Yeremia 27
27
Tinena tumembio pasangano Babeli
27:1-22
1 #
2Mok. 24:18-20; 2Taw. 36:11-13 A pompu'uano poparentaano i Sedekia, ana ntamano i Yosia mokoledo to Yehuda, haweomo pau andio inso ndi Ondae i Ue ndi Yeremia. 2Kanandiomo pau-Do i Ue ndi ongkue, ”Weweuomo koloro ka keu ponsela, ka i'amba naaomo atuu a banga we'umu! 3Ka i'amba oliwiomo pe'oliwi ndi mokoledo to Edomi, mokoledo to Moabi, mokoledo inuleno i Amoni, mokoledo to Tirusi ka mokoledo to Sidoni, telalo a mia mentinena anu mehawe iramo i Yerusale mpe'aro ndi Sedekia, mokoledo to Yehuda. 4Parenta iramo ka domempauako ira uedo pau-Do Ueno luwuakoano, Ue Alado to Isaraeli: kanandiomo asalakono imempauako ira uemiu: 5Ongkuemo saru roso-Ku anu langkai ka tokiaku anu tetasiako mokogagio tolino, mia ka pinotuwu anu kongko i wawontolino, ka Kupeweengakono a mia anu mentee a pongkita-Ku. 6Kanandio-andio, Kupeweengakono luwuno wita andio a ngkaeno tetenaa-Ku, i Nebukanesa, mokole i Babeli. Maupo kondehora mo'ila Kupeweengakonomo ka dompetuundu ndi onae. 7Luwuno tongku ira mpetuundu ndi onae, ka a ana'ueno, ranta ka ihawe tempono witano onaeno mbo'u dompongko'alao hadio tongku ka mokole langkai.
8Sine tongku ka poparentaa anu nahi behe metuudu ndi Nebukanesa, mokole i Babeli, ka anu nahi behe numaao banga we'uno a ntoto pasangano mokole Babeli, tongku atuu Aku humukuakono ponai, mokoninggoa ka haki lele, kanandiomo pau-Do i Ue, ranta ka Kupokotampulaako ira kaedo. 9Gagi, siimo imperorongeako ira nabimiu, anu hadio tino'orino, puu mpo'ipi, anu mompau nahi manasa ta gagi, puu ponsihirimiu anu mpotae ndi omiu, ’Si mebehe mpetuundu ndi mokole i Babeli!’ 10Hangano ondae mpompau anu ta gagi nahi mentee ndi omiu ka imempinoko'olai inso i witamiu ka Kusiarawo komiu ka i'amba memate. 11Sine tongku anu behe numaao banga we'uno a ntoto pasangano mokole i Babeli ka metuundu ndi onae, Aku mo'ineeo kongko i witano, kanandiomo pau-Do i Ue, ira me'anggao ka mpo'ia i ra'ai.”
12Ndi Sedekia, mokoledo to Yehuda, kupohaweomo pau mengkena, ”Naaomo banga we'umu a ntoto pasangano mokole i Babeli. Petuundumo ndi onae ka a mpalilino, asalakono komiu mentuwu. 13Tembio omue ka palilimu asalakono memateako ponai, mokoninggoa ka haki lele kana anu pinau-Do i Ue mongkona tongku anu nahi behe metuundu ndi mokole i Babeli atuu? 14Si mperorongeakono pinaudo nabi anu mpotae ndi omiu, ’Si mebehe mpetuundu ndi mokole i Babeli!’ Menteeano, ondae mpompau anu ta gagi nahi mentee ndi omiu. 15Hangano, nahi Kutena ira, kanandiomo pau-Do i Ue. Ondae mpompau anu ta gagi nahi mentee a nee-Ku, onaemo ka Kusiarawo komiu ka memate mperonga saru luwuno nabi anu mpompau anu ta gagi ndi omiu.”
16A luwuno sando mpesomba ka luwuno palili andio mbo'u ongkue mepau, ”Kanandiomo pau-Do i Ue: Si mperorongeakono pinaudo nabimiu anu mpompau ndi omiu: ’Menteeano, nahi tehine mbo'u parewano Raha-Do i Ue ta winawa mekule inso i Babeli!’ Hangano ondae mpompau anu ta gagi nahi mentee ndi omiu. 17Siimo imperorongeako ira! Impetuundumo ndi mokole i Babeli, ka komiu mentuwu. Tembio kota andio asalakono ka igagi terawo-rawo? 18Tewala ondae atuu lano nabi ka pau-Do i Ue kongko ndi ondae, moikoomo dodadai Ira Ueno luwuakoano, ka si winawa i Babeli luwuno parewa anu da tebinta a Raha-Do i Ue, a langkanaeno mokoledo to Yehuda, ka i Yerusale. 19Hangano kanandiomo pau-Do Ueno luwuakoano mongkona luwuno karuno, bolusano ’Tahi’ ka luwuno pontumbono, saru luwuno parewa anu da tebinta i kota andio, 20anu nahi alao i Nebukanesa, mokole i Babeli, tempono iwawao i Yekonia anano i Yoyakimi, mokoledo to Yehuda, a pontadia meronga luwuno mia pinemota'u i Yehuda ka i Yerusale, inso i Yerusale lumako i Babeli. 21Mentee ntu'u, kanandiomo pau-Do Ueno luwuakoano, Ue Alado to Isaraeli, mongkona luwuno parewa anu da tebinta a Raha-Do i Ue, a langkanaeno mokoledo to Yehuda, ka i Yerusale: 22Luwuno ta winawa i Babeli ka kongko mpiha i ra'ai hawe oleo ka Ku'aiwa mbo'u, kanandiomo pau-Do i Ue, ka i'amba winawa mbo'u i ndi'ai.”
Currently Selected:
Yeremia 27: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
