Yeremia 30
30
Dandi pomuleno Isaraeli
30:1-24
1Pau anu hawe ndi Yeremia inso ndi Ondae i Ue, unino, 2”Kanandiomo pau-Do i Ue, Ue Alado to Isaraeli: Buriomo luwuno pau anu Kupauomo ndi omue atuu i larono asa wunta. 3Hangano, menteeano, tempono ta hawe, kanandiomo pau-Do i Ue, nine Aku momuleo teweweudo bawaa-Ku Isaraeli ka Yehuda, kanandiomo Dopepau i Ue. Aku mokule ira i wita anu Kuweeako iramo uempu'udo, ka ira mpe'ueo.”
4Ndiomo pau anu Dopauomo i Ue mongkona Isaraeli ka Yehuda,
5”Mentee ntu'u, kanandiomo pau-Do i Ue:
Kimerongeomo peraali doito,
pondendea ka nahina sintuwu.
6Pesikenoakonomo ka paresaomo,
Nde menteeke tama me'ana?
Tembio sompo tama Kukitao
monaa kaeno a ntongano kana asa beine anu me'ana?
Tembio sompo rupa bali momite?
7Masolaomo, mongkokongiri ntu'u oleo atuu,
nahina pengkenano!
Onaemo tempo masusaano i Yako,
sine inso ndi onae ta kinadudui.
8A oleo atuu, kanandiomo pau-Do Ueno luwuakoano, Aku puduo pasanga inso a banga we'udo ka umotuhi ira koloro pongudo. Nahi ira mpo'angga mbo'u a mia mehawe. 9Ira mpo'angga ndi Ondae i Ue, Ue Alado, ka ndi Daudi, mokoledo, anu Aku wanguako ira.
10 #
Yer. 46:27-28
Ka omue, siimo doito, hei tetenaa-Ku Yako,
kanandiomo pau-Do i Ue,
siimo pondende, hei Isaraeli!
Hangano menteeano, Ongkue kumaduduiko inso a mpo'ianga olai
ka inulemu inso i wita tadiado.
I Yako ta mekule ka tuwu rodo,
ka nahina anu mompodengke.
11Hangano ongkue kumongkomiko, kanandiomo pau-Do i Ue, ka kumaduduiko:
luwuno tongku anu i olodo Kupeweengakomu
Aku pingko ira,
sine omue andio nahi Aku pingkoko.
Aku humukuko montonda songka,
sine omue komba Kukitako nahina ntu'u salamu.
12Mentee ntu'u, kanandiomo pau-Do i Ue:
Tedoa mapari mobelamu,
mobelamu nahi ta tompa!
13Nahina anu me'alaako a ntiamu,
nahina pakulino moboomu,
nahi kotompa!
14Luwuno kinekewoimu mengkolupeko,
nahi dompesikenoakomu mbo'u.
Mentee ntu'u, Kutunduhiakomumo pontunduhi iwali,
saru pohuku anu nahina pompehohawa,
hangano salamu hadio,
halamu anu langkai.
15Tembioke ka upebooli hangano mobelamu,
hangano pompemopoemu tedoa lansara?
Hangano salamu hadio,
halamu porokono hadio,
ka luwuno andio Kuweweuomo ndi omue.
16Sine luwuno mia anu tumeleko ta tinele,
ka luwuno iwalimu ira mpewinso a laro pontawaa;
mia anu merontuko ta gagi rinontu,
ka luwuno mia anu mpomuruko Aku weweuo gagi pomurua.
17Menteeano Aku mokotompako,
Aku pakulio luwuno mobelamu,
kanandiomo pau-Do i Ue,
hangano omue pinauomo ’anu tinadi’,
Sioni anu nahina umungkeo maupo te'asa mia.
18Kanandiomo pau-Do i Ue:
menteeano, Aku momuleo teweweudo kemano i Yako,
ka mehohawao luwuno po'iangano,
kota atuu ta wali winangu i wawono anu terawo-rawo,
ka benteno atuu ta mentade a mpo'iangano amba-ambano.
19Penani po'unde-unde ta mewuatako inso i olodo,
saru mbo'u suarado mia anu memawongko.
Aku weweu ira ntetiangi hadio ka nahi ira memakura mbo'u.
Aku weweu ira mempinelangkai, ka nahi ira mentinetewehi mbo'u.
20Luwuno anado ta gagi kana i ndi'ipuaako,
ka tepumpuado ta moroso i aro-Ku;
Aku humukuo luwuno mia anu mokonsii ira.
21Petewawado ta koa inso ndi ondaedo,
ka anu pabawaako ira ta me'umbaako inso i tonga-tongado.
Aku weweuo rumangkuhi Aku ka onae ta umpeda ndi Ongkue.
Hangano, isemake anu mosia tuma'oo penaano
ta umpeda ndi Ongkue? Kanandiomo pau-Do i Ue.
22Ka komiu megagi bawaa-Ku,
ka Ongkue gagi Ue Alamiu.”
23Kitaomo, angi mokora-Do i Ue,
tensilano tekuda-Do, meluarakoomo;
pewolilino angi lompiu
umaluo uludo mia mosa'o gaudo.
24Tekuda-Do i Ue anu tensila atuu nahi ta temonto
hawe ka Doweweuo ka mokogagio
tinoono aroa-Do;
a oleo pokotompa komiu mento'orio mongkona atuu.
Currently Selected:
Yeremia 30: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
