Yeremia 34

I Yeremia pauakono tompaano tuwuno mokole Sedekia

34:1-7

1 # 2Mok. 25:1-11; 2Taw. 36:17-21 Pau inso ndi Ondae i Ue anu hawe ndi Yeremia, tempono i Nebukanesa, mokole i Babeli, ka luwuno sorodaduno, saru mbo'u luwuno poparentaa i tolino i totono poparentaano ka luwuno tongku mpetea umewaio Yerusale ka luwuno kota kodeino, 2”Kanandiomo pau-Do i Ue, Ue Alado to Isaraeli: Lakomo pepau ndi Sedekia, mokoledo to Yehuda, pauakono: Kanandiomo pau-Do i Ue: Menteeano, Kupeweengakono kota andio a ngkaeno mokole i Babeli, ka isongkoo. 3Omue nahi kotola inso a ngkaeno, tendeano manasa rinako ka pineweengako a ngkaeno. Omue kokumitao mokole i Babeli mata saru mata ka onae ta mepau rupa tepo'aro rupa. Ka i'amba omue kolumako i Babeli. 4Maupo kanatuu, rongeomo pau-Do i Ue, hei Sedekia, mokoledo to Yehuda, kanandiomo pau-Do i Ue mongkona omue: omue nahi komateako ponai! 5Omue komate a laro sintuwu. Kana'umpe api pinolanga melangkaio uempu'umu, luwuno mokole ntese'elu, anu tuwu se'eluno omue, kanatuumo mia ta molangaakomu api ka sumabangiko saru motae: Adoo, ue! Mentee ntu'u, Ongkuemo anu pauo, kanandiomo pau-Do i Ue.”

6Nabi Yeremia mohaweo luwuno pau andio ndi Sedekia, mokoledo to Yehuda, i Yerusale, 7tempono sorodaduno mokole i Babeli metea umewaio Yerusale ka luwuno kotano Yehuda anu da tebinta, onaemo Lakisi ka Aseka. Hangano, luwunomo kota atuu anu da tebinta i olodo luwuno kotano Yehuda gagi luwuno kota anu mebente.

Pompotolaa ata to Ibarani nahi inihii montonda pedandia

34:8-22

8Pau inso ndi Ondae i Ue anu hawe ndi Yeremia, umarino Mokole Sedekia moweweu pedandia saru luwuno palili anu kongko i Yerusale ka ipinopoto'ori pompotolaa: 9sompo mia motolao to Ibarani anu gagi atano, moiko tama maupo beine, gagi mia maradeka, ranta nahina mbo'u maupo te'asa mia anu me'atao pepaekompono, to Yehuda. 10Luwuno mia pinemota'u ka luwuno palili anu mpetonda a mpedandia atuu mpemoikoo nine sompo mia ta motolao atano tama ka atano beine gagi mia maradeka, ka nahina mbo'u anu me'ata ira. Mia atuudo mentondao ka do'amba mpotola ira. 11Sine umarino atuu baali pinewowolodo. Ondae wali me'ala ira ata tama ka beine anu dompotola iramo gagi mia maradeka atuu ka mokompetuundu ira mbo'u gagi ata tama ka ata beine.

12Ka i'amba inso ndi Ondae i Ue haweomo pau-Do ndi Yeremia, kanandio, 13”Kanandiomo pau-Do i Ue, Ue Alado to Isaraeli: Mowutu Akumo pedandia saru uempu'umiu i tempono Kuwawa ira mpeluarako inso i wita Masiri, inso a mpo'ianga tepe'ataa, ihino: 14#Pel. 21:2; Win. 15:12A pokotampulaano ta'u ko'opitu omiu singge mia asalakono motolao pepaekompono, to Ibarani, anu inasaomo ndi omue. Onae ta mo'angga ndi omue onoo nta'u tehineno, ka i'amba omue asalakono motolao gagi mia maradeka. Sine, uempu'umiu nahi domeronge Aku ka nahi dompo'aroo birido ndi Ongkue. 15Oleo andio ntepidi komiumo ka mpoweweu hapa anu mentee a pongkita-Ku hangano sompo mia mopoto'orio pompotolaa a mpepaekompono, ka mpoweweu komiumo pedandia i aro-Ku a raha anu nineeako montonda nee-Ku. 16Sine baliomo pinewowolomiu ka mengkokoburutiomo nee-Ku. Omiu singge mia wali umalao atano tama ka atano beine, anu impotolaomo gagi mia maradeka ka ituwu montonda po'eheno; impokompetuundu iramo, ka domegagi mbo'u atamiu tama ka atamiu beine. 17Onaemo pu'uno kanandiomo pau-Do i Ue: Omiu nahi meronge Aku nine sompo mia asalakono mopoto'orio pompotolaa a mpe'asa miano ka a mpepaekompono. Onaemo pu'uno, Ongkue mopoto'oriakomiu pompotolaa, kanandiomo pau-Do i Ue, ka ipineweengako a mponai, haki lele ka mokoninggoa. Aku weweu komiu gagi mongkokongiriado luwuno poparentaa i tolino. 18Aku meweengako ira mia, anu lumimpaio pedandia-Ku ka nahi tondao ihino pedandia anu winutudo i aro-Ku, saru mempoleo ana nsapi lakino gagi orua ka mpelempa i olono bansi-bansino. 19Mia atuudo onaemo mia pinemota'udo to Yehuda ka Yerusale, luwuno anu langkai potorono ka sando mpesomba saru luwuno palili i wita atuu anu mpelempa iramo i olono bansi-bansino ana nsapi lakino atuu. 20Ondae Aku meweengako ira a ngkaeno iwalido ka a ngkaedo mia anu momporaakono penaado. Wata ngkoroido ta gagi kaangado manu-manu i laro meene ka kondehora i tolino. 21I Sedekia mbo'u, mokoledo to Yehuda, saru luwuno mia pinemota'udo Aku meweengako ira mbo'u a ngkaeno iwalido, a ngkaedo mia anu momporaakono penaado ka a ngkaedo sorodaduno mokole i Babeli anu binta komiu. 22Menteeano, kanandiomo pau-Do i Ue, Ongkue mompowee parenta ka wawa ira mpekule i kota andio ka dompeteaakono, mpoko'alao ka mpokoropuo. Aku weweuo luwuno kotano Yehuda gagi boni-boni nahina palilino.”

Currently Selected:

Yeremia 34: XMZ

Highlight

Copy

Compare