Yeremia 29
29
Wunta binuri tiado mia mentinadi i Babeli
29:1-23
1 #
2Mok. 24:12-16; 2Taw. 36:10 Kanandio ihino wunta anu inoliwino Nabi Yeremia inso i Yerusale a mia memota'u anu ntebinta i olodo mia mentinadi, a luwuno sando mpesomba, a luwuno nabi ka luwuno palili anu mewinawano i Nebukanesa inso i Yerusale a pontadia i Babeli. 2Mongkona andio gagi umarino Mokole Yekonia meronga inedo mokole, luwuno anu langkai potorono, luwuno pinemota'udo to Yehuda ka Yerusale, puu mpo'angga ka anu pande mpo'angga labu mpeluarako inso i Yerusale. 3Wunta atuu inoliwi telalo ndi Elasa anano i Sapani ka i Gemaria anano i Hilikia anu tinenano i Sedekia, mokoledo to Yehuda lumako i Babeli ndi Nebukanesa, mokole i Babeli. Ihino, 4”Kanandiomo pau-Do Ueno luwuakoano, Ue Alado to Isaraeli, a luwuno mia mentinadi anu mewinawa a pontadia i Babeli inso i Yerusale: 5Impowangumo raha po'iangamiu; impoweweumo lere ka imperapio hasilino; 6impo'alamo kombiamiu ka impe'anaako ana ntama ka beine; impo'alaako iramo kombiado ana ntamamiu ka impo'ungkeako ira tamado anamiu beine, ka dompe'anaako ana ntama ka beine, ka intetiangi hadio i ra'ai ka si memakura! 7Weweumo manangaiano kota ba isua Kutadi komiu, ka impekakaimo ndi Ondae i Ue tiano kota atuu, hangano manangaiano onaemo manangaiamiu. 8Mentee ntu'u, Kanandiomo pau-Do Ueno luwuakoano, Ue Alado to Isaraeli: Si domempopo'oo komiu nabimiu anu kongko i tonga-tongamiu ka luwuno mia mpompau anu nahi manasa ta gagi. Si mperorongeakono mo'ipimiu anu impetenaako ka domemo'ipiakono! 9Hangano, ondae mpompau anu ta gagi nahi mentee a nee-Ku. Nahi Kutena ira, kanandiomo pau-Do i Ue.
10 #
2Taw. 36:21; Yer. 25:11; Dan. 9:2 Mentee ntu'u kanandiomo pau-Do i Ue: Tewala sompoomo pitu pulu nta'uno Babeli, ka Ku'amba aiwa kumita komiu. Aku umihiio dandi-Ku ndi omiu saru mokule komiu a mpo'ianga andio. 11Hangano Kuto'orio luwuno tinoo anu Kupewowoloo mongkona omiu, kanandiomo pau-Do i Ue, onaemo tinoo rodoa ka komba tinoo masolaa, moweeakomiu oleo lembuiano anu buke pomperorohi. 12Tempono impebooli ka me'aiwa komiu mpekakai ndi Ongkue, Aku merorongeakomiu; 13#Win. 4:29tempono ime'ungke Aku, komiu mehawe Aku; tempono ime'ungke Aku tompaano aroamiu, 14Aku koa memoikoo intepohawea-Kune, kanandiomo pau-Do i Ue, ka Aku momuleo teweweumiu ka pumpu komiu inso i olodo luwuno tongku ka inso a luwuno po'ianga ba isua Kusiarawo komiu, kanandiomo pau-Do i Ue, ka Aku mokule komiu a mpo'ianga insoamiu inso isua Kutadi komiu.
15 #
Yer. 29:21-23
Impotae: ’Dowangu iramo i Ue nabimami i Babeli.’
16Mentee ntu'u, kanandiomo pau-Do i Ue mongkona mokole anu mentoro a wawo ngkadera poparentaano i Daudi ka mongkona luwuno palili anu mpo'ia i kota andio, luwuno pepaekompomiu anu nahi dompeluarako mperonga omiu melako a pontadia: 17Kanandiomo pau-Do Ueno luwuakoano: Menteeano, Aku mompotii ponai, mokoninggoa ka haki lele i tonga-tongado. Aku weweu ira kana wua ara anu moboo tedoa mosa'o, ranta nahi moiko ikinaa. 18Aku lumampuiako ira ponai, mokoninggoa ka haki lele. Aku weweu ira gagi mongkokongirido luwuno poparentaa i tolino, gagi totonaa, doitoa, pasinggiri ka mokoko'iia i olodo luwuno tongku ba isua Kusiarawo ira. 19Hangano, nahi domperorongeakono pau-Ku, kanandiomo pau-Do i Ue, anu Kupohaweomo ndi ondae nahi otu-otu telalo a luwuno tetenaa-Ku, onaemo luwuno nabi. Sine nahi imperorongeakono, kanandiomo pau-Do i Ue. 20Rongeomo pau-Do i Ue, hei luwumiu mia mentinadi, anu Ku'oliwi komiumo inso i Yerusale lumako i Babeli!
21Kanandiomo pau-Do Ueno luwuakoano, Ue Alado to Isaraeli, mongkona i Ahabi anano i Kolaia ka i Sedekia anano i Ma'asea, anu mompau anu ta gagi nahi mentee ndi omiu a nee-Ku: Menteeano Aku meweengako ira a ngkaeno i Nebukanesa, mokole i Babeli, anu ta mepate ira i arono matamiu. 22Inso a mpinembasaido onaemo ta tino'ori pau pontotonaa i olodo luwuno mia mentinadi inso i Yehuda anu mekongko i Babeli, kanandio: Po'ineeomo Doweweu komiu i Ue kana i Sedekia ka i Ahabi anu irarami iramo mokole i Babeli a laro api!, 23hangano mpoweweu iramo benge-bengea i Isaraeli, mpososabo iramo saru kombiano pe'asa miado ka mpompau iramo pau mpegaupi anu nahi Kuparentaako ira. Ongkue isa'a anu tumo'orio ka sumakosiio, kanandiomo pau-Do i Ue.”
Pohaweno i Yeremia mongkona wuntano i Semaia
29:24-32
24Ndi Semaia, to Nehelami atuu, asalakono ka upauo, 25”Kanandiomo pau-Do Ueno luwuakoano, Ue Alado to Isaraeli: Omue mo'oliwikomo wunta a neemu omuemu a luwuno palili anu mekongko i Yerusale, onaemo ndi sando mpesomba Sepania anano i Ma'asea ka a luwuno sando mpesomba, unino: 26Ondae i Ue motoroko, Sepania, gagi sando mpesomba umeuo sando mpesomba Yoada, gagi puu pomparesa a Raha-Do i Ue mompanga sompo mia mekombe anu mepau kana nabi ka rumanteo we'uno. 27Sine kanandio-andio, tembio nahi ukuahakono i Yeremia, to Anatoti atuu, anu mepau kana nabi i tonga-tongamiu? 28Kombake onae mo'oliwiomo pe'oliwi ndi omami i Babeli' ipotae: Pontadiamiu da tehine. Wanguomo raha ka impo'iangario; pompahoakonomo leremiu ka imperapiomo hasilino!”
29Wunta atuu ibasao sando mpesomba Sepania anu irongeo Nabi Yeremia. 30Ka i'amba haweomo pau-Do i Ue ndi Yeremia, kanandio, 31”Oliwiomo lele andio a luwuno mia mentinadi, Kanandiomo pau-Do i Ue mongkona i Semaia, to Nehelami atuu: I Semaia mompauomo anu ta gagi ndi omiu, maupo nahi Kutenao, ka iweweu komiumo mpompe'ala-ala a mpegaupi. 32Onaemo pu'uno, kanandiomo pau-Do i Ue: Menteeano, Aku humukuo i Sepania, to Nehelami atuu, ka inuleno. Nahina maupo te'asa mia inso ndi onae ta mo'ia i tonga-tongano tongku andio ka kumitao anu moiko anu Aku weweuo a bawaa-Ku, kanandiomo pau-Do i Ue, hangano onae mompaleleomo pe'ewa ndi Ondae i Ue.”
Currently Selected:
Yeremia 29: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
