Yeremia 33
33
Dandi pomuleano Yerusale ka Yehuda
33:1-13
1Haweomo pau-Do i Ue anu kompenduano ndi Yeremia, tempono onae da tekadu a kintala podagaia atuu, kanandio, 2”Kanandiomo pau-Do i Ue, anu mokogagiomo tolino saru weweuo tadeno ka mokorosoo, Ondaemo i Ue nee-Do: 3Peboolimo ndi Ongkue, asalakono Aku sumangkiko ka pauakomu mongkona wineweu anu langkai anu nahi pinokonto'ori, mongkona wineweu anu nahi uto'orio. 4Hangano kanandiomo pau-Do i Ue, Ue Alado to Isaraeli, mongkona luwuno raha i kota andio ka luwuno langkanaedo mokoledo to Yehuda anu pinobangku tumumboo luwuno rere watu pongkadua ka ponai. 5Ondae ira mpetea umewai ira to Kasidimi ka weweuo kota andio bukeako wata ngkoroino mia pinepate-Ku hangano tekuda-Ku ka tensilano tekuda-Ku. Hangano, Kuwuniomo rupa-Ku inso i kota andio hangano luwuno wineweudo anu mosa'o. 6Menteeano, Aku mompotii ndi ondae tompaa ka pompokomoiko, ka Aku mokotompa ira ka mosabaako ira sintuwu ka rodoa anu hadio ntu'u. 7Aku mokomoikoo teweweuno Yehuda ka Isaraeli ka wangu ira kana se'eluno. 8Aku mokomentee ira inso a luwuno salado ka hala anu wineweudo ndi Ongkue. Aku umoninio luwuno sala, hala, ka pe'ewado ndi Ongkue. 9Kota andio ta gagi nee anu mompokomawongko, inunde-unde ka pinelangkai ndi Ongkue i arono luwudo tongku i tolino anu rumongeomo mongkona luwuno moikoa anu Kuweweuo ndi ondae; ira ntededengke ka mpondidi-ndidi hangano luwuno moikoa ka manangaia anu Kuweweuo ndi ondae.
10Kanandiomo pau-Do i Ue: A mpo'ianga andio, anu pinaumiu gagiomo terawo nahina mia ka pinotuwu, a luwuno kotano Yehuda ka a luwuno sala i Yerusale anu boni-boni atuu nahina mia ke palili ke maupo pinotuwu, 11#1Taw. 16:34; 2Taw. 5:13; 7:3; Esr. 3:11; Pud. 100:4-5; 106:1; 107:1; 118:1; 136:1ta teronge mbo'u suara mawongkoa ka po'undea, suarano umbungkoroi tama ka umbungkoroi beine, suarado mia anu mpotae:
Unde-unde Iramo Ueno luwuakoano,
hangano Ondae i Ue Atuu moiko,
menteeano ranta nahina tampulaano pompehohawa-Do!,
tekonai mompesombaako pesomba po'unde-unde a Raha-Do i Ue. Hangano, Aku mokomoikoo teweweuno wita andio kana i ndi'ipua, pau-Do i Ue.
12Kanandiomo pau-Do Ueno luwuakoano: a mpo'ianga andio, anu gagiomo terawo-rawo, nahina mia ke pinotuwu, ka a luwuno kotano ta hina mbo'u tongampada tiado puu mpopakambi anu mpombole ira bawaano bembe bimbado i tu'ai. 13A luwuno kota a mentorukuno, a luwuno kota i Wita Pongku, a luwuno kota i wita Nege, i wita Benami, i horino Yerusale ka luwuno kotano Yehuda, bawaano bembe bimba ta telalo mbo'u iwawao mia anu dumoa ira, kanandiomo pau-Do i Ue.”
Pedandia anu manasa Do'ihiio i Ue
33:14-26
14 #
Yer. 23:5-6
”Menteeano, tempono ta hawe, kanandiomo pau-Do i Ue, nine Aku umihiio dandi tekosi anu Kupauomo a nsuku Isaraeli ka suku Yehuda. 15I tempo atuu Aku motuwuo Tumba moleono i Daudi. Onae ta weweuo moleoa ka menteea i wita andio. 16I tempo atuu Yehuda ta pinotola, ka Yerusale ta tuwu rodo. Sarumo andio mia meneeakono: Ondae i Ue moleoato!
17 #
2Sam. 7:12-16; 1Mok. 2:4; 1Taw. 17:11-14 Hangano kanandiomo pau-Do i Ue: Nahi ta te'otu inuleno i Daudi anu mentoro a ngkadera poparentaado suku Isaraeli; 18ka nahi ta te'otu mbo'u inuledo sando mpesomba to Lewi anu mpopesombaako pesomba tinunu i aro-Ku, mpotunu pesomba kaanga ka mpompesombaako pesomba sinumbele asa ntinuwu.”
19Pau-Do i Ue hawe ndi Yeremia, kanandio, 20”Kanandiomo pau-Do i Ue: Tewala impokobalio pedandia-Ku saru meene ka pedandia-Ku saru wongi ranta meene ka wongi nami hawe mbo'u a tempono, 21asalakono pedandia-Ku saru tetenaa-Ku i Daudi poli koa mbo'u ibinali ranta onae nahi ta hina mbo'u anano moparenta a ngkadera poparentaano; kanatuu koa mbo'u pedandia-Ku saru luwuno to Lewi, sando mpesomba anu gagi puu pompekakaako-Ku. 22Kana sorodadu langi nahi pinokodoa ka kana oneno tahi nahi pinokosa'u, kanatuumo Aku mokohadioo inuleno tetenaa-Ku i Daudi ka luwuno to Lewi anu mpekakaa-Kune.”
23Pau-Do i Ue hawe ndi Yeremia, kanandio, 24”Nahi upekokoongakonoke hapa anu pinaudo mia andio: Orua suku poparentaa anu bininiki-Do i Ue atuu nami Dotarimao? Ba kanandio domempokongkodei iramo bawaa-Ku ka merekeo komba asa tongku mbo'u. 25Kanandiomo pau-Do i Ue: Tewala nahi Kupakosio pedandia-Ku saru meene ka wongi, ke atorano langi ka tolino, 26asalakono nahi Aku tumarimao inuleno i Yako ka tetenaa-Ku i Daudi, ka menaa-naa mompotoro mia inso a inuleno anu ta moparenta a inuleno i Burahima, i Saki ka i Yako. Hangano, Aku mokomoikoo teweweudo ka mehohawa ira.”
Currently Selected:
Yeremia 33: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
