Ue, kanandio, 2”Alaomo paluluno wunta ka buriomo i larono luwuno pau anu Kupauomo ndi omue mongkona Isaraeli, Yehuda ka luwuno tongku, mompu'u Kupepau ndi omue tempono i Yosia hawe tempo andio. 3Tewala domerongeo suku Yehuda mongkona luwuno masolaa anu tinoo-Ku motiio ndi ondae, bara'ura ira singge ntepidi inso a mpeleludo anu mosa'o atuu, ranta ka Ku'oniniako ira sala ka halado.” 4I Yeremia moboio i Baruki anano i Neria, ka i'amba i Baruki burio a laro paluluno wunta atuu, rumongeo inso a ngangano i Yeremia, luwuno pau anu pinau-Do i Ue ndi onae.
5I Yeremia moweeakono parenta i Baruki, ”Ongkue nahi kupokolako a Raha-Do i Ue. 6Gagi, a oleo puasa omuemo anu lumako basao inso a paluluno atuu pau-Do i Ue anu binurimu rumongeo inso a ngangaku i arodo mia hadio a Raha-Do i Ue. A luwuno to Yehuda anu me'aiwa inso a luwuno kotano asalakono ka ubasaako ira mbo'u. 7Bara'ura ira mpohaweo po'emado i aro-Do i Ue ka ira singge ntepidi inso a mpeleludo anu mosa'o atuu, hangano mongkokongiriomo mosa'ono aroa ka tensilano tekuda anu pinokomengkaa-Do i Ue a tongku andio.” 8I Baruki anano i Neria weweuo kona ntu'u kana anu iparentaakono Nabi Yeremia ka ibasao luwuno pau-Do i Ue inso a wunta atuu a Raha-Do i Ue. 9Kanatuumo a nta'u ko'olima poparentaano i Yoyakimi ana ntamano i Yosia, mokoledo to Yehuda, a wula ko'osio, pinaleleomo puasa i aro-Do i Ue a luwuno palili i Yerusale ka a luwuno palili anu me'aiwa inso a luwuno kotano Yehuda melako i Yerusale. 10I Baruki basao mbo'u i arodo luwuno palili pauno i Yeremia inso a wunta atuu a Raha-Do i Ue, a bolongkono i Gemaria, anano i Sapani, puu mpoburi poparentaa, a kintala i wawono i arono Pewowa Langkai Wo'ohu Raha-Do i Ue.
11Tempono i Mikaia anano i Gemaria anano i Sapani rumongeo luwuno pau-Do i Ue inso a wunta atuu, 12metiiomo onae lumako a langkanaeno mokole, a bolongkono puu mpoburi a poparentaa. I ra'ai mpentoro ira luwuno mia pinemota'u: I Elisama, puu mpoburi poparentaa, i Delaia mbo'u anano i Semaia, i Elinatani anano i Akibori, i Gemaria anano i Sapani, i Sedekia anano i Hanania ka luwuno mia pinemota'u susuano. 13Ka i'amba i Mikaia pauako ira luwuno pau anu irongeomo, tempono i Baruki basao wunta atuu i arodo mia hadio. 14Ka i'amba luwuno petewawa atuu mentenao i Yehudi anano i Netania anano i Selemia anano i Kusi lumako ndi Baruki mowawa pe'oliwi, ”Wawaomo paluluno anu umari ubasao i arodo mia hadio atuu ka aiwamo ramai!” I Baruki anano i Neria wawao mbo'u paluluno wunta atuu ka aiwa ndi ondae. 15Mpotae iramo ndi onae, ”Tabeamiu ipentoromo ka ibasaomo atuu i aromami!” Ka i'amba i Baruki basao i arodo. 16Rumongeo luwuno pau atuu, pada ira mambekita saru medoito ka do'amba mpotae ndi Baruki, ”Asalakono katoronga pauako ira mokole luwuno pau andio!” 17Mpesikeno ira ndi Baruki, ”Pauakamimo, kana'umpe uburio luwuno pau andio, nde urongeo inso a ngangano?” 18Sumangki i Baruki ndi ondae, ”Luwuno pau andio kurongeo inso a ngangano i Yeremia, ka kuburiakono tinta a wunta.” 19Ka do'amba mpotae mia pinemota'u atuu ndi Baruki, ”Lakomo pewuni, omue ka i Yeremia! Si hina maupo te'asa mia tumo'orio ba isua ipo'ia.”
20Ka i'amba melako iramo mpe'aro ndi mokole a kintala, umarido menaao wunta pinalulu atuu a bolongkono i Elisama puu mpoburi a poparentaa. Luwuno pau atuu domempauakono mokole. 21Mokole tumenao i Yehudi umalao wunta pinalulu atuu. I Yehudi umalao inso a bolongkono i Elisama, puu mpoburi a poparentaa ka i'amba basao i arodo mokole ka luwuno mia pinemota'u anu mpentade umpeda mokole. 22Tempo atuu onaemo wula anu ko'osio. Mokole tekonai mentoro a raha tepotowoa tempo morini ka pompotuwua api melanga i arono. 23Sompo umari ibasao i Yehudi otolu opaa oloti, i mokole beri-beriakono piso porooni, ka i'amba metadiakono a laro pompotuwua api atuu, ranta luwuno wunta pinalulu atuu pingko mo'ai a pompotuwua api atuu. 24Moiko mokole maupo luwuno pegawaino anu rumongeo luwuno pau atuu nahi domedoito ka nahi domeberio sangkado. 25Tendeano i Elinata, i Delaia ka i Gemaria dumadaio mokole ka situnuo wunta pinalulu atuu, sine mokole nahi perorongeako ira. 26Posuleno, Mokole parentao i Yerameeli, ana ntamano, saru i Seraia anano i Asirieli ka i Selemia anano i Abideeli ka domerakoo i Baruki, puu mpoburi atuu ka nabi Yeremia, sine Ondae i Ue wuni ira.
27Umarino mokole tumunuo wunta pinalulu me'ihiako luwuno pau anu binurino i Baruki rumongeo inso a ngangano i Yeremia atuu, haweomo pau-Do i Ue ndi Yeremia, kanandio, 28”Alaomo mbo'u wunta pinalulu susua ka buriomo i larono luwuno pau anu se'eluno kongko a wunta pinalulu amba-ambano, anu tinununo i Yoyakimi, mokoledo to Yehuda. 29Mongkona i Yoyakimi, mokoledo to Yehuda, asalakono pauo: Kanandiomo pau-Do i Ue: Utunuomo wunta pinalulu atuu saru motae: Tembio ka uburio i larono nine mokole i Babeli manasa ta aiwa rumopuo wita andio ka mokotampulao inso i larono mia ka pinotuwu? 30Onaemo pu'uno kanandiomo pau-Do i Ue mongkona i Yoyakimi, mokoledo to Yehuda: Nahina inso a inuleno anu ta mentoro a ngkadera poparentaano i Daudi. Wata ngkoroino ta tepasiako, ikonao mokula tempono meene ka morini tempono wongi. 31Aku humukuo, inuleno ka luwuno atano hangano salado. Aku mompotii ndi ondae, a mpalilino Yerusale ka a nto Yehuda luwuno masolaa anu Kupokodoitoako ira ka nahi domebehe merongeo.”
32Ka i'amba i Yeremia umalao wunta pinalulu susua ka iweeakono i Baruki anano i Neria, puu mpoburi atuu. I Baruki burio anu rinongeno inso a ngangano i Yeremia luwuno pau anu teburi i larono wunta anu itunuomo i Yoyakimi, mokoledo to Yehuda. Tendeano da tiniangiako hadio pau pengkenano.
Currently Selected:
Yeremia 36: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
