Yeremia 31
31
Pedandia anu wo'ohu
31:1-40
1”I tempo atuu, kanandiomo pau-Do i Ue, Aku gagi Ue Alado luwuno pepe'etuado to Isaraeli ka ondae gagi bawaa-Ku.
2Kanandiomo pau-Do i Ue:
Tongku anu tola inso a mponai,
ta mohawe pompehohawa i pada one!
I Isaraeli melempa i ra'ai mo'ungke penaa-naaano!
3Inso olai Ondae i Ue mepopokita ndi onae:
Omue Kupehohawaakomu pompehohawa anu nahina tampulaano,
onaemo pu'uno Kupotilaloakono pompehohawa-Ku ndi omue.
4Aku wali wanguko, ka omue kowinangu,
hei ana beine Isaraeli!
Omue kowali rumamba-rambaakono rebana koroimu
ka komesabaako a mpo'ense-enseado mia anu memawongko.
5Omue kowali mompahoario luwuno lere anggoro
a luwuno torukuno Samaria;
luwuno anu mpompaho ira mempahoo
ka mperapio hasilino.
6Mentee ntu'u, ta hawe oleono nine luwuno anu mpodagai mpebooli
i torukuno Eparai:
Aiwamo tompewuatako i Sioni,
ndi Ondae i Ue, Ue Alato!
7Hangano, kanandiomo pau-Do i Ue:
Peboo-boolimo mawongkoakono i Yako saru po'unde,
memawongkomo mongkona petewawado luwuno tongku!
Paleleomo, unde-undeomo ka pauomo:
Ue Ikadudui iramo bawaa-Miu,
to Isaraeli anu da tebinta!
8Menteeano, Aku wawa ira inso i wita utara
ka pumpu ira inso a luwuno tompano tolino;
i olodo hinao mia morawu ka mia puungku,
hinao beine mentia meronga beine me'ana;
asa tepumpua langkai ira mpekule i ndi'ai.
9Saru mpengese ira me'aiwa,
saru mepepehohawa Aku wawa ira;
Aku wawa ira a luwuno korono,
a nsala anu merete, i ra'ai nahi ira ntetidu;
hangano Ongkuemo amano i Isaraeli,
ka i Eparai ana aka-Ku.
10Rongeomo pau-Do i Ue, hei luwuno tongku,
pauomo a luwuno wita i wiwi ntahi anu olai,
potaemo: Ondae anu sumiarawo iramo to Isaraeli Ondae koa mbo'u wali pumpu ira,
ka dumagai ira kana puu mpopakambi a bawaano bimbano!
11Hangano, Ondae i Ue Dopotolaomo i Yako,
Dotolosiomo inso a ngkaeno mia anu morosoopo sekono onae.
12Ira me'aiwa mpeboo-booli a wawo pongku Sioni,
rupado ta mewanta hangano moiko-Do i Ue,
hangano gandu, anggoro ka lana,
hangano bawaano ana bembe bimba ka sapi;
tuwudo ta kana lere bunga anu inuwoi,
nahi ira memarasai mbo'u.
13I tempo atuu ana beine ta mo'unde mo'ense-ense,
meronga luwuno mia mongura ka luwuno mia mota'u ira memawongko.
Aku balio masusado gagi mawongko,
Ira montarero ka weweu ira memawongko tola inso a pompemasusado.
14Aku mokonte'osaako ira sando mpesombaamu hadio ntu'u,
ka bawaa-Ku ira memowohiako moiko-Ku,
kanandiomo pau-Do i Ue.
15 #
Teg. 35:16-19; Mat. 2:18 Kanandiomo pau-Do i Ue:
Rongeo! I Rama teronge ponsabangi,
pengese anu tedoa mompokomasusa aroa:
I Raheli mengesei ira anano,
onae nahi behe tinarero mongkona luwuno anano,
hangano nami domekongko.
16Kanandiomo pau-Do i Ue:
Peteaoamo suarano pengesemu,,
matamu siimo ipompo'iti uwoi mata,
hangano hinao tambono pe'iseimu, kanandiomo pau-Do i Ue;
ondae ira mpekule inso i witado iwali.
17Da hinao pomperorohia a oleo lembuiamu, kanandiomo pau-Do i Ue:
nana'ote ira mpekule i witado.
18Kurongeomo mentee ntu'u i Eparai mengese,
’Itunduhi akumo, ka kutarimao petunduhi,
kana ana nsapi anu nahi pinaguru.
Iwawa akumo mekule ka ineheku mepokule,
hangano Omiumo Ue, Ue Alaku.
19Mentee ntu'u, umariku mepokule, me'o'ole aku,
ka mansaku mokonto'orio, kutunduhio koroiku;
mokoko'iiku tendeano tekoko'ii,
hangano kutembio mokoko'iia tempo monguraku’.
20Kombake i Eparai ana pinehohawa,
kombake onae ana anu inehe-eheako?
Hangano sompo Kutekudaakono,
wela Aku rumambeo;
onaemo pu'uno aroa-Ku mondende hangano onae;
maupo kana'umpe Aku mehohawao,
kanandiomo pau-Do i Ue.
21Pontade iramo pepopoto'orimu a nsala,
pasa iramo pontondonimu sala!
Pekokoongakono temoiko sala langkai,
sala anu umariomo utondao!
Pekulemo, hei ana beine Isaraeli,
pekulemo a luwuno kotamu andio!
22Opiapo mbo'u tehineno unanta-nanta,
hei ana beine anu mebungkui Ira i Ue?
Mentee ntu'u, Ondae i Ue mompokogagi asa anu wo'ohu i wita andio
kana pelempano beine mongkopui tama.”
23Kanandiomo pau-Do Ueno luwuakoano, Ue Alado to Isaraeli, ”Mia ira mempauo mbo'u pau andio i wita Yehuda ka a luwuno kotano, tewala Kupomuleomo teweweudo:
Po'ineeomo ka Doronsoko i Ue,
hei po'iangano menteea,
hei torukuno anu mempori!
24I ra'ai ta mo'ia Yehuda meronga luwuno kotano, luwuno puu mpelere ka mia anu mempelakopi saru bawaano pinotuwudo. 25Hangano Ongkue moweakono roso anu mokendo, ka sompo mia anu telusa Aku wali mokorosoo.”
26Onaemo pu'uno ka kupewangu ka mokonto'orio nine poturiku sanaa.
27”Menteeano, tempono ta hawe, kanandiomo pau-Do i Ue, Aku mokohadioo inuleno mia ka pinotuwu a nsuku Isaraeli ka suku Yehuda. 28Mengkena kana Kupedagaiako ira Aku mobuta, mobangkuo, mohoa, mompepate ka monsolangi, kanatuu koa mbo'u Aku medagaiako ira Aku mowangu ka mompaho, kanandiomo pau-Do i Ue.
29 #
Yeh. 18:2
I tempo atuu mia nahi ta motae mbo'u,
’Luwuno ama mpongkaa wua anu mo'olo,
ka ngisido nana'ote gagi mongilu,’
30tendeano, ’Sompo mia ta mate hangano salano onaeno; sompo mia anu mongkaa wua anu mo'olo, ngisino onaeno gagi mongilu.’
31 #
Mat. 26:28; Mrk. 14:24; Luk. 22:20; 1Kor. 11:25; 2Kor. 3:6 #
Ibr. 8:8-12
Menteeano, ta hawe tempono, kanadiomo pau-Do i Ue, Aku mowutu pedandia wo'ohu saru suku Isaraeli ka suku Yehuda, 32komba kana pedandia anu Kuwutuomo saru uempu'udo i tempono Ku'inio kaedo wawa ira mpeluarako inso i wita Masiri. Pedandia-Ku atuu domehapuomo, maupo Ongkue gagi uedo, kanandiomo pau-Do i Ue. 33#Ibr. 10:16-17Sine, kanandiomo pedandia anu Kuweweuo saru suku Isaraeli umarino tempo atuu, kanandiomo pau-Do i Ue: Aku numaao songka-Ku a laro nsumangado ka burio i laro aroado. Aku gagi Ue Alado ka ondae gagi bawaa-Ku. 34Siimo mbo'u mia paguruo pe'asa miano ke pepaekompono ka ipotae, ’To'ori Iramo i Ue!’ Hangano luwudo, langkai ka kodei, ira mento'ori Aku, kanandiomo pau-Do i Ue. Hangano Aku umoniniako ira salado ka nahi pinewowolo mbo'u halado.”
35Kanandiomo pau-Do i Ue
anu mompowee oleo gagi mewine tempono meene,
ka pompakosi wula ka anano wula gagi mewine tempono wongi,
anu mokomarisuo tahi, ranta ka dompebunde bombano,
Ondae Ueno luwuakoano nee-Do,
36”Menteeano, kana luwuno pompakosi andio nahi ta melimba
inso i aro-Ku, kanandiomo pau-Do i Ue,
kanatuumo mbo'u inuleno i Isaraeli nahi ta menaa-naa
gagi tongku i aro-Ku asa ntinuwu.
37Kanandiomo pau-Do i Ue:
Menteeano, kana langi i wawono nahi pinokosongka
ka luwuno empehino tolino nahi pinokoparesa,
kanatuumo mbo'u Aku tumarimao luwuno inuleno i Isaraeli,
hangano luwuno anu wineweudo, kanandiomo pau-Do i Ue.
38Menteeano, tempono ta hawe, kanandiomo pau-Do i Ue, nine kota atuu ta wali winangu tia-Do i Ue, inso a menara Hananeeli hawe a Mpewowa Langkai Siuno; 39ka i'amba koloro posongka atuu ta tepadindi mpiha hawe a pongku Garebi, ka i'amba melengkuako lumako i Goa. 40#Yer. 7:31-33Luwuno lembono atuu, saru luwuno wata ngkoroi ka awuno pesombano, ka luwuno wita i wiwi ngkoro Kidironi hawe a nsiuno Pewowa Langkai Ngara te'aro i sabaano oleo, ta gagi mempori ndi Ondae i Ue, ka nahi ta rinawo-rawo ke pinobangku mbo'u ranta nahina tampulaano.”
Currently Selected:
Yeremia 31: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
