Yeremia 28
28
Teposisalado Nabi Yeremia ka Nabi Hanania
28:1-17
1 #
2Mok. 24:18-20; 2Taw. 36:11-13 A nta'u atuu, a pompu'uano poparentaano i Sedekia, mokoledo to Yehuda, a wula ko'olima ta'u ko'opaa, nabi Hanania anano i Asuri anu inso i Gibeoni motae ndi ongkue a Raha-Do i Ue, i arono matado sando mpesomba ka luwuno palili, 2”Kanandiomo pau-Do Ueno luwuakoano, Ue Alado to Isaraeli: Kupuduomo pasangano mokole i Babeli. 3I larono orua nta'u andio Aku mokuleo a mpo'ianga andio luwuno parewano Raha-Do i Ue anu inalano i Nebukanesa, mokole i Babeli inso a mpo'ianga andio ka winawa i Babeli. 4I Yekonia mbo'u anano i Yoyakimi, mokoledo to Yehuda, ka luwuno mia mentinadi inso i Yehuda anu winawa i Babeli Aku wawa ira mpekule a mpo'ianga andio, kanandiomo pau-Do i Ue! Mentee ntu'u, Aku puduo pasangano mokole i Babeli atuu!”
5Ka i'amba Nabi Yeremia motae ndi Nabi Hanania i arono matado sando mpesomba ka i arodo luwuno palili anu mpentade i Raha-Do i Ue, 6motae nabi Yeremia, ”Ami! Po'ineeomo Ondae i Ue weweuo kanandio! Po'ineeomo Do'ihiio i Ue luwuno pau anu pinaumu ta gagi atuu ka ipinokule luwuno parewano Raha-Do i Ue ka luwuno mia mentinadi inso i Babeli a mpo'ianga andio. 7Polomo koa perorongeakonomo pau anu aku pauo a birimu ka birido luwuno palili: 8Luwuno nabi se'eluno ongkue ka se'eluno omue, inso i ndi'ipua mpopau iramo anu ta gagi a hadio wita po'ianga ka a luwuno poparentaa anu langkai mongkona peteaa, masolaa, ka haki lele. 9Ka mongkona asa mia nabi anu mompau anu ta gagi mongkona rodoa, tewala anu ta gagi pinauno nabi atuu inihii, ka i'amba pinokonto'ori, nine nabi atuu mentee ntu'u tinena-Do i Ue.”
10Ka i'amba Nabi Hanania umalao keu ponsela atuu inso a banga we'uno i Nabi Yeremia, ka mepuduakono. 11Motaeomo i Hanania i arono matado luwuno palili, ”Kanandiomo pau-Do i Ue: Kanandiomo Aku puduo pasangano i Nebukanesa, mokole i Babeli, inso a banga we'uno luwuno tongku i larono orua nta'u andio!” Sine Nabi Yeremia lumako inso i ra'ai.
12Umarino Nabi Hanania puduo keu ponsela inso a banga we'uno Nabi Yeremia, haweomo pau-Do i Ue ndi Yeremia, 13”Lakomo ka pauo ndi Hanania: Kanandiomo pau-Do i Ue: Upuduomo keu ponsela, sine Aku moweweu labu ponsela gagi euno! 14Hangano, kanandiomo pau-Do Ueno luwuakoano, Ue Alado to Isaraeli: Pasanga labu Aku numaao a wawo banga we'uno luwuno tongku andio, ranta ka dompetuundu ndi Nebukanesa, mokole i Babeli. Mentee ntu'u, ira mpetuundu ndi onae! Tendeano maupo anano wula mo'ila Kupeweengakonomo ndi onae.” 15Ka i'amba motae Nabi Yeremia ndi Nabi Hanania, ”Rongeomo, hei Hanania! Ondae i Ue nahi Dotenako, sine uweweu iramo tongku andio mpompe'ala-ala pegaupi. 16Onaemo pu'uno, kanandiomo pau-Do i Ue: Menteeano, Aku sumaariko inso i wawontolino. Ta'u koa mbo'u andio omue komate, hangano upaleleomo pe'ewa ndi Ondae i Ue.”
17Mateomo Nabi Hanania a nta'u koa mbo'u atuu, a wula ko'opitu.
Currently Selected:
Yeremia 28: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
